نصیر کبدانی لبزانکی دیوان ءِ چیردستی ءَ دیمدارئی مراگشے ماں گل ءِ کارگس ءَ گل ءِ کارمستر ءِ پاگواجہی ءَ جم دارگ بوت کہ آئی تہا نصیر کبدانی لبزانکی دیوان ءِ باسکاں ابید راہشون لبزانکی چاگرد ءِ باسک ،نودربر،انجمن تاجران ءُُ احوالکاراں ءُُ شاعراں بہر زرتگ ات ۔

مراگش ءِ حاصیں مہمان احمد عبداللہ ات ءُُ جارچین ارمان آزگ ات ۔اے مراگش دو بہر ءَ جم داگ بوت کہ اولی بہر ءَ مسرور شاد ءِ کتاب ’’ مرادانی بام‘‘ ءِ دیمدارہی بوت ءَ گشتانگ دھوکاں دیوان ءِ دیم ءَ وتی حیال درشان کرتگ انت دومی بہر ءَ یک شعری دیوانے بوت کہ آئی تہا ساڑی ایں شاعراں وتی وتی شعر ونت انت ۔

دیوان ءِ بدنات ارمان آزگ ءَ آوکیں مہماناں ءَ گوں وش اتک ءَ کرت ءُُ مسرور شاد ءِ رجانک کرتگیں کتا ءِ بابت ءَ دیوان ءَ راسرپدی دیان ءَ گشت کہ اے کتاب روس ءِ نامداریں گدار نبیس ایوان ترگنگ ءِ نامداریں گدار انت کہ ۱۸۶۰ ءَ چاپ ءُُ شنگ بوتگ کہ اردو ءَ خدیجہ عظیم ءَ ’’ سحر ہونے تک ‘‘ ءِ نام ءَ رجانک کرتگ ات انوں مسرور شاد ءَ مرادانی بام ءِ نام ءَ بلوچی زبان ءَ رجانک کرت کہ شہ سنگت اکیڈمی آف سائنسز کوٹیہ ءِ نیمگ ءَ چاپ ءُُ شنگ بوتگ ۔

آئی مسرو شاد ءِ لبزانکی بالاد ءِ سرا چمشانک دیان ءَ گشت کہ مسروشاد ءِ کرد پہ خاران ءِ نوک باہندیں ورناہاں نوکیں تب ءُُ مئیل ءِ سکینے ۔ثنا سیاپاد ءَ تران کنان ءَ گشت مسرور شاد خاران ءِ اولی زبان دوستیں لبزانکت کہ آئیءَ ایوان ترگنیگ ءِ گدار بلوچی زبان ءَ ترینتگ ۔

رجانکاری پہ زبان ءُُ لبزانک ءَ مزنں ارزشتے داریت چیاکہ شہ رجانک کاری ءَ یک راجے ءِ تب ءُُ زانش دود ءُُ ربیدگ ءُُ چاگردی چست ءُُ ایراں دومی راج ءَ سرپدی رسیت ہمے وا وتی جندئے پٹ ءُُ پول ،راجدپتر ءُُ ساچشتاں دومی راج ءُُ زباناں سرکنگ ءِ وسیکہ رجانک انت مسرور شاد ءِ جہد پہ خاران ءِ نودربر ءُُ زبان دوستیں سنگتاں یک نوکیں سکینے امیت ہمیش انت کہ شاد ءِ پد گیری ءِ جہد ءَ ایدگہ ورنا ہم کن انت ۔

مراگش ءَ واجہ احمد عبداللہ ءَ وتی حیال درشان کنان ءَ گشت کہ مسرور شاد ءِ استاد ءِ جہت ءَ من ءَ مروچی سک باز وشی بوہگ ءَ انت ءُُ من پہر بندیں کہ یک پدمنگیں کوچگے ءِ مئے نودربر مروچاں لبزانکی ءُُ علمی چست ءُپ ایراں گوں ہمگرنچ انت ۔

رہشون لبزانکی چاگرد ءِ کارمستر شمیم شاجی ءَ کتاب ءِ سرا چمشانک دیان ءَ گشت کہ مسرور شاد ءَ وتی رجانک کار ءِ تہا رخشانی گالور ءِ رواج دئیگ ءِ جہد کرتگ کہ اے یک جوانیں گامگیجے شہ مسرور ءِ جہد ء ءُُ کمٹمٹ ءَ مردم ءَ انچو گمان بیت کہ اے آئی ءِ اولی رجانک نہ انت آئی جہد کرتگ کہ گوں پگر ءَ ہوار ازم کاری ءَ ہم بلوچی ءَ بہ ترینت آئیءَ بازیں اردو لبزے بلوچی ءِ رنگ داتگ ءُُ آیان ءَ بلوچی زبان ءِ بہر جوڑ کرتگ ۔

