’’وتی سرءَ بچار گْوشئے کہ بینگے ءَ بستگ۔۔۔ منی سرپرنہ بیت اے چونیں دابے کہ سرءِ مِیداں مہ چن۔۔۔‘‘۔ ’’داب ماب ہچ نیست۔۔۔ ترااگاں وتی مِید چِنّگ بہ کپ اَنت گڑا زان ئے۔۔۔‘‘۔ ’’من وتی میداں پرچابہ چناں۔۔۔‘‘۔ ’’زاناں جنین وتی میداں نہ چنائین اَنت۔۔۔

ہزاراں بلکیں لَکّاں انچین ہست اَنت کہ وتی میداں ٹاپ کن اَنت۔۔۔ نی وَ داب ہمیش اِنت کہ جنین مردینانی وڑ ءَ وتی میداں کسان کن اَنت۔۔۔’’ہیٹ اِنتِ شاں۔۔۔‘‘۔’’کئی۔۔۔‘‘۔ ’’حُدا ءَ دگے کئی۔۔۔ مید وَ جنین ءِ سپاہ اَنت۔۔۔ من اے گپ ءَ بھ سرپد نباں کہ جنین پرچا وتی میداں مردینانی وڑ ءَ کن اَنت، پد ءَ پتلون ہم پاد ءَ کن اَنت۔۔۔۔۔۔مباتاں شالہ سرزمین ءِ سرءَ۔۔۔۔۔۔‘‘۔ ’’حیر تئی بَدوا ءَ دنیا اے بہتاوریں جنیناں چہ حالیگ وَ نہ بیت۔۔۔چوناہااے گپ ءَ من گوں ترا سرجم ءَ تپاک کناں جنیناں پتلون کہ آئی ءَ ’’ سیکس‘‘ گْوش اَنت پاد ءَ کنگ نہ لوٹ ایت۔۔۔ ءُُ سگریٹ ہم کشّگ نہ لوٹ ایت‘‘۔ ’’ ءُُ تو وت ءَ نہ گندئے روچے پورائیں ڈبی یے حالیگ کنئے دور دئے۔۔۔‘‘۔ ’’من ءَ اے حَکّ ہَست۔۔۔ پرچاکہ من مردے ہاں۔۔۔‘‘۔ ’’ترا اے حَکّ کئے ءَ داتگ۔۔۔ نی من تئی واست ءَ روچے یک ڈبی یے ءَ چہ گیشتر نہ لوٹائیناں۔۔۔‘‘۔ ’’ وہدے تئی دزگوہار کاینت گڑا آیاں سگریٹ چہ کُجا رس ایت‘‘۔ 
’’آسگریٹ کدی کشّ اَنت۔۔۔‘‘۔ ’’چوشیں سیاہیں دروگ ءَ مہ بند۔۔۔وہدے آکاینت تومنی سگریٹ ءِ ڈبّی ءَ چست کنئے برئے۔۔۔ باکس ءَ ہم بَرئے گوں۔۔۔ داں کہ من ترا گوانک مہ جناں میاراں سگریٹ ءِ ڈبی منی دست ءَ نہ کپ ایت، وہدے کہ دست ءَ کپ ایت گڑا آئی ءِ تہا پنچ سگریٹ گاربیت۔۔۔‘‘۔ ’’پنچ سگریٹ۔۔۔ دروگ ءَ ہمیش اِنت کہ توؤِ بندگ ءَ ئے ۔۔۔ آبزّگ ایلّتے یک سگریٹے کشّ اَنت۔۔۔‘‘۔ ’’یک سگریٹے کشّ اَنت۔۔۔گوْشئے آیانی واست ءَ سگریٹ ءِ کشّگ گرانیں کارے۔۔۔‘‘۔ ’’من گوں تراباواست کنگ نہ لوٹاں۔۔۔ بیدے باواست ءَ ترادگے کاروَ نیست۔۔۔‘‘۔ ’’ من ءَ ہزار کارہَست۔۔۔ تو کجام زحم ءَ جنگ ءَ ئے۔۔۔ سجائیں روچ ءَ کپتگئے واب ئے‘‘۔ ’’جی ہو۔۔۔تو بیست ءُُ چار ساہت ءَ آگہہ ئے ءُُ وزیپہ کنگ ءَ ئے۔۔۔‘‘۔ ’’وزیپہ ءِ گپ ءَ یلہ دئے۔۔۔ بلے من اے گپ ءَ گْوشت کناں کہ من بس شپ ءَ شش ساہت ءَ وپساں۔۔۔‘‘۔ ’’ءُُ روچ ءَ۔۔۔‘‘۔
’’ہچبر نہ ۔۔۔ حُشک ءَ سئے چار ساہت ءَ چماں بندکناں تچک باں، چوکنگ ءَ مردم ءَ تاہیر رس ایت۔۔۔ درستیں ژندی دیر کاینت۔۔۔‘‘۔ ’’توژند چون بئے۔۔۔ توزاناں کجام مَزُوری ءَ کنگ ءَ ئے۔۔۔‘‘۔ ’’اے اگاں مَزُوری یے نہ اِنت گڑا چی یے۔۔۔ سُہب ءَ مہلہ پادکایاں۔۔۔ روتاک واناں ۔۔۔یکّے نہ بلکیں بازینے۔۔۔ پد ءَ چُنڈے چناں وراں۔۔۔جان شودان ءُُ تئی ہمروچیگیں کوکارءُُ وائیانی گْوشدارگ ءِ حاتراوت ءَ ساڑی کناں۔۔۔‘‘۔ ’’بزاں اِش اِنت تئی مَزُوری۔۔۔تو اے گپ ءَ بہ کن باریں کہ اے کوکار ءُُ وائیانی گپ داں کُجا راست انت۔۔۔‘‘۔ ’’داں ہمودءَ کہ ایشی ءَ راست بیگ لوٹ ایت۔۔۔ اول اولسرءَ۔۔۔ من گْوشگ لوٹاں کہ سیر ءِ اولی دوئیں سالاں زند پہ گیگ گوزّگ ءَ اَت بلے پد ءَ نزاناں تراچونیں جِنّ یے ءَ گپت، نی وَ ہمروچیگیں جاک ءُُ جَلّل تئی آدت جوڑ بوتگ۔۔۔ چومن نزاناں ایشی ءِ سوب چی اِنت۔۔۔‘‘۔ ’’سوب ءِ سرپد بیگ چہ مردینانی وَسّ ءَ ڈنی گپے۔۔۔ شما سرپد بیگ ءِ جہد ءَ ہم نہ کن اِت۔۔۔‘‘۔ ’’تو زاناں سرپد بیگ ءَ کِلّئے۔۔۔ چوشیں روچے نیست کہ تو ہنرے مہ ساز ئے۔۔۔ مرچی بگوْش چی بوتگ کہ توملک سرءَ زرتگ۔۔۔‘‘۔ ’’ گوشئے اے گپے نہ اِنت کہ چُنت ماہ اِنت تووتی سرٹاپ نہ کرتگ! تو وتی واسکو ٹانی کالر دیستگ انت۔۔۔ کُچّکے بہ چَٹ ایت ئِ سیر کنت۔۔۔‘‘۔ ’’شودگ ءَ راہ اِش بدیاں۔۔۔‘‘۔ ’’ساری ءَ وتی سرءَ شودائیں۔۔۔حُدا ءِ سراِنت، تئی میدانی گندگ ءَ شانگ کیت۔۔۔ دل گوْش ایت گاسلیٹ اِش پرّیچ ءُُ ڈیلے بجن ئِ ۔۔۔‘‘۔ ’’داں کہ منی کسّہ ہلاس بہ بیت۔۔۔ بلے من ءَ تئی اے واہگ ءِ سرءَ ہم ایراد نیست۔۔۔