اے گپ پیش ءَ گشگ بوتگ کہ وزیر اعلیٰ ءِ منسب کسانیں منسبے نہ انت ۔اے منسب ءِ واک ءُُ وس باز انت بلئے کسے ءِ دل بکش ات بلوچستان ءِ نوکیں وزیراعلیٰ قدوس بزنجو وتی سیاسی کرت ءُُ کاراں چشیں کلانہیں راجکارے نہ انت ءُُ بقول مئے دانشوراں پراسس ءَ چہ ہم اتکگ مردمے نہ انت بلئے ایشی ءَ ابید ہم بزنجو ءَ لہتیں انچیں ترندیں گامگیج زرتگ کہ مہلوک ابکہ ءُُ حیران انت ۔

اے درگت ءَ وانگ ءُُ زانگ ءِ پڑ ءَ آئی ءِ گامگیج ہم ستا کرزانت چوکہ این ٹی ایس پاس کرتگیں درائیں امیت واراں وانگ ءُُ زانگ ءِ بہرگ ءَ نوکری دئیگ ءِ جار ۔اگاں بچارات اے چشیں مزنیں کارے نہ انت ءُُ ننکہ ہما مردماں کہ مہلوک ءَ را نیپ ءِ ترس داتگ پریشی ءَ ترسے بوت کنت پرچکہ نیب اجتماعی کاراں ہچ وڑا اڑاند ءُُ گٹ نہ جنت ۔

اگاں پیسریگیں مزن وزیراں اے کار بکرت انتیں کس ءَ آہانی گہگیریں گردن نہ جت پرچکہ ایوک ءَ انسٹیوٹ جوڑ کنگ ءَ وانگ ءُُ زانگی دیمروئی بوت نہ کنت تما وہد ءَ داں مردمانی معاشی جیڑھ گیشوار مہ بنت اگاں پہ انسٹیوٹ وانگ ءُُ زانگی دیمروئی بوت انت گڈا مرچی کوئٹہ ءَ سریاب ءُُ کراچی ءَ لیاری ءِ درائیں بلوچ وانندہ بوت انت پمشکہ وانگ ءُُ زانگ ءِ دیمروئی ءَ ساری معاشی دیمروئی المی انت اے وڑا کہ لوگے ءَ وہدے شپ ءَ شام ءُُ روچے ءُُ ناری نہ کنت گڑا پہ چے وتی چک ءَ وانگ ءَ دیم دات کنت تری وانگ جاہ آئی ءِ لوگ ءِ کش ءَ بہ بیت ۔

ایشی ءَ ابید پیسریگیں مزن وزیراں زور مہلوک ءَ نوکری دئیگ ءِ بدل ءَ وانگ ءُُ زانگ ءِ بابت ءَ ’ واک کنگ ‘‘ جلسہ ءُُ جلوس کنگ ،نکل بندو کرو‘‘ بینر ءِ جنگ ءُُ واک کنگ ءِ چے زلورت انت ۔دنیا ءَ اے کاراں ہما مردم کن انت کہ آہاں واک ءُُ وسے نیست وتی پریات ءُُ حاجتاں مزن واکداریں مردماں سر کنگ ءِ حاترا واک کن انت ۔دگانی سرا بینر جن انت یاجلسہ ءُُ جلوس کن انت ۔وزیراعلیٰ بائدیں سوڈگ بکنت ءُُ آئی ءَ گوں واک ءُُ بینر ءَ کارے مہ بیت ۔

چاکرخان یونیورسٹی ءِ جار ءَ دیر بوتگ بلئے پیسریگیں مزن وزیرانی نمون اے بوتگ کہ گورنرے نہ کنت نون وزیراعلیٰ کہ صوبہ چیف ایگزیکٹیو انت اے چون بوت کنت وزیراعلیٰ ءِ دیم داتگیں سمری ءَ گورنر دستنال مکنت ۔آیا اے بلوچستا ن ءِ اسمبلی ءُُ بلوچستا ن ءِ مہلوک ءِ کم شرپی نہ انت پدا ہژدہمی ترمیم ءَ پد گورنر ءِ آ واک ءُُ وس ہم نہ بچ اتگ ۔

اگاں گورنر واکی ہنچو واکدار ءُُ زوراک بوہگ گڈا بلوچستان پنچ سالانی سروزیر پرچکہ اے کار چرآئی ءَ کنائینت ایشی ءِ مطلب ایش انت کہ گورنر زوراک نہ بوتگ ۔بلکیں وزیراعلیٰ نزور بوتگ انت یا آہانی گمان ہمیش بوتگ کہ یونیورسٹی ءُُ ایندگہ گامگیج ءِ زلورت نہ انت مہلوک بس مئے ’’ واک ( Walk) ءُُ بینر ءُُ روتاکی حال تراناں چارات ءُُ رازی بیت ۔

ہمے وڑا وزیراعلیٰ نیمگ ءَ بلوچستان ءِ بلوچ دمگاں دگہ دونوکیں ضلع جوڑ کنگ ءِ جار ہم باز جوانیں جارے ۔اگاں کہ زانتکاریں مردماں پیش ءِ یک وزیراعلیٰ ءَ را ہمے سوج داتگ بلئے آئی ءَ اوتاکاں حال ترانے دات کہ اے وڑا بلوچستان ءِ فنڈز تاوان بنت بلئے پدا مردماں دیست کہ بلوچستان ءِ ۴۷ ارب کلدار لیپس بوت انت آیا اے گوں وتی جند ءِ راج بدنیتی ءِ نہ انت کہ چہ وفاق ءَ ترا زرے رستگ پہ ہرچ کنگ ءَ بلئے ترا زر دل نہ بنت پہ مہلوک ءِ سرا ہرچ کنگ گڑا اے وفاق ءِ گناہ ءُُ قصور نہ انت بلئے دومی نیمگ ءَ ترا مہلوک ءِ حاترا نوکیں پروجیکٹ ءِ بابت ءَ گشگ بیت گڑا تو گشئے کہ بلوچستان ءِ فنڈز زوال بنت ۔

اے چونیں دوزواہی گپے کہ فنڈز زوال بہ بنت بلئے مہلوک بِلے زول بیت ۔پدرا انت کہ نوکیں وزیر اعلیٰ مہلوک حقیں ئیں جیڑہاں زانت ءُُ سرپد انت اے وہد ءَ مہلوک ءِ مستریں جیڑھ معاشی جیڑھ انت پرچکہ بلوچستان ءَ روزگار ءِ دگہ راہ ءُُ درنیست ۔

پمشکہ مہلوک ءِ آسرا سرکاری نوکری انت وہدیکہ حکومت ءِ جندے جار ہمیش انت کہ بلوچستان ءَ ۳۷ ہزار نوکری ہالیگ انت ۔بلوچستان ءِ مہلوک نوکیں نوکری نہ لوٹ ایت بلئے وزیراعلیٰ بائدیں ہمے ۳۷ ہزاریں نوکریاں پُر بکنت۔