اے وہد ءَ بلوچستان ءَ سیکریٹری ایجوکیشن نورالحق انت کہ سرپدی ئیں ءُُ دوچاریں مردمے ،نورالحق ءَ چد ءُُ پیسر ہم اے اگدہ ءِ سراکار کتگ ۔

وتی گوستگیں دور ءَ آئی ءَ بلوچستان ءِ وانگ ءُُ زانگ ءِ سرا مزنیں ءُُ جوانیں گامگیجے زرتگ ات بلئے چد پیسر کہ آئی ءِ کارانی آسرے دیم ءَ بئیت آ چہ اے اگدہ ءِ سرا بدل کنگ بوت کہ آئی ءِ جاگہ ءَ آؤکیں سیکریٹری ءَ بلوچستان ءِ وانگ ءُُ زانگ ءِ سرا آ دلگوش گور نہ کت کہ بلوچستانءِ وڑیں پد منتگین دمگے ءِ زلورت انت اے وہد ءَ بلوچستان ءَ وانگ ءُُ زانگ ءِ بازیں جیڑہ ءُُ جنجالے ہست مستریں جنجال ایش انت۔

کہ گیشتر ضلعاں ضلعی ایجوکیشن آفیسر نیست پہ گچینی فیمیل ایجوکیشن آفیسر کم انت ءُُ اگاں جاہے جاہے است گڑا اودا گیشتر جونئیریں فیمیل ٹیچر اے پوسٹانی سرا سیاسی بنیاداں ء نادینگ بوتگ انت گچینی مکران ءَ دومی، سرکاری اسکولانی بلڈنگ ءُُ ٹیچر انی بازیں جیڑہ است انت چوکہ اشکنگ ءَ ایوک ءَ تربت ڈگری کالج ءَ 37 لکچرانی پوسٹ ہورک انت ہمے حال گوادر ءُُ پنچگور ئیگ انت ہم ۔

وہدیکہ اسکولانی تک ءَ ہم ٹیچرانی سک باز کمی انت اے وہد ءَ گیشتریں دمگاں مردمانی آبادی وداتگ بلئے انگت مکران ءَ ہوار بلوچستان ءِ گیشتر دمگاں سد(۱۰۰) زہگاں یک ٹیچرے کہ گوں زہگ ءُُ ٹیچر ءَ مزنیں ناروائی یے ءُُ اگاں ٹیچر فیمیل بہ بنت گڑا دو سری ظلمے ۔۔

ایشی ءَ ہوار دگہ یک مستریں جیڑھ یے سلیبس ئیگ انت ۔بلوچستان حکومت سالے کروڑانی کلدار سلیبس ءِ سرا ہرچ کنت بلئے سلیبس آ وڑیں جوڑ نہ بیت کہ بوہگی انت پرچکہ نوں بیست ءُُ یکمی کرن انت ،بیست ءُُ یکمی کرن ءِ وتی لوٹ ءُُ گزرانت ۔اے وہد ءَ چاگر ءَ ناشری ءُُ زینبءِ وڑیں ویل کہ دیما آئیگان انت نفسیات زانتانی رد ءَ اشانی مستریں سوب پاکستان ءَ حرابین سلیبس ئیگ انت ۔

پدرا نت کہ اے ردیں گپے نہ انت کہ بنی آدم ءِ چاگرد ءِ بنی آدم ءِ سرا مزنیں اثرے بیت ءُ اے چاگرد ءِ ودی کنگ ءَ بنداتی وانگ جاہانی سلیبس مزنیں دستے ،دنیا ءَ اے چز سک چارگ ءُُ مارگ بیت کہ زہگاں چونیں سلیبس وانینگ بہ بیت اے بابت ءَ سلیبس ءِ content سیاہگ ءِ جوانی ءَ چارگ ءُُ ٹپاسگ بنت ، بلئے بدبحتی ءَ پاکستان ءَ سلیبس ءِ سرا ہچ چار ءُُ بچار کنگ نہ بیت ۔

وہدیکہ دنیا ءَ سلیبس ءِ ٹہینگ ءَ وانگ ءُُ زانگ ءِ ماہر ءُُ نفسیات دان ءُ چاگرد زانت ہواری ءَ اے کار ءَ کن انت بلئے پاکستان ءَ ایجوکیشن ءَ ڈپارٹمنٹ ءِ واکدار اے کار ءَ وتی سنگت ءُُ عزیز ءُُ پجہ آروکانی کارے سرپد بہ بنت ءُُ پہ بلوچستان ءَ اے کار دوسری نادلگوشی ءِ آماچ انت اے وہد ءَ بلوچستان ءَ بلوچی سلیبس بہ بیت یاکہ پشتو ءُُ براہوئی سلیبس، ایشی ءِ جوڑ کنگ ءُُ ریویو کمیٹیانی تہا گیشترمردم انت کہ ایجوکیشن ڈیپارٹمنٹءِ سلیبس جوڑ کنوکیں واکدارانی سنگت ءُُ واقف کار انت ۔

اسل ءَ بلوچستان ءَ اے جیڑگ نہ بیت کہ راج ءِ آکبت ءِ اُمیتاں یک جوانیں آکبتے دئیگ ءِ حاترا جوانیں سلیبس دئیگی انت بلکیں بلوچستان ءَ گیشتر اے چارگ بیت کہ سلیبس جوڑ کنوکیں واکدارءُُ اختیار دار چے وڑ ءَ وتی سنگت ءُُ عزیزاں چہ سلیبس ءِ جوڑ کنگ ءَ فائدہ ءُُ نپ دات کن اَنت ۔

پدر انت کہ وہدے کار پہ نپ ءُُ سیت ءِ دئیگ ءَ بنت گڑا آجوانیں کارے نہ بیت ۔اے درگت ءَ بائدیں بلوچستان ءِ سیکریٹری ایجوکیشن گامگیج بزور اِت کہ سلیبس جوڑ کنوکیں واکداراں کھڈن بکنت کہ آ وتی سنگتی ءُُ سیادیانی پشدر ءَ بلوچستان ءِ زہگانی آکبت ءَ تہار مکن انت ۔

بلوچستان ءَ بلوچی ،براہوئی ،پشتو زبان ءُُ لبزانک ءِ جوانیں نبشتہ کار ءُُ زانتکار ہست ءُُ ساڑی انت اگاں سلیبس جوڑ کنگی بیت گڑا بائد ہمیشاں کارگرگ بہ بیت ایشی ءَ ہوار بلوچستان ءَ بلوچی ،براہوئی ،ءُُ پشتو ءِ مستریں اداراہ ءُُ اکیڈمی ہم کوئٹہءَ موجود انت۔

اگاں ایجوکیشن ڈیپارٹمنٹ اے زبانانی سلیبس ءِ جوڑ کنگ ءِ وہد ءَ گوں اے ادارہاں سیادی بدار ایت گڈا اے ادارہ پہ سلیبس ءِ جوڑ کنگ ءَ بلوچستان ایجوکیشن ڈیپارٹمنٹ ءَ جوانیں ءُُ بودناکیں مردم دات کن انت کہ آہاں ایجوکیشن ڈیپارٹمنٹ وت نزانت اگاں سیکرٹیری ایجوکشین اے بابت ءَ گامگیج بزور ایت ءُُ وت گوں اے اکیڈیماں سیادی بداریت گڈا بلوچستان ءَ اے زبانانی سلیبس جوان تریں رنگے ءَ جوڑ بوت کن اَنت۔