ایف جے فیضی ءَ مسرور شاد ءِ رجانک کرتگیں کتاب ءِ سرا تران کنان ءَ گشت کہ گوں مسرور ءَ ہوار سنگت اکیڈمی آف سائنسز ہم مبارک بات ءِ حق دار انت کہ آ نامداریں کتاباں بلوچی ءَ ترینگ ءِ جہد کنگ ءَ انت ۔

شہ اے جہدءَ بلوچی زبان ءَ لبزانک سک باز دیمروئی کنت ءُُ نپ زوریت ۔آئی ءَ گشت کہ اے گدار شہ سے زبان ءَ گوزان بلوچی ءَ سربوتگ پمیشا ازمی نزوری ڈالچار کنگ بنت بلئے مسرور شاد ءَ گوں رجانک ءَ جوانیں وڑے انساپ کرتگ ۔

نصیر کبدانی لبزانکی دیوان ءَ اے کتاب ءِ دیمداری مراگش ءِ جم دارگ ءَ مسرور شاد ءِ جہد ءَ بودشت ساڑ اِتگ ۔ڈاکٹر عبدالغنی ساسولی ءَ مسرور شاد ءَ مرادانی بام ءِ مراد بات دیان ءَ گشت کہ اے کتاب ءِ چاپ ءُُ شنگ ءَ اینکس وشی کہ من ءَ بوتگ بلئے منی گوما اینکس لبزنیست کہ من وتی مارشتاں درشان بہ کنیں ۔

پریس کلب خاران ءِ کارمستر سفر خان راسکوئی ءَ نصیر کبدانی لبزانکی دیوان ءَ را سوبمندیں مراگش ءِ اڈدیگ ءَ مراد بات دیان ءَ گشت ہما کہ خاران ءِ تہا لبزانکی گلاں جہد ءُُ کوشت بنا کرتگ خاران ءِ تہا لبزانکی کار ءَ کردانی تہا نوک نوکیں سرپد گندگ بیگ ءَ انت آئی دزبندی کنان ءَ گشت لبزانکی گل وتی جہد ءَ دیمی بران ءَ تاک ءُُ ماہتاک ءِ چاپ ءُُ شنگ کنگ ءِ جہد بہ کن انت تاکہ نوک باہندیں ورناہاں نبسیگ ءِ پلیٹ فارم بہ رسیت ءُُ ایانی دلبڈی بہ بیت ۔

مسرور شاد ءَ دیوان ءِ منت گپ ءُُ گشت من اے درگت ءَ بس ہمنکس گشاں کہ بیست ءُُ یکمی کرن ءَ یک کتابے ءِ ساچگ یا رجانک کنگ بلائیں جیڑہ ءِ نہ انت بلکیں یک ہذمتے کہ من وتی بستار ءِ کسا ءَ کرتگ ایشی ساڑاہگ شمئے وتی زبان دوستی ءِ گواچنی انت کہ من ءَ شرپ بکش انتگ ءُُ دیمتر ءَ جہد ءِ سکین ءُُ دلبڈی داتگ گڈسر ءَ آئی گشت منی اے کسانیں جہد ءَ شمارا سرکنگ ءِ مزنیں کرد سنگت اکیڈمی آف سائنسز ائیگ انت ۔

گڈسر ءَ نصیر کبدانی لبزانکی دیوان ءِ کارمستر مومن مزار ءَ مہمانانی منت گپت ءُُ درائینت اے پیر ءِ گپے کہ نصیر کبدانی لبزانکی دیوان ءِ باسک علمی جہد ءَ گوں ہمگرنچ انت ۔مرچیگیں اے پر مہریں دیوان ہمے گواچنی ءَ دنت کہ نصیر کبدانی لبزانکی دیوان ارچ وڑیں علمی ءُُ لبزانکی کرد ءِ دلبڈی ءَ کمک ءَ کنت

گشتانک دھوکانی گشتانک ءُُ چمشانکاں پد ارمان آزگ ءَ گوں تلو ءِ سر ءِ نندوکیں واجہاں کتاب ءِ دیمداہی ءِ دزبندی کرت وہدے درستاں کتاب ءِ دیمدارئی ءِ واستہ کتاب دست ءَ کرت انت گڑا حال شہ چاپانی توار ءَ آزمان ءَ رست ہمے وڑا مراگشے اولی بہر آسر بوت ءُُ دومی بہر شاعرانی شعراں گوں سمبہینگ بوتگ اَت کہ ایشانی تہا مومن مزار، شمیم شاجی ،مسرور شاد، انورالحق، غنی حسرت ،ثنا سیاپاد، لیاقت علی ،غنی ساسولی ، حافظ رازق،علی بلوچ ءُُ ایدگہ شاعراں وتی وتی شعر ونت ءُُ شہ دیوان ءَ داد گپت ۔