اے گپ چوناھا من ءَ ادا نبشتہ ءُُ گوْشگی نہ اِت اَنت کہ اے سر جمیں گپ من ءَ ماں ’’ وٹس آف ءُُ فیس بک‘‘ ءَ کنگی اِت اَنت بلے من اے نزاناں کہ اے منی بد بھتی اِنت یا وش ۔۔۔

کہ تنے وھدی من ءَ لگاشوکیں گوْانکو(Tuch Mobile)نیست ءُُ نیکہ وٹس آف ءُُ فیس بک ءُُ باریں دگہ ھمے وڑیں چے چے ھست ۔وھدے 30 جولائی 2017 ءِ روتاک آذادی ءِ بلوچی تاکدیم ’’ساچینک‘‘ ءَ منی چم بالاچ حمید نور ءِ ’’بچکند‘‘ ’’ من کجام دنیا ءَ بوتگ اَنت؟‘‘کپ اَنت کہ آئی ءَ گوْستگیں دور ءِ عشقی داستانانی سر ءَ گپ کتگ ءُُ آ انوگیں دور ءِ محبت ءُُ عشق ءَ گندایت۔آئی نبشتہ کتگ اَت کہ ’’اگاں مرچیگیں دور ءِ تہءَ ھما تیوگیں بلوچی داستانانی زالبول اگاں بیا اَنت ءُُ اے دور ءَ زندگی بکن اَنت گڑا چون بنت ؟چشکہ مہناز گوں شہداد ءَ ءُُ ھانی گوں شئے مرید۔۔۔۔۔‘‘

بالاچ حمید نور ءِ وانگ ءَ رند ھما دمان ءَ من ءَ منی یک سنگتے ءِے یک گْواچنی ئیں ھمے پیمیں گپءُُ کارے یات اتک کہ اے گپءُُ کارمنی گوْرا بوتگ اَنت۔ من ماں فٹبال گراؤنڈ ءَ نشتگ اِت آں کہ منی سنگتءَ منءَ ’’فون‘‘ کُت کہ کجائے؟من گوْشت کہ من پلاں جاہ ءَ آں ۔

گڑا ھما دمان ءَ اَتک۔ داں دیرءَ ما نِشت ایں گڑا منءَ گوْشت ءِے یار جنگیؔ تو پرچا پہ وتا ’’ٹچ موبائل ‘‘ ے نہ زُورئے ؟ ٹَچّے بزور پہ وتا ’’وٹس آف ءُُ فیس بکے‘‘ پَچ کن دنیا یے گندئے ،زندگی ءِ تہ ءَ کمو بدلی (changes ) بیار داں من ءَ ھوش کنت تئی موبائل ھمے کَلنڈ اِنت۔ گڑا من آئی ءَ را پسّہ دات کہ ھمے پَمّن شَرّ اِنت وٹس آف ءُُ فیس بک ءِ تہ ءَ چے سِیت ءُُ نَپ ھست ؟منءَ گوْشت ئے کہ تو ڈے چے گوْشگ ءَ ئے۔

کمو سَبر، ھما دمان ءَ یکے ءَ را ’’فون‘‘ ءِے کُت ۔’’فون‘‘ ءَ را اسپیکرے کُت گوں فون ءِ زورگءَ داں جنکے ءَ گوْشت ’’ھلو جانو !ھال کن باریں من ترا دوست بُوت آں یا اِنّا ؟زالم تو پرچا منءَ کِس(kiss) نہ کُت، توپرچا منی گوْر دست نہ جَت اَنت،تو پرچا مہلہ شُت ئے من گوْشت مرچی الّم من ءُُ تو۔۔۔۔۔۔بُگش جانو !من ترا دوست بوت آں نا؟ ۔ 

ھان تو منءَ دوست بوت ئے ۔جانو بس من زندگی ءِ تہءَ دگہ ھچ نہ لوٹ آں ،تہنا ترا لوٹ آں تو ھرچی لوٹ ئے ءُُ ھرچی کنئے من ھما کن آں پرچا کہ تومنی ءُُ من تئی زالم تو گوں اے گُداں چوں وش براھدت ،گوں ھمے گُداں وتی اَکسے (فوٹو)’’وٹس آف‘‘ کن دیم بدئے ‘‘ آئی ہنچیں دگہ بازیں گَپ کُت کہ آگپانی گوْشگ ءُُ نبشتہ کنگ ۔۔۔

گوں اے گپانی اِشکُنگ ءَ من پہک ھیران ءُُ تکانسر بُوت آں۔من چہ آئی دست ءَ ’’فون‘‘ چَپ چِت ءُُ بند کُت۔من وتی سنگتءَ را گوْشت ڈے ترا ’’لعنت ‘‘ اِنت ،تو سکّیں سِلّین ءُُ بے کاریں مردمے ئے ،اگاں ’’وٹس آفءُُ فیس بک ‘‘ ءِ ھال ایش انت ،زندگی ءِ بدلی (changes )ایش اِنت گڑا ھُدا منی نسیبءَ مہ کنت ۔منءَ گوْشت ءِے اے منی اولی دیدار بُوتگ(ملاقات) ۔

’’فیس بک ءُُ وٹس آف‘‘ءِ سرا منی دوست بُوتگ ،منی اَکسے ’’فیس بک‘‘ءَ دیستگ گڑا منی (Friend ) بوتگ مرچی من ’’ملاقات‘‘ ءَ شُتگ آں ،بلے منءَ ھچ دوست نہ بُوت ،آئی وس کُت کہ منءَ کِس(kiss) بکن ۔۔۔۔۔۔بلے منءَ ھچ دوست نہ بُوت کلام دُور بہ بارت ایشی ءَ ، من گوْشتگ بلکیں سکّ ءَ وشینے ۔


