گوستیگں روچاں بنجاہی حکومت ءِ کابینہ ءَ ملک ءَ کوٹہ سسٹم ءِ سرا چارو بچار ءِ کنگ سوڈگ کتگ ۔اے دیوان ءَ فیصلہ کنگ بوتگ کہ کوٹہ سسٹم ءِ تک ءُُ پہناتاں گیش ءُُ گہوار کنگ ءِ حاترا اے جیڑہ ءَ را سی سی آئی ءَ دیم دئیگ بہ بیت پرچکہ کونسل آف کامن انٹرسٹ ( cci) ءُُ درائیں صوبہ ءُُ راجانی جہگیر موجود ءُُ ساڑی انت پمیشکہ کوٹہ سسٹم ءِ سرا اودا شرتر یں وڑے گپ ءُُ تران بوت کنت ۔

کوٹہ سسٹم ءَ ۱۹۷۳ ءَ اے حاترا گچین کنگ بوتگ ات تنکہ ملک ءِ پد منتگیں ہلک ءُُ دمگ ملک ءِ دیمروئی کتگیں ہلک ءُُ دمگانی کچ اتک بکن انت ۔کوٹہ سسٹم ءِ ۱۹۷۳ پی پی حکومت ءَ دیم ءَ آورتگ ات کہ سلاہ ءُُ شور آوہدے پارلیمنٹ ءَ داتگ ات کہ آئی ءِ تہا آ وہد ءَ چاریں صوبہانی جہگیر ہوار ات انت اے راجی جہگیرانی توجیل ہمیش ات کہ چوکہ ملک ءِ بازیں دمگاں آ بنکی آسراتی نیست انت کہ ملک ءِ بازیں دیمروئی کرتگیں دمگاں موجود ءُُ ساڑی انت چوکہ ہما آسراتی کہ اسلام آباد ءَ نشتگیں سوجگر ءُُ مردماں رسگان انت ،آ آوارن ءَ نشتگیں مردمانی دست رس ءَ نہ انت۔ 

ہمے وڑ ءَ ہما آسراتی کہ کوئٹہ ،لورلائی ءُُ خانوزئی مردم ءُُ سوجگراں رسگان انت آ تربت ،پنجگور ءُُ گوادر مردماں سربوہگان نہ انت چوکہ اے وہد ءَ مکران ءَ انٹرنیٹ ءِ آسراتی بند انت بلئے کوئٹہ ءُُ ایندگہ دمگانی مردم چہ آسراتی ءَ نپ ءُ سیت زورگان انت پمیشکہ بنجاہی حکومت ءَ آ وہد ءَ سوڈگ کتگ ات کہ تنکہ ملک ءِ درائیں دمگاں یک حساب ءُُ یک کچ ءَ آسراتی پجارینگ نہ بنت کوٹہ ءِ سرا مردماناں نوکری ءُُ کار دئیگ بہ بیت تنکہ پدمنتگیں دمگانی مردم چدو گیش مدمنتگی ءِ آماچ مہ بنت ۔

بلئے بنجاہی حکومت ءِ پہ پد منتگیں دمگانی مردماں اے آسراتی ءَ پد دیمروئی کرتگیں دمگانی باز یں تبک وتی ہندی ءُُ جندی نپ ءُُ سیتانی حاترا کوٹہ سسٹم ءِ حلاپ ءَ کار ءَ انت تنکہ کوٹہ سسٹم ہلاس کنگ بہ بیت ءُُ ملکءَ نوکری ءُُ کاراں آہانی تبک، زبان ءُُ راجانی مردم دیما بیاانت ۔

