وزیراعظم ءُُ سرءُُ وج کتگ کہ درائیں حکومتی ادارگ افغان لڑ ءُُ بار کنوکیں مردماں وتی جند ءِ ملک افغانستان ءَ برترینگ ءِ ھاترا گامگیج بزورانت ءُُ اے درگت ءَ ہچ وڑیں پارٹی ءُُ کمٹدانی لیکہ ءُُ سیادی چارگ ءُُ مان آرگ مہ بنت ۔وزیراعظم ءَ گشتگ کہ اے درائیں کار داں آؤکیں ۳۱ دسمبر ءَ پیسرکنگ بہ بنت ۔

وزیراعظم ءَ وتی اے گچینی پنت ءُُ سوج ملک ءِ تہی کارانی وزارت ءَ دیم داتگ انت ۔پیسر ءَ وزیراعظم ءُُ حکومت چہ وتی اے کار ءَ پٹھان رہشونانی بازیں بلیک میلنگ ءَ بج اتگ ات انت پمشکہ اے کار داں سالے ءَ مہتل دارگ بوتگ ات اگاں کہ وزیراعظم ءِ اے گامگیج پہ پاکستان ءُُ پاکستانی مہلوک ءِ ھاترا جوا ن ءُُ وش نہ ات ۔

نوں حکومت ءَ سوڈگ کتگ اے افغان لڈ ءُُ بار کنوکیں مردماں ہروڑا پدا وتی ملک ءَ دیم دئیگی انت پرچکہ اے وہد ءَ پاکستان ءَ ناشری ،منشیات کشت ءُُ ہون ،آوار جنی ءِ گیشتریں ویلاں ہمے لڈ ءُُ بار کنوکیں مردمانی دست مان انت کہ آہانی اے وہد ءَ بازیں پارٹی ءِ ماں اسمبلی ءَ پلہ مرزی کنگان انت پرچکہ اے پارٹی وت چہ ہمے لڈ ءُُ بار کنوکیں مردماں ووٹ گرانت چدساری حکومت ءِ نیمگ ءِ اے فرمان اتکگ ات کہ کانود برجاہ داروکیں ادارگ ءُُ دمگی حکومت درکانودی در ءَ اتکگیں افغان لڈءُُ بارکنوکیں مردماں شہر ءُُ میتگاں تر ءُُ گرد ءَ میل انت بلئے گوستگیں سال ءُُ نیم ءَ دمگی حکومت ءُُ کانود برجاہ داروکیں ادارگاں اے درگت ءَ ہچ وڑیں گامگیج نہ زرتگ بلکہ بازین دمگاں گمان ہمیش بوتگ کہ رمگی حکومت چہ ملک ءِ بنکی ئیں جاہ منداں گیش ہمے افغان لڈ ءُُ بار کنوکیں مردماں آسراتی دئیگ لوٹ انت ۔

اے وہد ءَ وزیراعظم ءَ تچکا گشتگ کہ کانود برجاہ داروکیں ادارگ اے درائیں افغان لڈ ءُُ بارکنوکیں مردماں دزگیر بکن انت کہ آہاں پاکستانی شناس نامہ گون ،پاکستان پاسپورٹ گون یا پاکستان ءَ بیپار ءُُ زمین زوری کنگان انت ۔

وزیراعظم ءِ گشگ ایش ات کہ درائیں درکانودی کاگد ہچ وڑ ءَ پاکستان ءِ جاہ منندیں مردمانی بدل نہ بنت کہ گوستگیں چل سالاں افغان لڈ ءُُ بار کنوکاں ملک ہکی ئیں جاہ منند رپینتگ انت ۔

دومی دست ءَ وزیراعظمءُُ اے ہم گشتگ کہ چہ اے افغان لڈ ءُُ بار کنوکیں مردمانی سلین کار ءُُ بیش کاریاں پاکستان جہان ءَ رسوا ءُُ بدنام بوہگان انت پمشکہ ہرچ سرکاری آفسیرے، قبائلی کماش یا راجکاری پارٹی یے اے افغان لڈ ءُُ بار کنوکیں مردمانی درکانودی کاگداں دس رندءُُ دس نال جنت آ دراہ بید ء ریا ءُُ رو ءَ دزگیر کنگ بہ بنت پرچکہ اے وڑ ءَ اے مردم ہم پاکستان ءِ بدنامی ءُُ رسوائی ہوار انت ءُُ دومی ہمے مردمانی کمک ءَ افغان لڈ ءُُ بار کنوکیں مردم پاکستان ءِ کانود مان نیار انت اے رندءَ گمان ہنچو بوہگان انت کہ حکومت افغان لڈ ءُُ بارکنوکیں مردمانی واتری ءِ گامگیج ءَ دل ستگءُُ دل پہک انت ءُُ ۳۱ سمبرءُُ افغان لڈ ءُُ بار کنوکیں مردماں ہرچ وڑا وتی جند ءِ ملک افغانستان ءُُ دیم دنت ءُُ اے رندی حکومت ہچ وڑا آ پارٹیاں بلیک میلنگ ءَ نئیت کہ آ چہ ہمے افغان لڈ ءُُ بار کنوکیں مردماں ووٹ ءُُ بتھہ گرانت۔ 

اے درچ ءَ زانتکاریں مردمانی گوں حکومت ءَ پنتءُُ سوج ایش انت کہ حکومت اے درگت ءَ داں ۳۱ دسمبر ءَ صبر مکنت بلکہ انوں وتی گامگیجاں بندات بکنتءُُ افغان لڈ ءُُ بار کنوکیں مردماں ہمے وہد ءَ چہ شہر ءُُ ہکی ئیں جامنندیں مردمانی میتگ ءُُ ہلکاں دربکنت ءُُ افغان سیمسراں بنادین انت تنکہ دسمبر ءَ اشانی گر ءُُ دار افغانستانءَ دیم دئیگ حکومت ءَ گرانیں کارے مہ بیت پرچکہ اے وہد ءَ پاکستان ءِ سیمسرانی نگیگیں جاورانی رد ءَ ا ے مردمانی شہر ءَ جاہ منندی ،میتگانی کر ءُُ کشاں نندگ لس مہلوک ءَ ءُُ پہ پاکستان ءِ کانود برجاہ داروکیں ادارگانی بابت ءَ مزنیں ترس ءُُ بیمے ودی کنگان انت ۔

اے درگت ءَ زانتکار ایران ءِ بازسپت ءُُ توسیپ ءَ کن انت کہ آئی ءَ افغان لڈ ءُُ بار کنوکیں مردم ہچبر وتی شہرءُُ میتگاں نیشتگ انت بلئے مئے ملک ءَ حکومت پیش بندی ہمیش بوتگ کہ اے گوں دمگی مردماں ہنچو ہوار ءُُ تور بہ بنت کہ ہچ پجہ آرگ مہ بنت بلئے نوں حکومت ءِ پیش بندی پیشتگیں نہ انت نوں بائدیں حکومت اے بابت ءَ ترندیں ءُُ بید ءِ ریا ءُُ روئیں گامگیج بزور انت ءُُ ہچ وڑا افغان لڈ ءُُ بار کنوکیں مردمانی راجکاری پارٹیانی بلیک میلنگ ءَ مئیت ۔