حالانی رد ءَ افغانستان پاکستان ٹرانزٹ ٹریڈ کوآر ڈی نیشن اتھارٹی ءِ دیوان آوکیں ماہ ستمبر ءِ 11 ءُُ 12 تاریخ ءَ بوہگان انت۔اے دیوان ءَ پاکستان ءِ بیپار ءِ سیکریٹری ءِ کماشی ءَ بیپار ءِ وزارت ءِ یک ڈلے ہوار بیت۔ دیوان ءَ پاکستان ءِ گوں افغانستان ءَ بیپار ءِ دیمروئی ءِ بابت ءَ گپ ءُُ تران بیت ۔

اے گپ ءُُ تران سالے ءَ پد بنا بوہگان انت ۔چرے گپ ءُُ تراناں اے حبر ہم دیم ءَ آرگ بیت کہ امبراں چہ پاکستان ءَ ماں افغانستان ءَ بیپار ءِ کچ ءُُ کیاس کم بوتگ وہدیکہ چہ افغانستان ءَ ماں پاکستان ءَ بیپار گیش بوتگ بزاں اے دیوان ءِ یک بنگپے ایش انت کہ افغانستان چہ پاکستان ءَ بیپار بکنت بلئے اے گپ چہ عقل ءُُ ہوش ءَ در انت کہ چہ افغانستان ءَ ہرچ بیپاری مالے ماں پاکستان ءَ کیت آ چہ درملکاں کیت ءُُ آئی سند ءُُ کوالٹی چہ پاکستان ءِ مال ءُُ اسباباں گیشتر ءُُ محکم انت پمشکہ آئی ءِ بہا زورک ءُُ کارمرز کنوک گیشتر انت چوکہ چہ افغانستان ءَ ٹرانزٹ ( کابلی) گاڑی ءُُ ایندگہ ساز ءُُ سامان۔

نوں اے چوں بوت کنت کہ افغانی جاپانی ءُُ جرمنی گاڑیانی بدل ءُُ پاکستان ءَ سوزکی گاڑی بہ برانت ؟دومی چہ پاکستان ءَ افغانستان ءَ مالے روت یا نہ روت بلئے چہ ہمے سمیسر ءَ ہیروئن ،کلاشنکوف ءُُ ایندگہ سلاہ ء’’ُُ را‘‘ ءِ ایجنٹ چہ کابلی گاڑیاں گیشتر کاینت ۔

اے وہد ءَ بلوچستان ءِ تہی کارانی وزارت بہ بیت یا بنجاہی حکومت ءِ ،دوئیں اے جار ءَ جنگان انت کہ پاکستان ءَ ہرچ ناشری یے بیت آئی ءِ پد افغانستان ءَ رونت اے درچ ءَ درائیں دنیا ءَ زانت کہ پاکستان ءِ اے ناشریاں’’ را‘‘ ءِ ایجنٹ کنگان انت ءُُ را ءِ ایجنٹانی راہ ءُُ دگ ہمے افغانستان ءِ راہ انت کہ چہ چمن ءِ سیمسر یا طورخم ءِ سیمسر ءَ ماں پاکستان ءَ پتر انت ءُُ پاکستان ءَ وت کُش ارش کن انت ءُُ یک وت کُش ارشے ءَ ہزارں پاکستانی مردم شہید کن انت۔’

’’ را‘‘ ءِ اے ایجنٹ کہ چہ افغانستان ءِ دست ءَ پاکستان ءَ کائینت ایوکا لس مہلوک ءَ نہ جن انت ءُُ نہ کش انت بلکیں واہ کینٹ بہ بیت ،کراچی بحریہ بہ بیت ،پاکستان ءِ پیسریگیں کماش جنرل پرویز مشرف ءِ سرا ارش بہ بیت پاکستان پیسریگیں وزیر اعظم بے نظیر بھٹو بہ بیت ءُُ انوگیں گوستگیں ۸ اگست ءِ وکیلانی ،شاہ نورانی ءِ ویل ءُُ سیون شریف ءِ ویل اے درائیں ویلاں پد حکومت ءَ گشتگ کہ اے ناشریں وت کش چہ افغانستان ءَ اتکگ انت ۔

گلیں وانوکاں وہدے مزن سندیں واکدار ءُُ درائیں دنیا سہی ءُُ سرپد انت کہ پاکستان ءَ ’’ُ را‘‘ ایجنٹ چہ افغانستان ءَ کاینت ءُُ ادا ناشری کن انت گڑا مئے زلورت چے انت کہ مایکے وَ وتی سیمسراں گوں افغانستان ءَ پچ بکنیں ءُُ دومی گوں افغانستان ءَ بیپار بکنیں؟ پرچکہ نوں ماسدک ءُُ دل ایکمیں کہ اے سیمسری بیپار ءَ پاکستان ءَ ہچ وڑیں نپ ءُُ سیتے نہ رس ایت اے افغان پاک سیمسر ءِ بیپار ایوکا افغانستان نپ ءُُ سیت ءَ انت دومی نیمگ ءَ چہ افغانستان ءَ ایوک ءَ ’’را ‘‘ءِ ایجنٹ پیداک انت ۔

ایشی ءِ گشواری ایش انت کہ پاکستان اے ٹرانزٹ ٹریڈ ءَ چہ افغانستان ءَ ایران ءِ نیمگ ءَ بہ پر ین ایت پرچکہ روچ ءِ مرچی چہ ایران ءِ نیمگ ءَ ہچ وڑیں را ءِ ایجنٹ نہ یتکگ کہ آئی ءَ پاکستان ءَ وت کشیں ارش کتگ، دومی گوں ایران ءَ پاکستان ءِ بیپار ءِ نپ ءُُ سیت گیشتر بوت کن انت چہ ایران ءَ ایوک ءَ تیل کیت بلئے پاکستان ایران ءَ امب ،برنج،شکر،پوست،لیبءِ ساز ءُُ سازمان، کمپیوٹر ءُُ الیکڑونک ساز ءُُ سامان دات کنت کہ چریشی ءَ لہتیں مدت ءَ پد پاکستان ءِ معاشی جاور حال گہتر بوت کن انت ۔

دومی افغانستان بہہ پاکستان ءِ دوست نہ بوتگ اے وہد ءَ ہم افغانستان انڈیا ءِ دست ءَ لیبوک انت وہدیکہ ایران مئے ہمساہگ ،برات ،اسلامی ،دوست ءُُ ہم لیکہ ئیں ملکے۔
چد و پیش ہم ایران ءَ افغانستان ءِ دیم پہ دیمی ءَ مئے ملک ءِ گیشتر مدد ءُُ کمک کتگ اگاں چہ افغانستان ءَ بے نپیں ٹرانزٹ ٹریڈ ءِ نام ءَ بلوچستان ءُُ کے پی کے ءِ سیمسر بند کنگ بہ بنت ءُُ گوں ایران ءَ ٹرانزٹ ٹریڈ ءِ حاترا سیمسر پچ کنگ بہ بنت گڑاپاکستان ءَ وت کش ارش وت ہلاس بنت ءُُ پاکستان ءِ مالیاتی جاور ہم گہتر بنت۔