آئیءَ گشتگ ات کہ ’’میر آدم حقانی ءِ مزنی ءِ مستریں درور ایش انت کہ اے مراگش ءَ بلوچستان ءِ درائیں اکیڈمی چشکہ بلوچی اکیڈمی ،عزت اکیڈمی ،رابعہ خصداری اکیڈمی،بلوچستان اکیڈمی ءِ لبزانت ءُُ شاعرانی آئیگ انت ‘‘۔ 

وہدے چہ عبدالکریم بریالے ءَ چجست کہ تو آدم حقانی ءِ سرا اے مراگش پرچہ جم داشتگ داں آئیءَ پسو دات کہ وہدے من آئیءِ کتاب ’’درون‘‘ وانت من آئیءِ مزن پگری ءُُ شاعری ءِ منوگر بوتان ءُُ آئیءِ زند ءُُ ازم ءِ سرا اے مراگش اڈ داتگ۔اے مراگش ءِ یک مول ءُُ مرادے اے ہم است کہ حقانی ءِ زند ءُُ بابت ءَ گیش چہ گیش مردم سہی ءُُ سرپد بہ بیت اے مراگش ءَ جتا جتائیں ہنداں چہ مردم اتکگ اَنت چشکہ کوئٹہ ،خصدار،مستونک،آواران ،خاران،تربت ،پجگور،تمپ ،گوادر،کراچی ءُپ اسلام آباد ءَ سد ءَ چہ برز ادیب ءُُ شاعراں بہر زرتگ اَت ،ءُُ دیوان ءِ مردمانی کچ ءُُ کساس ۳۵۰۰ ءَ چہ برز اَت ۔

آئیءَ اے اپسو ہم کت کہ اے مراگش ءِ ریکارڈنگ ایرکنگ نہ بوتگ اَت بلئے آئیءِ گورا ایشیءِ کہنیں کیسٹ است انت اگاں رکینگ بہ بیت داں گہتر بیت ۔واجہ حقانی ءِ زند ءَ آئیءِ اولی ءُُ گڈی کتاب شعرانی کتاب’’ درون‘‘ چہ آزات اکیڈمی کراچی ءِ نیمگ ءَ چاپ بوتگ ات کہ مرچاں نیست انت ۔

باید انت کہ اے کتاب دوبر چاپ بہ بیت ءُُ آدم حقانی ءِ شعر مردمانی دیم ءَ بیا اَنت ۔واجہ محمد اکبر عمرانی کہ وت یک شاعرے آئیءِ آدم ءِ شعر چارتگ انت آئیءِ گشگ انت کہ آدم ھقانی ءِ شعر انگریزانی ھلا پ ءَ بزگ ءُُ مظلومانی حق ءِ گپ ءَ کنت ۔آئیءِ شاعر ی ءَ چہ اے حبر ہم گندگ ءَ کیت کہ لٹ ءُُ پل بوہگ ءَ انت ءُُ اے لٹ ءُُ پل ءَ سردار ءُُ نواب وت کنگ ءَ انت،آئیءِ شاعری ءَ مدام زلم ءُُ ناروئی ءِ ھلاپ ءَ انت ۔

آدم حقانی ءِ بیرانی ءَ میر غوث بخش بزنجو ءَ گشتگ اَت کہ جھاو ءِ یک بلاہ مردے مروچی بیران بوتگ ‘‘۔میر آدم حقانی ءَ ہزار ءَ برز بلوچی شعر نبشتہ کتگ آئیءِ اردو ءُُ فارسی شعرانی کچ چار سد ءَ برز انت ۔آئیءِ اردو ءُُ فارسی شعر ریڈیوزاہدان ءُُ ریڈیو پاکستان ءَ شنگ بوتگ اَنت ۔

