نوکیں باہندیں سیاسی مردم چہ پاکستان ءِ دپتر ءُُ لس واجہی بزاں جمہوریت ءِ جہد ءُُ جیڑگاں چہ ناسرپد اِنت پمشکا آ ئی واہگ انت کہ ملک ءَ صدارتی نظام ءِ حکومت بہ بیت ۔بلکیں باز انچیں مردم اے لوٹ ءَ ہم کنگان اَنت کہ ملک ءَ پارلیمانی ءُُ وفاقی حکومت ہلاس کنگ بہ بیت۔

بگندے انچیں مردمانی ترس ءَ آرمی چیف ءَ اے جار پرینتگ اَت کہ صدارتی نظام ملک ءَ شر نہ انت پرچکہ چریشی ءَ کسانیں دمگاں بددلی ودی بوت کنت ۔ ملک غلام محمد ءَ بگرداں ایوب خان ءِ دور ءَ ملک ءَ صدارتی نظام بوتگ ءُُ کسانیں دمگاں ءُُ بنگالءَ ون یونٹ ءِ جہگیر سر توک کنگ بوتگ اَنت ۔ون یونٹ ءِ پروشگ ءَ لس مہلوک ءَ باز جہد کرتگ اَت۔پمشکا بنگال ءَ یک مرد مے یک ووٹے ءِ دئیگ ءِ جار جت ءُُ داں کہ وتی آجوئی اِش گپتگ ءُُ جتا بوتاں ۔

مرچی بنگلہ دیش پاکستان ءَ چہ جتا یک آجوئیں ملکےءُُ نوں پاکستان ءَ ہم آئیءَ را یک جتا ملکے ءِ درجگ داتگ ۔نوں سفارتی ھساب ءَ ہم آئیءَ یکوڑیں سیادی ءِ کنگ ءَ انت ۔بنگال ءِ جتا بوہگ ءَ پد یکوڑیں جہگیری ہلاس کنگ بوتگ ءُُ دوئیں دمگاں یکبرے پدا وت واجہی دئیگ بوت ۔ بلئے نوں ہمک دمگ ءَ چہ وتی استیں وت واجہی ءَ چہ گیش ءِ درکار اَت ءُُ اے جیڑ گ مدام ودی ات کہ دمگ انگت ءَ سرجم ءَ وتی مستر وت نہ انت۔

یکیں ملک ءَ استی ءَ پداوں ایشاناں وتی دمگانی وت واجہی دئیگ بوہگ ءَ نہ انت ۔پرچکہ وفاق ءُُ بنجاہی حکومت ایشاں انگت ایر ماد کنگ ءَ انت۔ دانکہ درائیں دمگ وتی مالی ءُُ ہر وڑیں جاوراں مستر ءُُ کستر وت مہ بیت اے ملک شر بوت نہ کنت ءُُ اے ملک ءِ جوڑ کنگ ءُُ دیمروئی ءِ دئیگ ءِ مستریں گیشوار ہم ہمیش انت ہمے قول ءُُ سوگند ءَ بازیں دمگ پاکستان ءَ ہوار کنگ بوتگ اَنت ۔

بلئے گورنر جنرل ملک غلام محمد ءَ درائیں دمگانی حق پچ گپتاں درائیں دمگاں بے وس کت اَنت۔آ روچ ءَ پد پاکستان ءَ یکوئی کہول ءُُ حاندانی حکومت پیداک اَنت کس ءَ را لس مہلوک ءَ وتی رضا ءَ نیاورتگ ءُُ ایشیءِ تاجگیں درور نواز شریف ءِ حکومت ءَ چہ پدر انت ۔

اے اوں یک مردمے حکومتے اَت کہ ایشیءَ را ہچر کابینہ ءِ مجلس ءِ طلب نہ بوتگ ،یکجائیں مجلس ءُُ جیڑگانی گیشوار اے حکومت ءَ بہہ نہ کتگ اَت بلکیں وتی جند ءِ نپ ءُُ سیت ہر جاہے کہ گہتر بوتگ آ ہاں ہمود دیوان ءُُ جلسہ کتگ۔پمشکا اگاں اے ملک شرکنگ ءُُ دیمروئی دئیگی انت داں نوکیں سیاسی رہبند دیم ءَ آرگ لوٹ انت ءُُ دمگاناں وتی درائیں حق ءُُ مُز ءُُ وت واجہی ءِ حساب ءَ دئیگ بہ بنت ۔

بنجاہی حکومت ءِ گورا کم ءَ چہ کم بلئے پُر ارزشتیں واجہی بہ بیت دانکہ ملک ءَ ایمنی ءِ جاور گر ءُُ دار بوت بہ کن اَنت ۔باید درائیں دمگ وتی مالی ءُُ معاشی جاورانی وت واجہ بہ بیت ۔ایوان بالا ءُُ ایوان زیریں یک حساب ءَ واکداری دئیگ بہ بنت دانکہ پنجاب اے دگہ دمگانی سرا حاکمی سرجم ءَ ہلاس بہ بیت۔اگاں ناں گڑا راجی اسمبلی ءَ درائیں دمگاں یک حسابیں جہگیر دئیگ بہ بیت ۔

راجدپتری حساب ہما ہند ءُُ دمگ کہ بلوچستان ءِ بوتگ اَنت آ دوبر ا بلوچستان ءَ ہوار کنگ بہ بنت ءُُ بلوچستان ءَ ہرچی کہ اوگان است انت آہاں درکنگ ءُُ کے پی کے ءَ ہوار کنگ بہ بنت ءُُ ہما درائیں نوکیں دمگ کہ جوڑ کنگ بوتگ انت آ درستاں وت واجہی دئیگ بہ بیت دانکہ ملک ءَ بدایمنی ءِ جاور پہ مدامی ہلاس بہ بیت۔