بُروچُلّ ءَ گاسلیٹ ءِ ڈبی ءَ زیر ءُُ بیار۔۔۔ ٹَلّائی منی سرءَ باکسی ڈیلے بجن ءُُ منی سرءَ بدار۔۔۔داں کہ تواسترھے بہ بئے۔۔۔‘‘۔ ’’اے کار ءَ ہم تووت بکن۔۔۔ اگاں من آس ءَ مان بداراں گڑا من جَزّماں کہ توگوْشئے کہ تو ہچ کارءِ وڑ ءَ نزان ئے۔۔۔‘‘۔ ’’ اے گپ وَ راست اِنت کہ تو ہچ کار ءِ وڑءَ نزان ئے۔۔۔ ورگ ءِ گرادگ ءَ تومُسئے، گُد ءِ دوچّک ءَ توحیران ئے۔۔۔ لوگ ءِ پلگارگ تئی دست ئِ گپے نہ اِنت، چکانی رودینگ ءُُ چار ءُُ گند وَ انگت مزنیں گپے۔۔۔‘‘۔ ’’جی ہو۔۔۔داں انگت ءَ چکانی چست ءُُ ایر ءَ ماشالہ تو کنگ ءَ ئے، من وَ ہچ کاریگے نیاں۔۔۔‘‘۔ ’’ من اے بابت ءَ ہچ گوْشگ نہ لوٹاں۔۔۔ تو ہم حُدا ءَ بچار اے باواست ءَ کُٹین‘‘۔ ’’ من کُجا باواست ءَ آں۔۔۔تو وَ انچکیں گپے ءَ گوْشئے کہ باواستے‘‘۔’’تئی گور ءَ ہرگپ کسانیں گپے بیت! تومنی ہوش بُرتگ۔۔۔ منی سر ءِ مید ہروہد ءَ ہمنچو بوتگاں۔۔۔ ءُُ تو اے گپ ءَ شَری ءِ سرءَ زان ئے کہ منی گور ءَ انچو وہد کجا ہَست کہ من ہجام ءِ گور ءَ بروآں۔۔۔‘‘۔ ’’جی ہو۔۔۔ توچہ وتی مستیاں گیش نئے ترا وہد کُجا رس ایت۔۔۔‘‘۔ ’’کجام مستیاں چہ۔۔۔‘‘۔ ’’توچی کارکن ئے۔۔۔ کجا نوکری کن ئے۔۔۔ ترا چنچو پگار رس ایت، ہما کارکہ کمے زیمت کشی لوٹ ایت آکار ءَ تئی گور ءَ کارچ ءِ نام پِراِنت‘‘۔ ’’ توچی گوْشئے من زیمت کشی نہ کُرتگ۔۔۔ ہمے گوستگیں روچاں من ہِشتانی رسانگ ءِ ٹھیکہ زرتگ اَت، توزان ئے من شپ ءُُ روچ یک کُرتگ اِت اَنت‘‘۔ ’’کارہَراں کرتگ، تووَ واب بوتگ ئے‘‘۔ ’’ہرانی زمانگ شتگ بچارگ۔۔۔ لاری کار ءَ بوتگ اَنت۔۔۔ ءُُ من ءَ آیانی چار ءُُ گند کنگ کپتگ۔۔۔ دہ کروڑ ہشتانی ٹھیکہ بوتگ۔۔۔ من سجائیں شپ ءَ آگا بوتگاں۔۔۔‘‘۔ ’’ من اے گپ ءَ ہچبر نہ مَنّاں کہ تویک شپے آگھابوت کن ئے۔۔۔‘‘۔ ’’ایشی توجیل نی چی بیت کنت کہ توساری ءَ منی بابت ءَ وتی دل ءَ ردیں حیالے داشتگ ءُُ من زاناں کہ من ہزار شاہد بیاراں تو باور نہ کن ئے۔۔۔