سنگتے ءَ گوں سنگتے ءَ گشت کہ اے عبدک کہ نانئے پہ ورگ ءَ پچ ئے پہ پوشگ ءَ نیست ات نوں برے پرپٹ ءَ سوار انت برے بگند ئے آلٹوگاڑی یے ءَ ۔۔۔
اے چے کار کنگ ءَ انت سنگت ءَ پسہ دات کجام دنیا ءَ زندگی گوزینگ ءَ ات ؟ملائی ءِ برکت ءَ اے پرپٹ ءَ آلٹواں سوار انت تو ملا کار توس ءِ نام نہ اش کرتگ آئی ءَ شت کہ اش کرتگ ۔۔۔
نگت ءَ گشت کہ ہمے عبدک انت کہ ملا کار توس انت ۔ پہ ملائی ءَ نامدار انت کج ءِ کج ءِ مردم ایشیءِ لوگ ءَ نیا انت مرد م ہزاراں میلانی سپر کن انت ءُُ کاانت دگہ نندوکے ءَ گشت انچوش کہ مہلونک گش ایت اے انچوش انت ؟ یکے ءَ گشت کہ من ءَ وَ باور نہ کنت بلئے من اش کرتگ کہ پہ روزگاراں پہ روزگار کنگ ۔۔۔کجام کہ دل کش ایت پہ سانگ ءَ کئی چک کہ نکاح بند انت ۔
کئی زال کہ چہ مرد ءَ زہر انت ءُُ یاکہ کئی لوگ واہند چہ وتی لوگی ءَ زہر انت ۔ملا کارتوس ءِ یک تایتے ءَ گوں بستگ انت انچوش مہلونک ءِ کشگ انت ۔
ملا کارتوس ءِ نزیکیں مردمے ءَ چے من اش کرتگ زالبولانی بازیں مچی ءَ ملا کارتوس ءَ ہچ وہد نہ رس ایت کہ گوں وتی زال ءَ دمانے بہ نندایت ءُُ مہر ءُُ محبت ءِ دیوانے بہ کنت گوں ۔۔۔پمشکا ملاکارتوس ءِ لوگی چہ ملا کارتوس ءَ دلتنگ بوتگ ۔
آء ءَ ہمے گمان بوتگ کہ ملا ءَ گون من ءَ مرچاں مہر ءُُ محبت نیست ۔من ءَ پسند نہ کنت پمشکا زیات گوں درآمدیں زالبولاں ہمنیاد انت ۔کدی کہ درآمدیں زالے ملائیگ ءَ کیت ملا گوں آئی ءَ لوگ ءَ نندایت ءُُ لوگ ءِ دپ ءَ چہ توکی نیمگ ءَ بند کنت یکروچے زالے ملا کارتوس ءِ لوگ ءَ اتک ملا ءَ گشت دروازگ ءَ بند کن گوں آئی ءَ دروازگ بند کرت ۔
ملا کارتوس ءِ دیم پہ دیما شتگ ءُُ نشتگ ملا کارتوس ءِ گوگی ءَ دروازگ ءِ دومی نیمگ ءَ نشتگ ءُُ گپاناں گوش ئے داشتگ انت زال ءَ گوں ملا ءَ گشت ملا من باز بزگ آں من ءَ وگ واہند ءَ گوں من مرچاں تشے تب نیست چمئے نیست کہ من ءَ بچار ایت دائم ءَ گوں من مڑ ءُُ جنگ کنت من کہ گپے گشگ لوٹاں گش ایت ہاموش بہ بو روانہ تئی سوناں دیاں ۔
ہشکنگ ءَ دگہ آروس ئے کنگ ءَ انت اگاں چوش بوت بزاں من ءُُ منی چک تباہ ءُُ برباد بوت انت چوشیں وڑی نیست کہ منی چکانی پت ءِ درائیں مہر ءُُ محبت پہ من ءُُ پہ منی چکاں بہ بیت ءُُ آدگہ آروس ءِ نام ءَ مہ گپت ملا چہ اے گپ ءَ سرپد نہ ات کہ دروازگ ءِ آ نیمگ ءَ منی لوگی ممئے گپاں گوشدارگ ءَ انت ۔ملا کارتوس ءَ شاکارگے جت ءُُ پہ دست وتی انی جتگیں ریشانی رندگ ءَ لگ ات گشتئے چہ بوت نہ کنت ۔