من وتی سنگتءَ را گوْشت گڑا چی ءَ دگرءِ زندگی ءَ ھراب کنئے۔منءَ گوْشت ئےِ من بس تہنا ’’ٹائم پاس‘‘ کن آں۔ سبر من انوں دگہ جِنکے ءَ را ’’میسج‘‘ کن آں ۔’’ ھان زنڈؔ و !ھال کن چے کنگ ءَ ئے؟‘‘ ھما دمان ءَ میسج ءِ پسّہ اَتک ’’پُلّ من ھچ کنگءَ نیاں ،تہنا تئی یات ءَ آں کہ تو باریں کدی پہ سانگ ءَ وتی مات ءُُ مردماں دیم دئے‘‘۔’’زنڈو ! من بس وتی مردماں دیم دیاں ‘‘۔

من وتی سنگتءَ را گوْشت بچار نوں وتی کاراں ۔اے جنک بیچارگ چنکس تئی سرا بروسہ کنگءَ اَنتءُُ تو ایشانی زندگی ءَ تہنا زھگی لیبو یے پہم ئے۔من ترا گَپّے گوْش آں ،تو مرچی سوگند ءَ وَر کہ تو اے جنکانی زندگی ءَ گوں لیب ءَ ئے ،تو گوں یکے ءَ سُور کنگ لوٹ ئے؟ ۔ پسّہ ءِے دات پَمّن کلام اِنت کہ من گوں یکے ءَ سُور بکن آں من بابا تہنا ’’ٹائم پاس‘‘ کنگءَ آں جنک ’’بیوقوف‘‘ اَنت ھا ھاھا۔

منءَ انگت باز وانگی اِنت۔من انوں سانگءِ پِگر ءَ نہ دار آں ،سُور وتی جاہ اِنت۔من آئی ءَ را بازیں پنت ءُُ سکین دات کہ کَسّی زندگی ءَ چو برباد مہ کن اِت۔ بالاچ حمید نور راست نبشتہ کُتگ اگاں آ زمانگ ءِ عشق کنوک اے دور ءِ تہ ءَ بوتین اَنت گڑا چون بوت اَنت؟ ۔اگاں آ زمانگ ءَ عشق بُوتگ گڑا آیانی دروگیں عشق نہ بوتگ اَنت ،ٹائم پاس نہ بوتگ اَنت،دلوتی عشق نہ بوتگ اَنت۔

آیانی عشق پہک ءُُ سلّہیں عشق بُوتگ اَنت ،گوْاچنی ئیں عشق بوتگ اَنت،آیاں تہنا گوں یکے ءَ پہکیں عشق ءُُ محبت کُتگ، چو مرچیگیں دور ءِ عشق ءُُ محبت ءَ نہ بوتگ اَنت، وٹس آف ءُُ فیس بک ءِ عشق نہ بوتگ اَنت۔اگاں ھانی ؔ ءَ گوں شئے مریدؔ ءَ عشق اَت گڑا ھانی ءَ چاکر ءَ را گوْشت ’’تئی سُہر ءُُ تلاہ منءَ چو گوْبزءَ دَج اَنت‘‘ شئے مریدءَ وتی ھپتاد ءُُ ھپت بندءُُ بوگ داگ نہ دات۔

آیانی عشق پہکین ءُُ گوْاچنی بوتگ انت۔مرچی محبت ،عشق وٹس آف ءُُ فیس بک ءَ انچو لیلام کُتگ ، یک بچکےءَ را بیست،بیست ،سی سی دوست بزاں محبت ھست ،محبت چو ٹماٹر ءُُ پیماز ءِ ریٹ ءَ اِنت،برے برے کہ اے لیلام ءُُ سَستا بنت گڑا ھمک مردمءَ بچار لوڑاَنت بیست بیست ،سی سی سیر گِر اَنت لوگءَ ایئر کن اَنت۔مرچی بچک گوں جنکاں ھمے پیم کنگءَ اَنت۔وٹس آف ءُُ فیس بک،جنک ءُُ بچکاں پہک محبت لیلام کُتگ۔

برے برے نودربر کہ سائنس ءِ سرا گپ کن اَنت گڑا ھمے گوْش اَنت کہ سائنس ءَ زندءِ گوازینگ ءِ ھاترا بازیں آسراتی آؤرتگ ۔گڑا من ھمے ھیال کن آں کہ آسراتی اگاں ایش اِنت گڑا تبائی ءُُ بربادی کجام اِنت۔باریں اے نوکیں سائنسی دور دگہ چنکس جنک چُک ءِ زندگی ءَ برباد کنت، دگہ چنکس نودربریں بچک برباد بیت کہ آیاں وتی پہکیں مول ءُُ مراد بزاں آیاں وتی نودربری ءِ ’’مقصد‘‘ یلہ کُتگ ءُُ وتی زندءِ مول ءُُ مراد تہنا ’’وٹس آف ءُُ فیس بک‘‘ جوڑ کُتگ ءُُ پہم اِتگ ۔

ھمے وٹس آف ءُُ فیس بک ءِ سرا منءَ بازیں گپّ ھست ءُُ کنگی اِنت۔اگاں موہ رست انشاء اللہ واری واری ءِ سرا گپاں دیمءَ کاراں ،من نہ زان آں باریں چُشیں گپانی دیمءَ آرگ لبزانک ءِ بہر گوْشگ بنت یا اِنّا، چیاکہ من وت لبزانک ءِ ناسرجمیں نودربرے آں۔