‘‘۔ ’’مدتے بیت کہ منی گور ءَ تئی اوست شتگ ، منی دل ءَ تراچے مستریں دروگ بندنیست‘‘۔ ’’بھتام ءِ جَنَگ ءَ تئی مٹیّں جنین دنیا ءَ درنئیت ۔۔۔ من ءَ یات نہ بیت کہ من وتی زند ءَ کدی دروگ بستگ۔۔۔‘‘۔ ’’ تو دروگ نبستگ۔۔۔ پیری تو گوں من ءَ گوْشت کہ من وتی سنگتے ءِ گور ءَ رؤگ ءَ ہاں، بلے وہدے بیگاہ ءَ تو پٹّے وارت۔۔۔ گڑا تو دریشاپ جنان ءَ گوْشت کہ من تامری باجنے ءَ گوں دپ کپتگ ءُُ آیَگ ءَ ہاں۔۔۔‘‘۔ ’’ آتامری باجن ہم پجاّروکے اَت۔۔۔ دژمنے وَنہ ات۔۔۔ گوْشگ ءِ مکسد اِش اِنت کہ وتی سنگتے ءِ جَن اِنت۔۔۔‘‘۔ ’’ تئی سنگتانی جن ہر وہد ءَ تامری باجن بنت یا کَسبّی‘‘۔ ’’ ایشی ءِ تہا منی میار چی اِنت۔۔۔‘‘۔’’گڑا میار منیگ اِنت۔۔۔‘‘۔ ’’آچتور۔۔۔‘‘۔ ’’پرچاکہ من گوں تو سیر کُرتگ۔۔۔ من نہ تامری باجنیاں ءُُ نہ کَسبّی یے۔۔۔‘‘۔ ’’من ءَ تامری باجناں ءُُ کَسّبیاں چہ سک بَدکیت۔۔۔ من ءَ گوں اِشانی موٹ ءَ نہ کپتگ۔۔۔ اے جنین نہ اَنت سلیٹ اَنت، اِشانی سرءَ کسے ہم دوگال یادراجیں سیاہگے نبیس اِت ءُُ کور کرت کنت۔۔۔‘‘۔ ’’گڑا آروچی توچی ءَ تامری باجن ءِ گور ءَ شُتگ ئے۔۔۔‘‘۔ ’’منی سنگت ءَ من ءَ لوٹائینتگ اَت۔۔۔ من شُتاں۔۔۔ منی سنگت ءَ ہمے زیتاں گوں ہمے تامری باجن ءَ سیر کُرتگ کہ آئی ءَ چار سیر ساری کُرتگ بوتگ، ہمائی ءَ گوں منی پجاّرأِ کنائینت‘‘۔ ’’ گندگ ءَ آچتوراَت۔۔۔‘‘۔ ’’چار سیر ءِ کنگ ءَ رند ہم گندگ ءَ ورنا اَت۔۔۔ من گوْشاں کہ انچائیں نشتگیں ورنائیں جنکاں چہ ہروڑ ءَ شرتر اَت‘‘۔ ’’ اے تامری باجن چتوروتی جاندْراہی ءُُ ورنائی ءَ برجم داراَنت‘‘۔ ’’من اے بابت ءَ باز نزاناں۔۔۔ بس انچو زاناں کہ آوتی بدن ءِ حیالداری ءَ بازکن اَنت۔۔۔‘‘۔ ’’من اِشکتگ کہ اے مزنیں بد کردار بنت،پھک ءَ لگوشتگیں کھبگ۔۔۔‘‘۔ ’’حُدا بہتر زانت۔۔۔ من اے بابت ءَ ہچ نزاناں۔۔۔‘‘۔ ’’چوشیں گپاں تو ہروہد ءَ چیردئے۔۔۔‘‘۔ ’’وہدے کہ من چیزے ءِ بابت ءَ شری ءِ سرءَ مہ زاناں، گڑا چی بگوْشاں۔۔۔