اگاں ما پیشگْمان بکنیں کہ اسٹیٹ آف نیچر اگاں واقعی بوتگ گڑا اْود ءَ مارا راجمانی فکر social thought ءِ ہچ وڑیں امکان نہ رسیت۔ راجمانی فکر مائٹ اِز رائٹ (might is right)ءِ تہا بوت نہ کنت کہ اْود ءَ ہر یکے ءِ مقصد زندگ بوہگ اِنت۔ بلکیں زندگ بوہگ آئی ءِ آزاتی ءِ گیشی maximization of freedom اِنت۔

اے درگت ءَ آ پہ وتی آزاتی ءِ گیش کنگ ءَ یا آئی ءِ آزاتی ءِ راہ ءَ ہرچ رْکارٹے کیت، آ اے رکاوٹ ءِ نفی negate ءَ کنت۔ اے بنیاد ءَ آئی ءِ آزاتی منفی آزاتی گْشگ بیت۔ راجمانی فکر ہما وہد ءَ بندات بیت وہدے انسان دومی انسان ءِ فکرcare ءَ کنت۔

چہ ایشی ءَ ہمسنگی یے harmonization ودی بیت۔ اے ہمسنگی دائما یک اسٹرکچرے ءِ تہا بیت۔ اے بنیاد ءَ ما گْشت کنیں کہ راجمانی فکر دودمان ءِ نیمگا احالہ refer کنت۔

پرچہ کہ انسان ءِ یکجاہ بوہگ ءَ چہ ہما اسٹرکچر جوڑ بیت ، ہمے اسٹرکچر ءِ نام دودمان اِنت harmonization of the living structure of human being۔ بلے دودمان وتی اے گنجیں بیانیہ ءِ پجار definition ءَ گوں یک نادریں تصور و مقامےparticular conception and state of human پہ انسان ءَ داریت۔ اے بنیاد ءَ ہر دودمانے چہ دومی ءَ جتا اِنت۔

نی اگاں مارا ہما دودمان ءِ تہ ءِ ہمسنگی ءِ پد جنگی اِنت گڑا مارا ہما دودمان ءِ پیراڈائم ءِ تہا آ ٹپاسگی اِنت۔ اَنچو کہ انڈین راجمانی فکر ءِ بنیاد ہندوازم ءَ داتگ اَنت۔ اگاں مارا انڈین راجمانی فکر زانگ اِنت گڑا مارا اول سرا اے زانگی اِیں کہ ہندوازم یک دودمانے ءِ رِد ءَ انسان ءِ تصور ءَ چون گِشینیت کہ انسان ءَ چون بوہگ لوٹیت، دومی آ انسان ءَ چونیں نادریں مقامے دنت۔

ہندوازم ءِ رِد ءَ انسان ءَ یک نادریں ارواہ یے ءِ بستار ءَ جہانی ارواہ زانگی اِنت۔ نادریں ارواہ آتما اِنت ءْ جہانی ارواہ برہما۔ وہدے آتما جہانی ارواہ ءَ الکاپ ءَ بزانت گڑا آئی ءَ چہ جنم چکر cycle of birth ءَ نجات رسیت۔

نجات ارواہ ءِ نمیرانی اِنت(اے انسان ءِ نادریں تصور اِنت)۔ دنیا ءِ تہا ہما انسان کہ الکاپ ءَ برہما ءَ زانت آئی ءِ بستار چہ ایدگراں بْرز تر بیت۔ اَنچو کہ برہمن برہما ءَ الکاپ ءَ زانت، پمیشکا ایشی ءِ مقام درستاں چہ بْرز ءَ اِنت۔

کھشتری برہما ءَ برہمن ءِ وڑا نزانت پمیشکا اے برہمن ءَ چہ راجمانی بستار ءَ جہل اِنت۔ ویش برہما ءَ کھشتری ءِ ہم وڑا نزانت لہٰذا آئی ءِ بستار چہ کھشتری ءَ ہم جہل تر اِنت۔ شودر برہما ءَ زانت نہ کنت پمیشکا اے دنیا ءِ تہا دْرستاں چہ جہل تر اِنت ءْ گْڈی اِنت(اے انسان ءِ نادریں مقام اِنت)۔

اگاں ہمے راجمانی فکر ءَ ما یونانی دودمان ءِ تہا بچاریں گڑا اے درگت ءَ گپ فینکن اسٹائن ءُْ گْڈوِن ءِ نزّ ءَ اے وڑ بیان بیت کہ ہیراکلیٹس ءِ لیکہ ءِ رِد ءَ‘ ہر چیز یکشلہ بدل بوہان اِنت، چْشیں ہچ نیست کہ بدل نہ بیت‘۔فینکن اسٹائن ءُْ گْڈوِن ہمے سرپد بنت کہ ہیراکلیٹس پہ نزانتی اے گپ ءَ جوڑ کنگ ءَ اِنت کہ ما یک نا محکمیں دنیا یے ءِ تہا چون نشتگیں؟ بلے اے سوال سوشیولوجی ءِ بنداتی سوال اِنت۔ 

