اے وہدءَ بلوچستان ءَ ہرچ راجکاری چست ءُُ ایرے کہ بوہگ ءَ انت ایشی ءَ را راجکاری زانتکار گوں سینٹ ءِ گچین کاریاں پرلچینگان انت بلئے بازیں راجکار ءُُ راجکاری ٹپاس کنوک پمشکہ ترسگ ءَ انت کہ اکتوبر ءِ ماہ ءَ اے پیش گشی بوہگ ءَ ات کہ یکم جنوری پہ پرے حکومت ءَ نئیت۔

تہی کارانی وزیر چوہدری نثار ءَ ہم گشتگ ات کہ اے وہدءَ مملکت خدادا ہما بیہارانی دیم پان انت آئی ءَ پاکستان ءِ خدا ءَ ہوار ایوک ءَ۲ ملٹری ءُُ ۲ سویلین مردم سہی ءُُ سرپد انت بزاں پاکستان دری جاورانی ردا نگیگیں جاور حالاں دچار انت ،پدا ناکو ٹرمپ ءَ ہم ہمے وہدءَ بے ادبی کنگی ات پمشکہ پاکستان ءِ سرپدی ئیں مردم تکانسر انت کہ باریں حال مئے چے بیت ؟ بلئے گپ ادا ہلاس انت کہ بلوچستان ءِ سروزیر ءِ بحت اتک گوں سینٹ ءِ گچین کاریاں ہم دست بوت ۔

سرپدیں مردم زان انت کہ اے بلوچستان ءِ سروزیر نہ انت لاڑوکیں نواز شریف انت کہ ایرمادی نزانت ءُُ بقول ہمائیگ ءَ پیراں سری نظریاتی بوتگ ءُُ دگہ ہچ نظریہ مان نیارایت ۔نوازشریف واجہ یے کہ چو سردار سارتر ؔ ءَ فرانس ءِ نام پر انت اگاں زرداری ءِ سندھ ءَ پیداک بوت انت گڈا آئی ءِ پد ہما پدگر ءُُ بشوہاز اتاں کہ ہچر ۔۔۔۔۔بلئے نواز شریف انت کہ لوٹ ات کہ ملک ءَ چہ پیر ءُُ پرشتگاں آجو بکنت :شم ءَ کئے گیشت کہ بیا ۔۔۔۔

راجی اسمبلی ءَ اے وہد ءَ نواز شریف ءِ گل ءِ باسک چہ درستاں گیشتر انت بلئے چم دراتک کجا سیری زانت؟ دلمانگ انت کہ سینٹ ءَ انچو بکنت۔ سینٹ ءِ گچین کاری مارچ ءَ بوہگی انت۔

اگاں مارچ اتک ءُُ سر بوت گڈا نواز شریف سینٹ ءَ ھالے کاریت ءُُ دلمانگ انت چو وتی صادق ءُُ امین ءِ’’ بل‘‘ ءَ یک ءُُ دو دگہ بل بیار ایت کہ مملکت اللہ داد ءَ پیر ءُُ پرشتگانی زور ءُُ واک ءَ کم بکنتءُُ بقول زرداری وت چو مغل بادشاہاں بہ نندایت ءُُ پاگے بہ بند ات بلئے پہ زمین ننداں کدی چو بوتگ کہ باریگ پہ نواز شریف ءَ بئیت انت ؟چو کدی بیت کہ حاک ءِ بنی آدمے آس ءِ پرشتگانی حساب ءَ بکنت بلئے جاہل ءَ چل گوک ءِ زور مان ءُُ دل ءَ پہ واجہ ءَ بدی مان نیست پمشکہ شیخ رشید گشیت کہ مارچ ءَ مارچے بیت ۔ روچ ءِ چیر ءَ ما ہمیش دیستگ کہ شیرانی جنگ ءَ مدام مور مر انت ۔

نوں بلوچستان ءِ سروزیر ءِ بحت ہمے مورانی بحت انت ۔بلئے نندوک ءُُ چاروک سک پریشان انت کہ ہما کہ اسٹیبلشمنٹ ئیگ انت ،آاسٹیبلشمنٹ ءِ ہمراہ نہ انت ءُُ ہما کہ اسٹیبلشمنٹ ءِ ہمراہ انت آ اسٹیبلشمنٹ ءِ نہ انت۔ حدا ءِ کجام کار پہ بے حکمت انت ،نادان نزان انت کہ اے دور وَ گوزیت بلئے دگہ باریگے پدی انت ۔ادا مچار کہ کہ مان اتکگ ہمودا بچار کہ درکپتگ۔ 

پہ نوکیں سروزیر ءَ سردردے ہمے انٹی اسٹیبلشمنٹ بنت ،ہمے کہ غیر جمہوری کارانی ہمراہ نہ انت باندا شما گندئے کہ اے جہموری کارانی ہم ہمراہ نہ بنت ءُُ پدا بلوچستان اسمبلی چوشگنز ءَ بیت ءُُ شگنز گوں لنڈاں ،گڈ سرا نوکیں سروزیر ءِ بحت چو کوہنیں سروزر ءِ بحت ءَ واب کپیت ءُُ دنیا گشگ نہ لوٹ ایت کہ وپتگیں مرد ءِ میش نر کارایت نر وَ حئیر انت بلئے بلاہ ءُُ بہتر میش ءَ ،نر ءَ گوں شوانگ ءَ مزور انت ءُُ مہ روانت پدا سندھ ءَ ڈھل بیت ءُُ کے پی کےءَ ناچ! سہبت ءِ دیم گوں پنجاب ءَ انت ۔ خدامردماں عمر ءُُ روچ بدنت کہ زندگ بئے گندگ بئے ۔