1965 ءُُ1971 ءَ پد یکبرے پدا امریکہ ءَ اے شگان جنگ بوہگان انت کہ آ پاکستان ءَ مدام وتی مول ءُُ منّاں کارمرز کنت ءُُ چوکاشی ءَ شود ایت ءُُ کرز بنداں مان جنت اے نوکیں تران پاکستان ءِ رسانک در ءَ ۲۲ اگست امریکہ ءِ کماش ڈونلڈٹرمپ ءِ کیمپ ڈیوڈ ءَ گوں وتی کابینہ ءَ سلاہ ءُُ سوجاں پد آئی ءِ ’’دری پالیسی ‘‘ھال تران ءَ پد شنگ ءُُ تالان انت ۔

امریکہ ءِ کماش ءِ اے’’ دری پالیسی ‘‘حال تران ہما وہد ءَ دیم ءَ اتکگ کہ افغانستان ءِ کماش اشرف غنی ءَ گوں پاکستان ءِ واکداراں گند ءُُ نند ءَ مکن کتگ ءُُ دومی دست ءَ پانامہ لیکس ءِ جاک ءُُ سلواتاں پد ملک ءِ سروزیر نواز شریف سپریم کورٹ ءِ فرمان ءَ پد درکنگ بوتگ ۔یکے وَ اے اولی وارانت کہ افغانستان ءُُ ایران ءِ سیادی گوں پاکستان ءَ نہ وش انت دومی نواز شریف ءِ ملک ءِ ادارگانی سرا شک ودی کنگ ءِ جنز ءُُ سیمی ڈونلڈ ٹرمپ ءِ پاکستان ءِ بابت ءَ دری پالیسی حال تران ۔

اے جاور حال پہ پاکستانی راج ءَ نہ وش ءُُ نگیگ انت ۔ڈونلڈ ٹرمپءَ کیمپ ڈیوڈءَ گوں وتی واکداراں سر ءُُ سوج ءَ پد وتی دری کارہبند ھال تران ءِ جار جتگ ءُُ اے درگت ءَ ٹرمپ بند ءُُ بوجی کارداراں سے گپ دیم ءَ آورتگ (۱) ٹرمپ ءَ وتی تران ءَ گشتگ کہ امریکہ چہ افغانستان درآہگ لوٹ ایت بلئے گوں عزت ءُُ شرپ ءَ ،آئی ءَ گشتگ کہ امریکہ چہ عراق درآہگءِ بن دپترءَ سہی ءُُ سرپد انت کہ اودے بے موسمیں دراہگ ءَ امریکہ ءِ دشمن محکم ءُُ ساکم کتگ انت پمشکہ امریکہ نہ لوٹ ایت کہ افغانستان ہنچو پہ دیم دربئیت ءُُ افغانستان داعش ءُُ القاعدہ ءِ بنزیاہ جوڑ بہ بیت۔

(۲) آئی ءَ گشتگ کہ اے وہد ءَ افغانستان ءَ ۲۰ ءِ کساس ءَ ناشریں گل کار ءَ انت ءُُ دنیا ءِ ہچ دمگ ءَ ہنچو ناشریں گل نیست کہ افغانستان ءُُ آئی ءِ کش ءُُ گورا است ۔دومی آئی ءَ گشتگ کہ مارا پاکستان ءَ ہم چارگی انت پرچکہ پاکستان ناشر ،بیش کار ءُُ ترند تبیں مردمانی بہشت انت ۔(۳) آئی ءَ گشتگ کہ پاکستان ءِ بازیں جیڑھ گوں افغانستان ءَ ابید بھارت ءَ است انت وہدیکہ بھارت ءُُ پاکستان دو نیوکلیر ملک انت پمشکہ زرباری ایشیاءَ نیوکلیر جنگ ءِ ترس ہم است انت کہ پریشیا امریکہ سک تکانسر انت ۔

اے سئییں گپاں ہوار ٹرمپ ءَ اے گپ ہم وتی حال تران ءَ جتگ کہ امریکہ ءِ بدواہ امریکہ ءِ کیمپ ڈیوڈ ءَ بوتگیں ( پلان) کار رہبند ءَ زانگ لوٹ انت کہ امریکہ زرباری ایشیا ءَ چے کنگ لوٹ ایت آئی ءَ گشتگ بلئے امریکہ ءِ بدواہ بہہ نزان انت کہ امریکہ ءِ کیمپ ڈیوڈ ءَ چے سوڈگ کتگ ،آئی ءِ گشگ ءِ روا امریکہ ءِ بدواہ ہمے ودار ءَ بنت کہ کدی آ امریکہ ءِ اے سوڈگ ءَ سہی ءُُ سرپد بہ بنت بلئے آہانی سرپد بوہگ ءَ ساری امریکہ ارش کنت ۔

نوں پاکستانی واکدار بائدیں اے بابت ءَ پگر ءُُ سسا بکن انت کہ امریکہ ءِ بے ہوشیں کماش چے گشگ لوٹ ایت کہ امریکہ ماں زرباری ایشیا ءَ کجام ملک ءِ سرا ارش کنگ ءَ دلمانگ ا نتاے بابت ءَ بازیں شہ زانتانی گشگ ایش انت کہ امریکہ ءِ اشارہ ءُُ نشانگ ایران انت ۔

اسل ءَ امریکہ دلمانگ انت کہ ایران ءَ بجنت بلئے ادا اے گپ دیم ءَ کیت کہ ا یران ءِ ہچ وڑیں سیادی یے گوں زرباری ایشیا ءَ نیست ،پدا افغانستان ءِ حکومت ءَ ہچبر ہچ وڑیں بہتامے ایران ءَ نہ جتگ کہ ایران افغانستان ءِ تہی کارانی تہا دزمانجنی کنت بلئے اگاں شہ زانتانی اے گپ راست بہ بیت گڈا پاکستانی راج ءَ تکانسر بوہگ ءِ زلورت نہ انت بلئے اگاں امریکہ ءِ اشارہ بھارت ءُُ افغانستان ءِ پشدر ءَ گوں پاکستانی راج ءَ انت گڈا اے پہ پاکستانی راج ءَ سکیں نہ وشیں گپے ۔

بائدیں پاکستانی راج بے ہوشیں ٹرمپ ءِ اے گپانی سرا پگر ءُُ سسا بکنت ءُُ امریکہ ءِ دیم ءَ دارگ ءِ ھاترا توجیلے بکنت پرچکہ نواز شریف ءِ حکومت ءِ آہگ ءَ پد حکومت ءَ دری کارانی بابت ءَ سنگینیں جہد ءُُ کوشتے نہ کتگ پمشکہ دری دنیا ءَ بھارت ءُُ افغانستان چہ پاکستان ءَ گیش بوتگ انت

ءُُ اے درگت ءَ امریکہ ءِ کماش ڈونلڈ ٹرمپ ءِ گوش جوانی ءَ پرکنگ بوتگ انت ادا اے گپ ہم گیر آرگی انت کہ ڈونلڈ ٹرمپ ءِ گشگ ءِ رد ا اے سوڈگ ماں کیمپ ڈیوڈ ءَ زورگ بوتگ ءُُ کیمپ ڈیوڈ ءِ بن دپتر پہ دنیا ءَ جوان نہ بوتگ چوکہ فلسطین ءِ سوڈگ ،عراق ءُُ افغانستان ءِ سرا ارش ءِ سوڈگ۔افغانستان ءِ سرا ارش ءَ پد کیمپ ڈیوڈ ءِ دومی سوڈگ ہمیش انت ۔