تو کہ منی ءَ اتکگ پکر مہ کنت ۔بلئے ترا گپے گشاں اول وَ من تر ءَ دہ ہزار کلدار گراں پرچا کہ من ہرات کناں منی موکل لوٹ انت دومی گپ ایش انت کہ اے کار ایوک ءَ بیت منی ءُُ تئی درمیان ءَ گہ کس مہ بیت چونائی مرچی من باز دم برتگ ۔ترا چے پیسر من دور زالبول ءَ را آزارات کرتہ اے گپ ءَ ہم دلگوش کن من کہ آزارت ءَ ننداں دمانے ءَ رند منی موکل کن انت ۔
اے وہداں من وتی ہوش ءَ نباں ہرچی کہ موکل گش انت من ہمائی ءَ کناں ۔اگاں تو مہ کن کرت تئی گنوگی وَ الم انت منی سر ءَ ہم اثر کپ ایت دل ءَ بچار اگاں کرت نہ کنئے پیسر ءَ بگش ۔
زال اے نیمگ ءَ آ نیمگ ءَ چارات ءُپ گوں وشیں کندگے ءَ گشئے گڑا منی کار بیت ۔ملا کارتوس ءَ گشت اگاں تئی چکانی پت ءَ بے تئی جست ءَ گلاسے آپ وارت من ملا کارتوس نہاں مہللونک گنوک نہ انت کہ منی ءَ کاانت ۔
من ہرکسی پہ دیم کار ءَ نہ کناں تو من ءَ باز دوست بئے ءُُ باز بزگ ئے من ءَ پہ تو بزگ ہم بیت ۔زال ءَ گشت گڑا کدی بیاں ۔ملا کارتوس ءَ گشت انوں من باز دمبرتگ باند ءَ بیا تئی کا رءَ کناں ۔آئی ءَ گشت شرباند ءَ کایاں ۔ملا کارتوس ءِ لوگی چہ دروازگ ءِ دپ ءَ پاد اتک ءُُ گشئے ملا باند ءَ من ہم تئی کار ءَ کناں ۔
باند ءَ اتک ملا کارتوس ءِ لوگی ملا خنجر ئیگ ءَ شت اے زاہر ئے کرت کہ من ملا کارتوس ءِ لوگی آں ۔گوں ملا خنجر ءَ گشت منی لوگ واہند ءَ گوں من ءَ مہر نیست دائم گوں من ءَ جنگ کنت مدام درآمدیں زالاں گوں ہمنیاد انت پہ حدا بچار پہ من ءَ کارے بہ کن من باز بزگاں ۔ملا خنجر ءَ گشت کہ دہ ہزار کلدار من لوٹاں دات کنئے ؟ آئی ءَ گشت آں ۔۔۔
آزارت کنگ لوٹ ایت منی موکل کن انت ۔ہرچی کہ منی موکل گش انت من انچوش کناں بگندے ترا وش مہ بیت باز مردم ترس ایت اگاں ترا ترس ایت انوں مہ کن آزارت ءِ وہدے انت منی موکل کن انت رند ءَ من بے ہوش باں منی دستے تئی جان ءَ بہ لگ ایت ءُُ تو مہ کن بہ کنے شر نہ انت آئی ءَ گشت ہرچی کہ تئی موکل گش انت بلکیں من ہچ نہ گشاں دلجم بو بلئے منی کار الم ءَ بہ بیت ۔ملا خنجر ءَ گشت آ منی کار انت دمانے ءَ رند ملا خنجر آزات بندایت ۔
ملا کارتوس پہ جان ءِ شودگ ءَ غسل خانہ ءَ کہ شت چمئے پہ وتی زال ءِ پشک ءَ کپت انت کہ پشک ءَ چپی ءَ درنجوک ات پہ سیائیں سیائی ءَ پشک ءِ دمبل ءَ نویسک ات ہرچی پہ کسمت ۔