اے وہد ءَ دنیا ءَ درائیں راج ءُُ قوم وانگ ءُُ زانگ یا ایجوکیشن ءِ دیمروئی ءَ ملک ءُُ الس ءِ دیمروئی ءِ مانزمان من اَنت ءُُ اے تک ءَ برز سندیں وانگ ءُُ زانگ ( Higher Education) ءَ مزن ارزشتے دئینت ءُُ وانگ ءُُ زانگ ءِ اے تک ءَ مزنیں جکانسری کشگان اَنت ۔

وت پاکستان ءَ اے وہد ءَ برزسندیں وانگ ءُُ زانگ ءِ دیمروئی ءِ ھاترا مزنیں جہد ءُُ کوشت بوہگان اِنت چوکہ ایچ ای سی ءِ نیمگ ءَ جار جنگ بوتگ اَت کہ اگاں کالج ءِ استاداں داں 2017 ءَ ایم فل ءُُ پی ایچ ڈی نہ کت گڑا آہانی پوسٹ پُلگ بنت ۔اے درگت ءَ بلوچستان ءَ وانگ ءُُ زانگ ءِ دیمروئی ءِ ھاترا بنجاہی حکومت ءِ نیمگ ءَ بازیں فنڈے دئیگ بوہگان اِنت ۔

ہمے درچ ءَ 2013 ءَ پد بلوچستان ءِ حکومت ءَ ایجوکیشن ایمرجنسی جار پرئینتگ ات بلئے چوکہ بلوچستان ءِ حکومت ءِ جار ءُُ پروپیگینڈہ ات ایجوکیشن ایمروجنسی ءِ پشتءَ اے وڑا کارکنگ نہ بوت کہ 2016 ءَ وت ایجوکیشن ڈیپارٹمنٹ ءِ واکدارانی جند ءِ گشگ ءِ ردا ایجوکیشن ایمرجنسی ءَ پد صوبہ ءَ ایجوکیشن دیمروئی ءِ بدل ءَ چہ گوستگیں سالاں گیشتر پد منتگی ءِ آماچ بوتگ وہدیکہ برزسندیں وانگ ءُُ زانگ ءِ جاور حال اے وہد ءَ ہچ گپی ءُُ حبری نہ اَنت ۔

ءُُ ایجوکیشن ایمرجنسی ءِ ہمے دور ءَ بلوچستان حکومت ءَ برز سندیں وانگ ءُُ زانگ ءِ دیمروئی ءِ ھاترا مزنیں جاک ءُُ کوکارے کت کہ داں دوسال ءَ بلوچستان ءَ علمی ءُُ لبزانکی گلاں مزنین فنڈے دئیگ بوت ءُُ پدا 2014 ءِ سال بلوچستان ءِ اولی ایجوکیشن منسٹر ءِ نام ءَ نامینگ بوت تنکہ مہلوک باور بہ کنت کہ حکومت بلوچستان ءَ وانگ ءُُ زانگ ءِ بابت ءَ چنچو سنگینیں گامگیج زورگان انت بلئے نوں اے حکومت ءَ کہ 5سال کُبل بوہگان اَنت ایجوکیشن ڈیپارٹمنٹءِ جندےءِ واکدارانی گشگ انت ایجوکیشن ءِ تک ءَ بلوچستان ءَ کہ ہرچی بوتگ بس ہمیش کہ
’’سرکن ،پرکن ،ہپ کن ءُُ ہچ‘‘

