راولپنڈی: عوامی مسلم لیگ کے سربراہ شیخ رشید نے عیدالاضحیٰ پر قربانی کے لئے دو اونٹ خریدے ہیں۔

پورے ملک میں عیدالاضحٰی کی تیاریاں عروج پر ہیں اور عوام کی بیشتر تعداد مویشی منڈیوں میں اپنی پسند کے جانور خریدے میں مصروف ہیں عوام کی طرح سیاستدان بھی سنت ابراھیمی کی ادائیگی کے لئے مویشی منڈیوں میں نظر آرہے ہیں۔

عوامی مسلم لیگ کے سربراہ شیخ رشید بھی جب راولپنڈی کی مویشی منڈی میں پہنچے تو نوجوانوں کی بڑی تعداد خریداری چھوڑ کر شیخ رشید کے ساتھ سیلفیاں بنانے میں مشغول ہوگئے۔ شیخ رشید نے اونٹ خریدنے کے لئے مالکان سے بھاؤ تاؤ کیا اور کہا کہ اچھے اونٹ دو اور پیسے بھی جائز لو۔  سودا طے ہونے کے بعد ایکسپریس نیوز کے رپورٹر کے سوال پر شیخ رشید کا کہنا تھا کہ اللہ کی راہ میں قربانی دینی ہے جس کے لئے 2 اونٹ خریدے لیکن یہ نہیں بتا سکتا کہ یہ اونٹ کس قیمت میں لئے۔