اگست ءِ ماہ پہ بلوچ ءُُ بلوچستان ءَ مہربان ءُُ نامہربان دوئیں انت ۔ اگست ءِ یک وشیں روچے ۱۱ اگست انت ۔۱۱ اگست بلوچستان ءِ بن دپتر ءَ اے حاترا مزنیں ارزشت ءُُ بستارے ءِ واہند انت کہ اے روچ ءَ پاکستان ءِ حالکاری دنیا ءِ مزن تواریں واجہ صدیق بلوچ ءَ چہ کوئٹہ ءَ بلوچستان ءِ اولی انگریزی روتاک’’ بلوچستان ایکسپریس‘‘ ءَ بندات کت ۔

چدو پیش چشیں انگریزی روتاکے نہ بوتگ کہ بلوچستان ءُُ بلوچ ءِ توار بہ بیت۔واجہ صدیق بلوچ ءَ ۱۱ اگست ۱۹۹۰ ءَ بلوچستان ایکسپر گوں نہ وشیں مالی جاوراں بنا کت کہ آ وہد ءَ آئی ءِ کر ءَ جوانیں نبشتہ کارانی گلے ہم نیست ات بلئے آئی ءَ بلوچ ءِ توار ءِ ھاترا نوک سندیں ورناہانی ہیل کاری بنا کت ۔

صدیق بلوچ کہ بندات ءَ وانگ ءُُ زانگ ءِ پڑ ءَ ہمگرنچ ات بلوچ راج ءِ بزگی ءُُ بلوچستان ءِ پد منتگی ءِ جیڑہاں حالکاری ءِ پڑ ءَ آؤرت ءُُ سر کت ۔صدیق بلوچ اے وہد ءَ پاکستان ءِ کلانہیں (سینئر تریں) احوالکاراں شمار بیت ۔آئی ءَ بلوچستان ءَ ۱۹۷۳ ءِ زمانگ ءَ پد میر غوث بخش بزنجو گشگ ءِ سرا وتی لکچراری یلہ دات ءُُ احوالکاری ءِ پڑ ءَ اتک ۔

آئی ءَ بندات پاکستان ءِ وشنام تریں ءُُ مستریں روتاک ڈان ءَ کار کرت ۔ڈان روتاک ءَ کار کنگ ءِ زمانگ ءَ صدیق بلوچ ڈان ءِ جوان تریں رپوٹراں ہوار ات ۔ڈان ءَ رپوٹری ءِ زمانگ ءَ وتی جند ءِ روتاکے’’ سندھ ایکسپریس‘‘ کش ات بلئے رندءَ ۱۹۹۰ ءَ بلوچستان ایکسپریس ءِ نام دگہ روتاکے بنا کت کہ مرچی اے روتاک ءِ ۲۷ سال سرجم اَنت ۔

اے بیست ءُُ ہپت سالانی سفر ءَ صدیق بلوچ ءَ بازیں گرم ءُُ سرد دیستگ انت بدانی بیہار ءُُ چم سہر ءُُ وتیگانی ءُُ وش نیاتکانی تژن ءُُ شگان دراہ سگ اِتگ انت بلئے ہما مول ءُُ مراد کہ صدیق بلوچءِ بوتگ اے بیہار ءُُ چم سہرءُُ شگان ءُُ پیگوراں آئی ءِ مول ءُُ مراد پشت ءَ کپگ نیشتگ ءُُ آئی ءِ بلوچ ءِ بزگی ءُُ بلوچستان ءِ پدمنتگی ءِ جاوراں دنیا ءِ دیم ءَ آرگ ءُُ پدر ا کنگ ءِ سفر انگت ءَ برجاہ انت ۔اے وہد ءَ بلوچستان ایکسپریس پاکستان ءِ اولی روتاک انت کہ بلوچ ءِ نام ءَ زانگ بیت ءُُ آئی ءِ تہا بلوچ ءُُ بلوچستان ءِ جیڑہ دیم آرگ بنت ۔

اے وہد ءَ پاکستان ءِ کنڈ کنڈ ءَ صدیق بلوچ ءِ شاگرد موجود انت کہ آہانی بنداتی ھئیل کاری چہ بلوچستان ایکسپریس ءَ بوتگ ۔بلوچستان ایکسپریس ایوک ءَ احوالکاری ءِ پڑ ءَ ھیل کاریں ورنا ودی نہ کتگ بلکیں بلوچستان ءَ اے وہد ءَ اے وڑیں ورنا باز انت کہ آہاں بلوچستان ایکسپریس ءَ دو دو سے سے سال ءَ نشتگ ءُُ بلوچستان یونیورسٹی ءُُ بلوچستان ءِ ایندگہ وانگی ادارگاں ءُُ زانت ءُُ زانگ در برتگ کہ اے وہدءَ نہ ایوک ءَ احولکاری دنیا ءَ بلکیں دگہ پٹ ءُُ پڑاں ہم کارکنگان انت ۔

اے وہد ءَ صدیق بلوچ ءَ وتی واہگ ءِ پدا بلوچستان ایکسپریس ءِ کارگس ءِ ھاترا مزنیں ماڑی ماں کوئٹہ سریاب روڑ ءَ مک کتگ ءُُ آئی ءِ مستریں واہگ ایش انت کہ بلوچستان ایکسپریس ،روتاک آزادی ،ءُُ ہپتگی ساچینک یک الیکرانک چینلے ءِ دروشم ءَ دیم ءَ بیا اَنت۔