بدبحتی ایش انت کہ ہمے دور ءَ کہ برزسندیں وانگ ءُُ زانگ ءِ دیمروئی ءُُ ایجوکیشن ایمرجنسی ءِ جار پرینگ بوتگ اَت بلوچستان ءَ ایجوکیشن ڈائریکٹریٹ ءَ پہ یونیورسٹی ءِ جہل ءِ وانگ ءُُ زانگی ادارگانی کارداراں ایم فل ءُُ پی ایچ ڈی ءِ اسکالرانی این او سی دئیگ ءِ سرا بندش جتگ ات۔ کندگی گپ ایش انت کہ دنیا ءَ ہرچ جاہ ءَ ادارگ لوٹ انت کہ آہانی کارندہ ءُُ کاردار گیشتر وانندہ ءُُ زانتکار ءُُ سرپدی ئیں مردم بہ بنت ءُُ اے درچ ءَ اے ادارگ وتی جند ءِ ہرچ ءُُ درچ ءِ سرا وتی کارندہ ءُُ کارداراں گیشتریں وانگ ءُُ زانگ ءِ ھاترا مدد ءُُ کمک کن انت تنکہ پہ ادارگاں آہانی سنچ ءُُ لائقی گیشتر بہ بیت ۔ایشی ءِ مستریں درور وت پاکستان ءَ بینک ءُُ ایندگہ مالیاتی ادارگ انت۔

کہ وتی کارداراں ایم بی اے ،ایم فل ءُُ پی ایچ ڈی ءِ ھاترا وت ہرچ ءَ درچ کن انت تنکہ کارندہ ءُُ کاردار گیشتر بودناک ءُُ سنچی بہ بنت بلئے بژن ءِ گپ انت کہ بلوچستان ایجوکیشن ڈیپارٹمنٹ بلکیں دنیا ءِ اولی ادارگ انت کہ نہ لوٹ ایت کہ آئی ءِ کارندہ ءُُ کاردار گیشتر سنچئیگ ءُُ بودناک بہ بنت حالانکہ چہ ایندگہ مالیاتی ادارگانی بدل ءَ ایجوکیشن ءِ ڈیپارٹمنٹ ءِ بنکی کارہمیش انت کہ وتی جند ءِ کارداراں ہوار ایندگہ لس مہلوک ءَ وانگ ءُُ زانگ ءُُ ایجوکیشن ءِ نیمگ ءَ بیار ایت تنکہ لس مہلوک ءِ تہا وانگ ءُُ زانگ ءِ ارزشت ءُُ ہب ودی بہ بیت بلئے ایجوکیشن ڈیپارٹمنٹ ءِ کہر ءَ بچار کہ جہندم چہ ایندگہ لس مہلوک ءِ وانگ ءُُ زانگ ءَ وت وتی جند ءِ ادارگ ءِ کارندہ ءُُ کارداراں ( کالج ءُُ اسکول ءِ ٹیچراں ) ایم فل ءُُ پی ایچ ڈی کنگ ءَ نیل ایت ۔



وہدیکہ کالج ءُُ اسکولاں بازیں استادے ایم فل ءُُ پی ایچ ڈی ءَ دلمانگ انت بلئے چہ ایجوکیشن ڈیپارٹمنٹ ءِ نیمگ ءَ ایشاں این او سی دئیگ بوہگان نہ اِنت کہ’’ شما پرچہ پی ایچ ڈی ءُُ ایم فل کنگ لوٹ اِت‘‘ حالانکہ اے درچ ءَ بائدیں ایجوکیشن ڈیپارٹمنٹ ءِ جست وتی کارندہ ءُُ کارداراں اے بہ بیت کہ ’’شما پرچہ ایم فل ءُُ پی ایچ ڈی کنگ نہ لوٹ اِت ؟ ‘‘ 

اے درچ ءَ چہ ایجوکیشن ءِ وزیر ءَ گوں ہچ وڑیں گلہ ءُُ زنگے نہ بیت کہ آ وت مزنیں وانندگ ءُُ زانندگے! بلئے ایجوکیشن سکریٹیری بائدیں گامگیجے بزورایت کہ چد ءُُ پیش کہ اے گپ نام بکپ ایت کہ بلوچستان ءِ ایجوکیشن ڈیپارٹمنٹ دنیا ءِ ایوکیں ڈیپارٹمنٹ انت کہ وانگ ءِ دشمن اِنت ءُُ وانگ ءُُ زانگ ءِ راہ ءُُ دراں بند کنگ لوٹ اِت۔