دنیا ءِ بازیں نامداریں مردمانی وڑے نا وڑے ءَ سیادی گوں بلوچستان ءَ بیت۔ڈاکٹر رُتھ فاؤ ءِ وڑیں نامداریں ءِ زالبولےءِ ہمگرنچی گوں بلوچستان ءَ بلوچستانی آں زیات اَت۔اے زال ءَ من چہ ءَ نزیکی دیستگ اَت،یک ءُ دو وار گوں آئی ءَ گپ ءُ تران ہم بوتگ،پرچیکہ منی جندءِ بچک عبدالحمید شاہ گوں آئی ءَ بلوچستان ءِ تہا’کوڑھ‘ءِ نادرآھی ءِ ھلاپ کارکرتگ اَت۔ پاکیں حُداءَ آئی ءَ را انچیں دلے داتگ اَت کہ پمگءَ چہ زیات نرم اَت۔ 

نا دراھیں مردماں گوں دوچار کپگ ءَ آئی ءَ را ر وحانی ایں آسراتی ءِ رست گڑا آئی ھوش ءُ ھیال مدام گوں ہما مردماں بندوک اَت۔بلوچستان ءِ بازیں ہندءُ دمگاں مہلوک کوڑھ ءِ نادراھی ءِ آماچ ات اَنت۔اِے نادراھی ءِ تہا دستانی لنکُک ورگ بنت ءُ مردم منڈ بنت ءُ لنگ جنان ءَ گردیت۔(اے نادراھی ءَ بلوچستان ءِ بازیں ہند ءُ دمگاں پُوڑ ہم گشگ بیت)۔

اِے ڈولیں نادرائیں مردمے کِر ءَ کس نہ شت تْرس ہمیش اَت کہ آ ہمے نادراھی ءِ آماچ مہ بیت۔بازیں مردماں وتی اے ڈولیں نادراھیں مردم ءَ چہ میتگ ءَ دور کوہانی تہا دوُر دات انت ۔

آئی سبب ایش اَت کہ دومی مردماں چہ اے نادراھی ءَ رکھینگ بہ بنت۔بلے چہ جرمنی ءَ آوکیں اِے زالبول ہمے نادراھی ءِ آماچیں مردماں چو گنوک ءِ وڑءَ شوہازیت پہ دارو درمان کنگا انت ۔اِے نادراھی ءَ’’ جذام‘‘ ہم گُشگ بیت۔ڈاکٹر رُتھ فاؤ چہ جرمنی ءَ انڈیا ءِ نادراھیں مردمانی دارو درمان کنگ ءَ پہ در کپتگ اَت۔بلے آرا ویزا نہ رست۔

گڑا آ لہتں روچ پاکستان ءَ گوازینت کہ تنا وھد ءَ آرا ویزا بہ رسیت۔ہمے نیام ءَ آئی پجاروکیں مردماں آرا کراچی ملیر ءَ برتنت۔اودا آ بے وس ءُ نیزگاریں نادراھیں مردماں دیست گڑا ہمے پیسلہ کرت کہ آ نوں انڈیا ءَ نہ روت بلکنا ہمدامہلوکاں دارو درمان ءُ آھانی ھیالداری ءِ کار ءَ کنت۔آ دیست کہ مہلوکانی تہا ٹی بی ءُ کوڑھ ءِ نادراھی زیات اَت۔

بس ہمے نامداریں زالبول ءَ وتی شپ ءُ روچ ہمے نادرھانی دارو درمانءُ روحانی علاج ءَ دزگٹ بوت۔کوئٹہ،خضدار،تربت ءُ لورالائی ءَ سینٹر پچ کنائینت۔ابید چہ ایشی ملک ءِ ھر نیمگ ءَ آئی ءَ را کوڑھ ءِ آماچیں نادرائے ھال بہ رستیں آ وتارا ہمودا سر کُرت۔کوہ ءُ دشت دمگ دمگاں کیمپ جتے۔بازیں رند ءَ ھار ،مار ءُ ایندگہ سکی سوریانی تہا گَٹ ہم بوتگ۔ 

اِے سکیءُ سورہاں ابیدآ ھچ وھد ہم پد نہ کنیز یت ءُُ آ وتی ھذمت ءِ کار ءَ ھر وڑیں جاورحال ءِ تہا بے مول برجاہ داشت۔آئی ءَ را پاکستان ءِ تہا کار کنگ ءَ ۵۷ سال بوتگ۔ڈاکٹر رُتھ فاؤ لہتیں وہدنادراھی ءَ گوازینت ءُ ۸۶ سال ءِ عمر ءَ زندءَ گوں آئی ہمراہ داری نہ کت ءُ اے دنیا ءَ یلہ دات ءُ شت۔بلوچستان ءِ تہا ڈاکٹر رُتھ فاؤءَ آئی کار ءُ ھذمتانی رد ءَ کسَءَ یات نہ کرتگ ۔


نہ کہ حکومت ءَ بوڈے وارتے ءُ نہ کہ رسانکدار را کہ آئی ءِ بلوچستان ءَ تہا کرتگیں ھذمتانی رد ءَ یات کنگ بوتگ۔پدا ھم انچو خواری اے زالبول ءَ کشتگ کہ کس ءِ حقی ایں ماتءَ ہم انچو نہ کرتگ۔

اگہ حقی ایں سیال انچو شر بوتینت گڑا آ وتی کوڑھ ءِ نادراھیں مردمان کوہانی تہا بے سروسامان ناہارانی نیام ءَ نہ اشت انت۔مئے حال ایش انت کہ سریاب ءِ تہا ایل ار بی ٹی، جرمن ءِ کمک ءَ چمانی نادارھجاہءِ جوڑ اِنت۔وہدیکہ بلوچستان ءِ جاورحال ھراب بوتنت گڑا درستان ساری ایشی ڈاکٹراں (دھمکی)رست،اے نادارھجاہءِ ھشت کاری کنگ بوت۔

انچیں وہدے اتک کہ اے نادارھجاہءَ اداچہ بدل کنگ ءُ دگہ ہندے برگ ءِ سوج ءُ سلا کنگ بنا بوت ۔شاباش انت ہما لہتیں ورناہاں کہ آہاں ہما وہد ءَ اِے نادارھجاہءِ بستارءِ سما کپت آ روتکانی تہا توار چست کرتنت ۔

گڑامئے سیاستداناںءَ ہم بوڈے وارتے آ ہم وتی توار ءَ چست کرتنت۔باید وہمیش اِنت کہ اے نادارھجاہ ءِ وارثی ءَ مئے ہما کماش بکن اَنت کہ آہاں بلوچستان ءِ مہلوکانی بے مول ھذمت کرتگ اَنت کہ ایش پہ آہاں یک یاتگارے جوڑ بہ بیت۔ڈاکٹر رتھ فاؤ اے ردا لکھ وار ستاکرزیت کہ آئی ءَ را یات کنگ بہ بیت ءُ آئی بلوچستان ءِ تہا کرتگیںھذمتاں ءَ ہم یات کنگ بہ بیت۔