شعری لبز ءُُ شاعرانی درشان مدام گوں وتی راج ءَ بندوک اِنت ۔آ وتی شعرانی کمک ءَ وتی مہر ءُُ دوستی ءِ درشان ءَ کن اَنت ءُُ راج ءُُ قوم ءَ را مہر ءُُ دوستی ءِ درس دئیگ ءِ جہد کن اَنت ۔
بلوچستان ءَ پد منتگی ءُُ سرداری گٹ ءُُ مالیات چہ بزگراں ششک گرگ ءَ لس مہلوک ءَ را ایشیءِ ھلاپ کتگ اَت ہمود جھاو ءِ دیار ءَ یک انچیں سروکے ودی بوت کہ آئی ءَ نہ ایوک ءَ اے زلم ءُُ زورکی ءِ ایرجنی کت بلکیں وتی شعرانی کمک ءَ راج ءِ دل ءَ ایشانی ھلاپ ءَ یکجا ہ بوہگ ءِ سکین اوں است اَت۔
آدم حقانی ۱۹۱۷ ءَ واجہ حاحی زہر ی ءِ گس ءَ ودی بوت۔بنداتی وانگ ءَ چہ وتی ہند ءَ دربرتگ اَت ءُُ گیشتریں وانگ ءِ ھاترا دیم پہ کراچی ءَ شت ءُُ میٹرک ہمود سرجم کت۔ آئیءِ دل ءَ گوں وتی ڈگار ءَ مہر سک باز اَت ہمے مہرءَ آئیءَ را شعر گشگ ءَ پرمات ۔آئیءَ وتی شعرگشی ۱۹۳۷ ءَ چہ بندات کتگ اَت ۔ گوں آزات جمالدینی ءُُ عبداللہ جان ءِ ہمرائی ءَ آئیءِ اے ہب گیشتر توانگر بوت ءُُ ماہتاک بلوچی ءَ آئیءِ شعر ہم چاپ بوت اَنت ۔
انچش کہ نعمت اللہ گچکی ءَ گشتگ ات کہ آزات ءُُ عبداللہ ءِ یک سپتے اے ہم بوتگ کہ آہاں شاعر درجتگ ءُُ دیم ءَ آورتگ اَنت ۔ماہتاک بلوچی آدم حقانی ءِ لبزانکی سفر ءِ بندات ات۔ ءُُ آئیءِ بازیں موادے ہمودا چاپ ءُُ شنگ اوں بوتگ۔ اے ماہتاک واجہ امان اللہ گچکی ءِ شونکار ی ءَ جاری بیت ۔ہردو ماہتاکاں بلوچی زبان ءِ مزنیں دلبڈی یے کتگ اَت۔ماہتاک اولس بگندے آ رنگ ءَ مہ بیت بلئے ماہتاک بلوچی انگت ءَ وتی کاراں گلائیش انت ۔
۱۹۹۴ ءَ وہدے میر آدم حقانی بیران بیت گڈا ہمائی ءِ ہم عہدیں پستو شاعر کہ آ وہدءِ ڈپٹی کمشنر اوں بوتگ آئیءَ ہشت سال ءَ پد آواران ءَ چار روچ ءَ آدم حقانی ءِ زند ءُُ ازم ءِ بابت ءَ مراگش جم داشت۔اے مراگشانی مول ءُُ مراد آئیءِ شاعری ءِ زندگ دارگ اَت۔
اے مراگش ءَ آ وہد ءِ مزن نامیں شاعر ءُ‘ُ ادیباں چشکہ نعمت اللہ گچکی ،غوث بخش صابر ،نادر قمبرانی ،غنی پرواز ،قاضی عبدالحمید ،مبارک قاضی ،کریم آزات ،الفت نسیم ،قیوم بیدار ءُُ عبید اللہ شاد وڑیں ادیباں بہر زرتگ اَت ۔ہمے مراگشانی بابت ءَ غوث بخش صابر ءَ ۱۹۹۴ ءَ ماہتاک بلوچی ءَ یک ھالے ( رپورٹ)ہم شنگ کنائینت ءُُ وتی ھیالانی درشان یے کتءُُ ہمیشی ءِ تہا آئیءَ آدم حقانی ءِ کتہ کاریانی بابتءَ تران کت۔ (برجاہ )