ٹونی بِلئر نسلی مُچی یا گروہ ءَ یک احتباسے(repression) ءَ گوں بندیت کہ اے وَکشی جوڑ بوتگ، اے درگت ءَ اے چِد ءُُ دیم سَگَگ ءُُ برداشت کنگ نہ بنت۔

وہدے نسلی مُچی کہ اے نیشنل ازم ہم گُشگ بیت، نوکیں سرمایہ دارانہ بیان ءِ تہا اے مُچی ءَ گوں بستگیں نفر وکشی حیال کنگ بنت ءُُ ایشانی بابت ءَ اے ہم گُشگ بیت کہ اے یک اَنچیں واہشے ءِ ہلاسی ءَ گوں دوچار اَنت کہ اے واہش ایشانی بے سمائی ءِ تہا رُستگ ءُُ بے سمائی ءَ واہش زوال بوتگ۔

قوم یا نیشن ءِ بنزہ قدر (value) اَنت۔ قدر نیچرل بوہگ ءِ بنیاد ءَ دنیا ءِ تہا پہ ہر کس ءَ یک اَنت ءُُ ہست اَنت۔ اگاں نسلی مُچی یے ءِ تہا بے سمائی ءَ یک واہشے وتا چہ دِگراں جتا بوہگ ءِ درگت ءَ جہہ جنت گڑا اے واہش سما ءَ سر نہ بیت۔

پرچہ کہ سما ءِ رِد ءَ واہش وَ قدر اِنت کہ مانشولی ءُُ آفاقی اِنت۔ اے درگت ءَ نیچرل سما اے وڑیں جتابوہگ ءِ واہش ءَ مان نیاریت۔اے رِد ءَ جتا بوہگ ءِ واہش کہ یک نسلی مُچی ئیگ اِنت۔ اے واہش بے سمائی ءَ زوال بیت۔ چہ اے وڑا اے نسلی مُچی ہما چیز ءَ پہ وتا ودی کنگ ءَ اِنت نیشنل ازم ءِ نام ءَ اے زوال بوت۔وہدے اے نسلی گروہ ءِ بے سمائی حال ءِ تہا نیشنل ازم پاد کیت۔

گڑا اے جہانی قدر ءَ فراموش بیت ءُُ وتی جائز کنگ ءَ آ دِگر ءِ سرا اُرش کنت کہ ایشی ءَ تسلیم بکن اِت۔ یا اے دِگر ءِ سرا اے درگت ءَ اُرش کنت کہ دِگر ایشی ءِ جند ءَ نہ منّگ ءَ اِنت۔ اے درگت ءَ نیشنل ازم پہ جہانی ایمنی ءَ شَریں چیزے نہ اِنت۔ پرچا کہ اے وتی کیفیت ءِ تہا نابکار جوڑ بیت ءُُ اے ابنارمل اِنت۔اے درگت ءَ دنیا ءِ کار ہمیش اِنت کہ ایشاں قدر ءِ رِد ءَ بیاریت۔

دومی اِیش کہ ایشانی ابنارمل بوہگ ءَ چہ دنیا ءِ تہا ایشانی گنجائش نیست۔ سیمی اِیش کہ چہ ایشاں جہانی قدر رَکینگ بہ بیت۔ اگاں قدر برجاہ دارگی اِنت گڑا نیشنل ازم ہلاس کنگی اِنت۔ اَنچو کہ سرمایہ دارانہ بیان ءِ پلہ مرز واکلو ،ہے وِل ؔ گُشیت اے زمانگ نیشنل اِستانانی ہلاسی ءِ نوبت اِنت۔ چونائی سوشلسٹ نظام نیشنل ازم ءَ شریں چیزے سرپد نہ بیت۔

اے درگت ءَ مردماں گیشتر اسٹالن ءِ داتگیں ہما پجار یات کیت کہ آئی ءَ نیشن ءِ بابت ءَ داتگ۔ بلے آئی ءِ کیٹاگری ءُُ نیشنل ازم ءِ تہا فرق ہست۔

ہستیں دؤر ءَ نیشنل ازم پہ سرمایہ داریت ءَ ہژدری ئیں وڑے ءَ درکار نہ اِنت پرچہ کہ سرمایہ داریت میزاں میزاں پہ سرمایہ کاری ءَ ہلاس کنان اِنت ءُُ انسان ءَ تہنا یک گِرَاکے ءِ بستار ءَ زندگ کنگ ءَ اِنت۔ پہ چیز ءِ بہا زُورگ ءَ انسانءِ گْورا چی جواز ہست کہ وتا یک راجدپتر، زمین، زبان ءُُ ایدگہ چیزے ءَ گوں بہ بندیت۔

مارا اے زانگ لوٹیت کہ نیشنل ازم ءِ ہلاس کنگ ءَ دنیا ءَ آنستیگ لانتکَگ اَنت۔ نی پہ نیشنل ازم ءَ نوبت اتکگ کہ وتی راہ ءَ بُہ شوہازیت، پرچہ کہ نیشنل ازم ءِ نام ءَ چہ کسے ءَ ہم کار گِرَگ بیت۔