آئیءِ زہگ عبدالقادر حقانی ءَ گشتگ کہ عبدالکریم بریالے ءَ وہدے منی پت ءِ مراگش جم داشت ،مراگش ءِ ھلاسی ءَ آ تچکی ءَ مئے لوگ ’’ لال بازار جھاو‘‘ ءَ اتک ،ما وتی پت ءِ یازدہ رجسٹرز پرے ھاترا واجہ ءَ دات اَنت کہ ایشان چاپ ءُُ شنگ بہ کنت ۔بلئے آ چاپ نہ بوتگ انت وہدے چرہی ءَ جست بوت داں آئیءَ نہ من اِت کہ منی گورا ہچی نیست ۔

آئیءَ گشتگ اَت کہ من ایوک ءَ یک رجسٹرے داتگ اِش ءُُ آئیءِ چاپ کنگ ءِ ذمہ واری ہما مردم ءَ را کہ دئیگ بوتگ آئی ءَ نہ کت ءُُ اے دگہ یازدہ رجسٹرز کہ آئیءِ زہگ گشنت اے دروگ اَنت ۔میر آدم حقانی ءَ را خضدار ءُُ آہود ءِ مردم سک دوست بوتگ اَنت مدام خضدار شتگ ۔گوں غوث بخش ءَ آئیءِ سیاسی سیالی یے است ات ءُُ آئیءِ پارٹی ءِ ممبر ہم است ات ۔ہردے آ خضدار ءَ شتگ داں آئیءِ نند بابو خیر جان ءِ لوگ بوتگ ءُُ آہود مدام شعرے دیوان اوں بوتگ اَنت ۔

واجہ عبد الحمید شیزاد ءَ گشتگ کہ آ نہ ایوک ءَ یک شاعرے بوتگ بلکیں سرجمیں انجمنے بوتگ آئیءِ زبان پہک ءُُ شیرکن بوتگ ۔ پہ غوث بخش بزنجو ءِ بابت ءَ آئی ءِ ھیال اے رنگ ءَ اَنت کہ 

بیاءِ کہ بیا ہاتے من ترا مہمان کنیں
چاندی ئے زراں تئی راہ ءَ تالاں کنیں

بستگیں شیراں شکر ماں کنیں
گل سہریں پھلاں تئی راہاں ریچاں کنیں

بقول عبدالحمید شیر زاد ئیگ ءَ کہ آئیءَ مدام غوث بخش ءَ را جھاو ءِ نندگ ءِ گشتگ کہ آ نال آباد یلہ بہ کنت عبدالحق پرومی ءِ گوں آئیءَ سکیں نزیکی سنگتی یے است ات ءُُ پنجگور ءَ مدام اتکگ اَنت ۔

عبدالریم حقانی واجہ ءِ مستریں زہگ انت ءُُ مدام گوں وتی پت ءَ یکجا بوتگ بلئے گوں شاعری ءَ آئیءَ را ہچ سروکارے نہ بوتگ ۔آئیءِ گشگ انت وہدے حکومت ءِ نیمگ ءِ کوئٹہ ءَ بلوچی شاعری ءِ دیوان کنگ بوتگ گڈا گل خان نصیر اولی ءُُ دومی نمبر ءَ میر آدم حقانی اتکگ بلئے نوں آئیءِ شاعری بے حال کنگ بوتگ ۔ 

میر آدم حقانی ءِ زند ءُُ شاعری ءِ بابت ءَ جتا جتائیں تاک ءُُ ماہتاکاں نبشتہ کنگ بوتگ ۔ماہتاک ’’ نوکین راہ ‘‘ ءَ غنی پرواز ءَ وتی نبشتانک ’’ آدم حقانی ءِ شاعری ‘‘ ءِ تہا نبشتہ کتگ کہ آدم حقانی یک آشوبی ،راج دوست ،ءُُ زالمانی ھلاپ ءَ حق گشوکیں شاعرے اَت ۔آئیءِ شاعری سرجم ءَ آشوبی یے اتءُُ وتی شعر ہم آشوبیں رنگے ءَ درشانتگ اَنت ۔(برجاہ انت)