بلوچی اکیڈمی ءِ یک ڈلے ۲۲ اگست ۲۰۱۷ ءَ واجہ حاجی لشکری رئیسانی ءِ گس ءَ گند ءُُ نندی مجلسے کتگ ات ۔اے گند ءُُ نند ءِ مول ءُُ مراد سرجم ءَ لبزانکی یے اَت۔ گندءُُ نند ی ٹولی ءَ بلوچی اکیڈمی ءِ کارمستر واجہ ممتاز یوسف،نائب کارمستر سنگت رفیق ،کارگشاد شکور زاہد،شنگکاری کارگشاد ہیبتان عمر، اکیڈمی باسک پروفیسر یوسف مینگل بلوچ، ءُُ ایم فل اسکالر بالاچ حمید ہوار اِت انت ۔

 
بلوچی اکیڈمی ءِ مول پہ اکیڈمی ءَ چیزے کتابانی پکاری اَت کہ حاجی لشکری رئیسانی ءَ پہ واہگے دئیگ ءِ جار جتگ اَت۔آئی ءِ گشگ اَت کہ اے جاوراں پہ بلوچ قوم ءَ وانگ ءُُ زانگ المی اِنت آئی ءِ گشگ اَت کہ آئی ءَ چد ءُُ پیسر تربت یونیورسٹی ءِ وی سی ءِ گشگ ءِ پدا کتاب راہی کتگ ءُُ ہمے ھساب ءَ گچین ہنداں آئیءَ وتی لائبریری ءَ چہ بازیں کتابے بکشاتگ دانکہ وانگءُُ زانگ ءِ دیمروئی یے بہ بیت ۔

اے درگت ءَ بلوچی اکیڈمی ءِ کارمستر ممتاز یوسف ءَ بلوچی اکیڈمی ءِ چاپ بوتگیں کتابانی سوگاتے پہ حاجی لشکری رئیسانی ءَ دات۔اے درگت ءَ واجہ سنگت رفیق ءَ گشت کہ بلوچی اکیڈمی ءَ وتی نوکیں کارے بندات کتگ کہ درائیں ہنداں اکیڈمی ءِ چاپ بوتگیں کتاب سر بہ بنت دانکہ گیش ءَ چہ گیش بلوچ قوم چہ وتی جند ءِ لبزانک ءَ چہ آشنا ءُُ سرپد بہ بیت۔حاجی لشکری ءَ سدکی داتگ اَت کہ آپرے کار ءَ ہر وڑیں کمک ءُُ مدت ءَ ساڑی اِنت۔ 

حاجی لشکری رئیسانی گشت کہ آ چہ حج ءَ پد کیت ءُُ بلوچی اکیڈمی ریفرنس لائیری ءِ حاترا کتاب سوگات کنت۔