من انگت ءَ تئی تب ءِ بابت ءَ ہم پکّائی ءَ ہچ گوْشت نہ کناں، گہے آب گہے دریاب‘‘۔ ’’بچار!منی بابت ءَ ہچ چوشیں گپے مہ جن۔۔۔ تو ہر وہد ءَ منی بے اِزّتی ءَ کن ئے۔۔۔ من اِشی سگّ اِت نہ کناں۔۔۔‘‘۔ ’’من تئی بے اِزّتی کدی کُرتگ۔۔۔‘‘۔ ’’اے بے اِزّتی یے نہ اِنت کہ مردے وتی جَن ءَ پانزدہ سال ءِ ہمرائی ءَ رند بگوْش ایت من تئی تب ءَ نزاناں، اِشی ءِ بزانت اش اِنت کہ من شتاہوشیاں، نیم گنوکیاں، جاہلیاں‘‘۔ ’’اے ڈول ءَ حیر تونئے۔۔۔ بلے تئی سرپد بیگ سَک گران اِنت، من انگت ہم اے گپ ءَ سرپد بیگ ءَ نیاں کہ تومرچی منی میدانی رَند ءَ چی ءَ کپتگ ئے۔۔۔ تو وہدے گپے دپ ءَ پیچ ئے گڑا آگپ ءِ پُشت ءَ یک حاسیں گپے الّم ءَ بیت۔۔۔‘‘۔ ’’حاسیں گپ چی بیت۔۔۔ بس ترا گوں گوْشگی اَت کہ تئی سر ءِ میدمزن بوتگ اَنت بَرو چنائین ئِ ۔۔۔ ہجام ءِ دُکان چہ ادءَ چنچو دیر اِنت گیش ءَ چہ گیش سَدگام بیت۔۔۔ برو من تئی جانشودگ ءِ آپاں گرم کنائیناں‘‘۔ ’’رواں۔۔۔ سگریٹے کشّاں گڑا‘‘۔ ’’سگریٹ فگریٹ تو ہچ نہ کشّ ئے۔۔۔ داں انگت۔۔۔ بدار من ڈبی ءَ چاراں ۔۔۔ چوگڑا۔۔۔ بیست سگریٹ کشّ اتگ تو۔۔۔ پورابیست۔۔۔‘‘۔ ’’ اے انچو باز وَنہ انت۔۔۔ نی روچ ءِ دوازدہ بیگ ءَ اِنت۔۔۔‘‘۔ ’’ باز گپ مَکن۔۔۔ تچک ءَ ہجام ءِ گور ءَ برو۔۔۔ وتی سرءِ اے بوج ءَ دیرکنائین۔۔۔‘‘۔ ’’ روگ ءَ آں۔۔۔ ترادگے کارے ہَست گڑا بگوْش۔۔۔‘‘۔ ’’ من ءَ ہچ کارنیست۔۔۔ توبس من ءَ انچوش بَڈّگ لوٹ ئے‘‘۔ ’’شَریں گڑا من شتاں۔۔۔۔
اوشت’’اوشتاتگاں۔۔۔بگوْش‘‘۔’’ترا چنچو کلدار گوں اِنت‘‘۔’’پنچ سَد ءِ کْد ءَ۔۔۔۔۔۔‘‘۔’’توگڑا چوبہ کن۔۔۔ میدانی چِنّگ ءَ سرتر انارکلی ءَ برو سُہر ءِ مُندْریکّے زیر ءُُ بیار۔۔۔ مرچی منی دزگوہارے ءِ بوتن ءِ روچ اِنت۔۔۔۔۔۔ دوسَد یادو سَد ءُُ پنجا کلدار ءِ بیت۔۔۔۔۔۔‘‘۔’’منی ہجامی گڑا ہمود ءَ انارکلی ءَ وت بیت۔۔۔من روگ ءَ آں۔۔۔‘‘۔ 
(سعادت حسن منٹو )