پرے کار ءَ آہاں ملک ءِ پدمنتگیں مردمانی ہچ وڑیں سد ءُُ سما یے نیست کہ آ چونیں بزگ ءُُ واریں زندے گوازینگان انت ۔اے درچ ءَ کوٹہ سسٹم ءِ ھلاس کنگ ءَ پنجاب سندھ ،ءُُ بلوچستان ءِ شہری دمگانی مردم، تبک ءُُ پارٹی سک کار کنگان انت وہدیکہ پد منتگیں دمگانی پارٹی ءُُ راج دوست گیش ٹھیکہ ءُُ کمیشن ءَ نہ انت ۔

ھالانکہ راج دوستیں پارٹیانی آئین ءَ ہم اے گپ است انت کہ آ ملک ءَ کوٹہ سسٹم ءِ پلہ مرزی بکن انت بلئے اسمبلی ءَ نندگ ءَ ابید ہم اشانی گوشاں مورے نہ وارت کہ اے بابت ءَ گپے بجن انت ۔

ایشیءَ چہ مستریں بدبحتی چے بہ بیت کہ ہمے راج دوست اسمبلی ءَ نشتگ انت وزیر ءُُ وزیر اعلیٰ انت کہ ۲۰۱۳ ءَ بنجاہی حکومت ءَ درائیں ملک ءُُ پہ گچین بنجاہی حکومت ءِ نوکریاں کوٹہ سسٹم ءِ سرا بندش جتگ بلئے روچ ء مرچی بلوچستان اسمبلی ءُُ بلوچ راج دوستانی نیمگ ءَ یک روچے دپ ءَ دانکے نہ یتکگ کہ بلوچستان وڑیں پدمنتگیں دمگے ءِ مردم چوں بید ء کوٹہ سسٹم ءَ بنجاہی کار ءُُ نوکریاں شت کن انت انچو گمان بیت کہ اے راج ءُُ زبان دوست پرے گپ ءَ وش بوتگ انت کہ بنجاہی حکومت ءِ نیمگ ءَ کوٹہ سسٹم ءِ سرا بندش جنگ بوتگ اگاں ناں راج دوستاں پہ وتی بزگیں راج ءَ زلور بزگ بوتگ ات ۔

زلور بلوچستان اسمبلی ءَ قرار دے دیم ءَ آرگ بوتگ ات ۔چوکہ پنجاب ،سندھ ،ءُُ بلوچستان ءِ شہری دمگانی جہگیرانی واہگ ءُُ تما انت کہ ملک ءَ کوٹہ سسٹم ہلاس کنگ بہ بیت پرچکہ اے پہ شہر ی دمگ ءِ آسراتی داروکیں مردمانی حاترا سک باز نپ ءُُ سیت انت اے حاترا آہانی جہدانت کہ سی سی آئی ءِ دیوان ءَ کوٹہ سسٹم ءِ سرا دائمی بندشے بجن انت ۔

تنکہ بنجاہی حکومت ءَ ہستیں نوکریاں پدمنتگیں دمگانی مردم اتک مکن انت پریشی ءَ آہانی گلہ ہم کنگ نہ بیت کہ آ وتی دمگ ءُُ مردمانی پلہ مرزی ءُُ نپ ءُُ سیت ءَ اے کاراں کنگان انت بلئے پد منتگیں دمگ ءُُ مردمانی جہگیر پرچہ بے ترک ءُُ توار انت ءُُ پہ وتی دمگ ءِ مردمانی حاترا پاکستان ءِ آئین ءِ داتگیں حقانی بابت ءَ گپے نہ جن انت اگاں اے حکومت ءَ کوٹہ سسٹم دائمی ہلاس کت ءُُ پدا آئین ءِ بہر جوڑ کت گڈاپاکستان ءَ پد منتگیں دمگانی مردم بنجاہی حکومت ءُُ ایندگہ نوکریاں وتی دلاں بشود انت البت بوت کنت کہ پرے کار ءَ بلوچستان اسمبلی ءَ نشتگیں راج دوستانی ٹھیکہ ءُُ کمیش ،کمو گیشتر بہ بنت بلئے بلوچ ءِ مالی آکبت سک تہارناک بیت۔