۱۷ اگست آدینگ ءِ شپ ءَ بی بی سی ءَ وتی یک حالے ءَ اے بیمناکیں ترس دیم ءَ آورتگ ات کہ ماں بلوچستان ءَ زردوہی نادراہی چہ کچ ءُُ کیاس ءِ حد ءُُ ابیلاں گوزان انت ۔بی بی سی ءَ اے حال عالمی گل ءِ یک سروے ءَ پد داتگ ۔

عالمی گل ءَ لوچستان ءِ لہتیں ہنداں (ڈسٹرکٹاں ) سروے کتگ کہ آئی ءِ تہا گشگ بوتگ کہ بلوچستان ءِ ہند نصیر آباد،سبی،صحبت پور،ڈیرہ بگٹی ،کوہلو ،بارکھان ءُُ ہرنائی ءِ مردمانی ۳۰ درسد بی ،سی ءُُ ڈی زردوہی ءِ آماچ انت ءُُ اگاں حکومت ءَ اے بابت ءَ گامگیج نہ زرت گڈا اے درسد گشادی ءَ دیم ءَ شت کنت ۔

عالمی گل ءِ سروے ءِ ردا اے دمگاں اے نادراہی اے حد ءَ شنگ ءُُ تالان نہ بوہگ ءِ سوب سلیں، لردیں ءُُ ناوشیں آپ انت بلئے ادا مستریں ترس ایش انت کہ اے ہندانی نام کہ عالمی گل ءِ سروے رپورٹ ءَ گرگ بوتگ انت اے دراہ ہما دمگ انت کہ اودا آپ چہ بلوچستان ءِ ایندگہ دمگاں گیشتر انت چوکہ خاران ،تربت ،گوادر ،پنجگور ،خصدار ،واشک ،ماشکیل ،نوشکی ،دالبندین،نوکنڈی،آوران ،مشکے ،ءُُ جھاؤ ۔

نوں اگاں اے ہنداں کہ آپ باز انت ءُُ مردم زردوہی آماچ انت گڈا آ ہندانی حال چے بیت کہ اودا آپ نگواہ ایت چو کہ اوتھل ،پسنی،جیونی ،گوادر ،تربت ءُُ آواران ءُُ ایندگہ ہلک ءُُ میتگ اگاں عالمی گل ءُُ ایندگہ ادارگ اے ہنداں سروے بکن انت گڑا شمے حیال ءَ زردوہی آماچیں مردمانی کساس چنچو بیت؟ ۔

2013 ءِ گچین کاریانی وہداں بلوچستان ءِ پیسریگیں مزن وزیر عبدالمالک بلوچ ءَ یکبرے گشتگ ات کہ بلوچستان ءِ مستریں جیڑھ زردوہی انت ۔ڈاکٹر مالک چوکہ دور چاریں رہشونے آئی ءَ ہما زمانگ ءَ زانتگ ات کہ زردوہی ءِ نادراہی پہ بلوچ ءَ چنچو نکس ءُُ تاوانی انت بلئے بژنی گپے کہ آ وہد ءَ گیشتریں مردماں اے گپ ءَ را ڈاکٹر مالک بلوچ ءِ جندی ( ذاتی) جیڑیے زرتگ ات بلکیں ہمے سوب ات کہ وہدے ڈاکٹر مالک کہ وت مزن وزیر بوت اے درگت ءَ آئی ءَ ہچ وڑیں دلگوش ندات اگاں گچین کاریانی وہد ءَ ڈاکٹر مالک ءِ اے گپ ءِ سرا سنگینیں مردماں دلگوش بدات انت گڑا بلکیں وتی مزن وزیری ءِ وہد ءَ اے بابت ءَ دلگوش گور بکت انت ۔

جان سلامتی ءِ بہرگ ءَ گوں سیادی داروکیں بازیں مردمانی گشگ ایش انت کہ عالمی گل ءِ اے رپورٹ ءِ حال ہما بنداتی انت کہ اودا یک حدے پہ ور گ ءَ آپ ہست بلئے اگاں عالمی گل ہما ہنداں سروے بکنت کہ اودا آپ ڈکال انت گڑاآ ہند ءُُ دمگاں زردوہی ءِ نادراہی چہ ۷۰ درسد ءَ گیش بیت چوکہ گوادر،تربت ،دشت ،تمپ،ناصر آباد ،آوران،مشکے ،جھاؤ ءُُ ایندگہ دمگ اے درچ ءَ چہ کیچ ءَ یک ڈاکٹرے ءِ گشگ ایش انت کہ کیچ ءِ 2007 ءِ ہار ءَ پد وھدیکہ بازیں مردماں وتی ہون ٹیسٹ کتگ انت آہانی تہا گیشتریں مردماں زردوہی اے ،بی ،سی نادراہی بوتگ ۔

اے ڈاکٹر ءِ گشگ ءِ رد ءَ اے نادراہی ہما دمگاں گشیتر بوتگ کہ اودا ہا میتگانی میتگ برتگ انت چوکہ ناصر آباد،نودز،شیکہن،سولبند،حیدآباد،چربک ،ہوت آباد ءُپُ ایندگہ ہلک ءُُ میتگ کہ میرانی ڈیم ءِ سوب ءَ ہار ءَ برتگ انت اے ڈاکٹر ءِ گشگ ءِ ردا اے میتگانی مردمانی اے نادراہی ہما وہد ءَ زانگ بوتگ انت کہ میرانی ڈیم ءِ آماچ بوہگ ءَ پد چہ بے روزگاری ءَ رکگ ءِ حاترا اشاں وتی دیم مزن ہور ءِ نیمگ ءَ داتگ چوکہ مزن ہور ءَ روگ ءِ حاترا ویزہ گرگ ءِ حاترا ہون ٹیسٹ ءِ چکاس زلوری بوتگ ۔

اے میتگانی ہرچ مردمے کہ پہ ٹیسٹ ءَ شتگ اے دراہانی ہون ءِ تہا زردوہی ءِ نادراہی ڈک ءُُ نشان بوتگ انت ۔ڈاکٹر ءِ گشگ ءِ ردا اے ہما مردم انت کہ ٹیسٹ ءَ شتگ انت ہما کہ ٹیسٹ ءَ نہ شتگ انت آہانی کچ ءُُ کیاس چنچو بیت ؟ 

پدا زردوہی ہنچیں نادراہی یے کہ چہ یکے ءَ دومی لگ ایت ءُُ پدا بلوچ میتگاں چشیں نادراہاں گرءُُ دار ءِ ہم بندوبستے نیست پمشکہ المی انت کہ اگاں لوگے ءَ یک مردمے ءَ زردوہی انت تا پدر انت کہ آئی ءِ سوب ءَ لوگ ءِ دگہ دومردم ءَ ہم زردوہی بیت بلئے چوکہ اے بابت ءَ حکومت کور ءُُ کر انت پمشکہ زانگ نہ بیت کہ اے میتگاں زردوہی ءِ نادراہی کچ ءُُ کساس چنچک انت ۔

وت ہمے ڈاکٹر ءِ جند ءِ گمان ءَ کیچ ءِ ہند ءَ اگاں سروے کنگ بہ بیت ہپتادناں گڑا پنجاہ درسد مردم زردوہی نادراہی ءِ آماچ بنت بلئے گپ ایش انت کہ سروے ءَ کے بکنت ؟ بلوچ ءُُ ناں وزیرے ءُُ ننکہ گزیرے ناں ڈاکٹرے ءُُ ننکہ تبیبے،ناں رہشونے ءُُ ننکہ گلّے۔۔۔