1997 ءِ یک روتاکے ءَ رپورٹے شنگ بوتگ اَت کہ ملک ءَ جوڑ بوتگیں نقلی دوایانی ۷۵ درسد بلوچستان ءَ دیم دئیگ بنت ءُُ ایندگہ 25 درسد ملک ءِ ایندگہ سیہں دمگاں( صوبہاں) بہر ءُُ ونڈ کنگ بنت ۔

بلوچستان ءَ اے نقلی دوایانی 90درسد ایوک ءَ مکران ءَ دیم دئیگ بنت ءُُ ایندگہ ۱۰ درسد دمگ ( صوبہ) ءِ ایندگہ ہنداں بہر ءُُ بانگ کنگ بنت ۔بژن ءِ گپ ایش انت کہ اے بیپار ءَ اے وہدءَ مستریں دست ڈاکٹرانیگ انت ،اگاں کہ دستے دوا سازیں کمپنیانی ہم ہست انت بلئے نادراہ ءُُ دوا زوروکیں مردم تچکا اے کمپنیانی دوایاں بہا نہ گرانت بلکیں نادراہانی گیشتریں بہر ڈاکٹرانی سرا بھروسہ ءُُ بارو کنت پرچکہ ڈاکٹر وت ہما چاگرد ءِ مردم انت ءُُ وتی نادراہانی اے بھروسہ ءُُ باوری ءَ دئینت کہ آ آہانی دوازہ ءُُ دوست انت ۔

چونا اے وہد ءَ درائیں ملک ءَ ڈاکٹرانی کار نادراہانی پُلگ ءُُ رپینگ انت بلئے بلوچستان ءَ راج دوستیں حکومت ءِ سوب ءَ اے کار گیش توانا بوتگ ءُُ وداتگ ءُُ پہ گچینی مکران ءَ، مکران اے وہد ءَ جان سلامتی ءِ تک ءَ بلوچستان ءِ پد منتگیں دمگ انت پرچکہ مکران چہ ملک ءِ دیمروئی کرتگیں درائیں شہراں دور ءُُ گستا انت پمشکہ مکران ءِ نیزگاریں مردمانی دزرسی یے ءِ گوں ملک ءَ دیمروئی کرتگیں شہراں نیست انت۔

ایشی علاج ءُُ گیشواری ایش ات کہ حکومت ءُُ پہ گچینی دمگ ءِ راج دوستیں حکومت ءَ مکران ءِ سرکاری نادراہ جاہاں گیشتر آسراتی بدات انت بلئے افسوس ایش انت کہ مکران ءِ گیشتریں سرکاری نادراہ جاہاں جان سلامتی ءِ بنکی آسراتی نگواہ انت۔

ہندی مردمانی گشگ ایش انت ڈویژن ہیڈ کواٹر ءَ بگرداں ضلعی ہیڈ کواٹراں گیشتر ڈاکٹر ءُُ میڈیکل اسٹاف ڈیوٹی نہ دئینت ایندگہ کسانیں نادراہ جاہ چہ حساب ءَ درانت پدا مردمانی گشگ ایش ہم ہست انت کہ اگاں اے کسانیں مزنیں نادراہ جاہاں آسراتی ہست گڈا آ ہندی سرکاری ءُُ راجمانی واکداریں مردماں رس انت ایندگہ نیز گاریں ءُُ بے واکیں مردم چہ اے سرکاری آسراتیاں زبہر انت کہ چیریشی ءَ لس مہلوک ءِ تہا پہ بنجاہی حکومت ءَ مزنیں ناوشی یے ودی بوہگان انت کہ آئی ءَ دیم ءَ ہمے راج دوستیں سرکار پہ وتی ووٹ ءُُ پارٹی ءِ نپ ءُُ سیت ءَ کارمرز کنگ ءَ دلمانگ انت ۔

اے وہد ءَ مکران ءَ جان سلامتی ءِ تک ءَ یک جیڑھ یے نادراہ جاہاہ ءُُ جان سلامتی ءِ بنکی آسراتیانی نہ بوہگ انت ءُُ دومی مسترین جیڑھ ڈاکٹرانی گوں نادراہاں ناروائیں رو ءُُ دم ءُُ تب انت اے وہد ءَ مکران ءَ ڈاکٹر نادراہاں نادراہ یے چارگ ءِ بدل ءَ آہاں گراکے چار انت ءُُ ہمے بے واکین ءُُ بزگیں نادراہانی پشت ءَ وتی کمپنیانی نقلی دوایاں بہا کنگ لوٹ انت اگاں چارگ بہ بیت اے وہد ءَ مکران ءَ ہما درائیں ڈاکٹر کہ سرکاری نادراہ جاہاں ابید وتی جندی کلینکاں کار ءَ انت آ دراہ کروڑ پتی جوڑ بوتگ انت دومی اے گیش ءُُ بے سر ءُُ پادیں دوائینانی کارمرزی ءَ مکران ءَ سلامتیں مردم ءِ جند نگواہ ایت ۔

ءُُ ڈاکٹر ہمے بزگ ءُُ نیزگاریں نادراہانی پشت ءَ شش شش ماہ ءِ سرا برے تہائی لینڈ ء برےُ فرانس ءُُ جرمنی ءَ تروتاب ءِ تہا انت کہ اشانی اے درائیں تروتابانی ہرچ ءُُ درچ ہمے دواسازیں کمپنیانی چک ءَ انت بازیں ترءُُ تاباں اے ڈاکٹر وتی سنگت ءُُ ساتی ءُُ کہول ءِ مردم ءُُ ہمساہگاں ہم برانت۔ 

پدرانت کہ اے زر ءُُ کلداراں کمپنی چہ وتی ہرچ ءُُ درچان نہ دئینت بلکیں ہمے بزگین ءُُ واریں نادراہانی جان ءَ کش انت اے سکیں نگیگیں جاورے اے بابت ءَ اگاں سرکار گامگیجے نزور ات کہ اے کار ءِ تہا بلکیں آئی ءِ درسدے بہ بیت بلئے بائدیں سوجگرانی گل ،سول سوسائٹی ءُُ راج دوستیں گل اے جیڑہ ءِ سر ءُُ گامگیج بزور انت یکے مہلوک ءَ اے بابت ءَ سہی ءُُ سرپد بکن انت ءُُ دومی دست ءَ ڈاکٹر ءُُ جان سلامتیءِ بہرگ ءَ گوں سیادی داروکیں واکداراں کھڈن بکن انت کہ آ بائدیں گوں بنی آدم ءِ زند ءَ وتی ریپک ءُُ ہنراں بند بکن انت۔