چہ ایشی ءَ ما اے معنا زْرت کنیں کہ ما یک‘ راجمانی زروے ءَ چون پہمت کنیں آنہ تہنا دائما بدل بوہان اِنت بلکیں مئے ہر ہمک چِست ءُْ ایر ہم ہمے راجمانی زور ءِ رنگ ءَ گِران اَنت؟ ما چون زانیں کہ ما ہمے راجمان ءِ تہا نشتگیں، اے برابر اِنت ءُْ دیمروی کنگ ءَ اِنت؟

چو کہ ہیراکلیٹس ہم یونان ءِ بوتگ بلے یونان ءِ دودمان ءَ پلیٹو (افلاطون) ءَ پہ راجمانی فکر ءِ بندگ ءَ بنیادے داتگ۔ اگاں ہمے سوالاں یونانی دودمان ءِ دیما گوں افلاطونی نگاہ ءَ ایر بکنیں گڑا افلاطونی جواب اے وڑا بیت کہ پہ راجمانی فکر ءَ راجمان زانگ نہ لوٹیت بلکیں انسان ءِ ذات (self) زانگ لوٹیت۔ انسان ءِ ذات ءِ زانگ ءِ واستہ اے جار پِرینَگی اِنت کہ انسان وتا بذانت (know thy self)۔

جام انسان وتا زانت یا نزانت ایشی ءِ فیصلہ ہما انسان ءِ عملاں چہ بیت۔ اگاں آئی ءَ وتی ذات زانتگ ءُْ ذات ءِ رِد ءَ فیصلہ کْتگ کہ (من) فِلاں کار ءَ کناں گڑا اول سرا اے چارگ لوٹیت کہ آئی ءِ کار ءُْ عملانی تہا چنچو تضاد ہست۔

اگاں آئی ءِ کار ءْ عمل متضاد نہ اَنت گڑا بزان کہ آئی ءَ وتا حق ءُْ دل زانتگ۔ ہمے وڑا انسان وتا سرپد بوہان ءَ وتی کاراں گِشّینان بنت۔ چہ اے کارانی گِشّینگ ءَ راجمانی اسٹرکچرے جوڑ بوہان بیت، انسان ہمے اسٹرکچر ءِ تہا عمودی حوالہ ءَ بہر بیت۔

ہما مردم وتا زان اَنت کہ ایشانی کار راجمان ءِ فکری دفاع اِنت آ بْرز ءِ تبک ءَ جاہ کن اَنت۔ ہماہاں وتا زانتگ ءُْ فیصلہ کْتگ کہ آ راجمان ءِ مادی دفاع ءَ کن اَنت آ میان ءِ تبک ءَ جاہ کن اَنت۔ ءُْ ہماراجمان ءَ لیبر پاؤرے دات کن اَنت آ جَہل ءِ تبک ءَ دارگ بنت۔ بلے تبکانی اے وڑا بہربانگی ایشانی میان ءَ مراعات ءِ بہر بانگی نہ اِنت۔ بلکیں اِدا دْراہ برابر اَنت۔

افلاطونی یونانی دودمان ءِ گورا انسان ءِ نادریں تصور اِیش اِنت کہ ’آوتا بزانت‘ ءُْ نادریں مقام ’تبک ءِ تہا آئی ءِ جاہ ‘ اِنت۔ آسر اِیش اِنت کہ یونانی دودمان ءِ رِد ءَ اسٹرکچر ذات ءَ جوڑ نہ کنت بلکیں ذات اسٹرکچر ءَ اڑ کنت۔ اے رِد ءَ اے وڑیں راجمان آئیڈیل ءُْ ایشی ءِ نظام فنکشنل کمیونزم گْشگ بیت۔

ہیراکلیٹس ءِ لیکہ ءَ چہ چِست بوتگیں سے اِیں سوالانی جواب اے وڑا بیت کہ مارا راجمان زانگی نہ اِنت بلکیں ذات زانگی اِنت، پرچا کہ ذات اسٹرکچر ءَ جوڑ کنت۔ وہدے ما وتی ذات ءِ رِد ءَ اسٹرکچر ءَ جوڑ کنیں گڑا مئے جوڑ بوتگیں اسٹرکچر (راجمان) ءِ تہا تضاد نہ بیت ءُْ اے برابر بیت۔ برابریں راجمان دائما دودا بوہان بیت کہ ایشی ءِ دیمروی ءِ چیدگ اِنت۔