گوستگیں بازیں روچاں ماگوں وتی اوتاگانی (کالم) کمک ءَ حکومت ءَ را لس مہلوک ءِ جیڑہاں گوں دلگوش گور کنائینگ ءَ اَنت ۔اے مئے راجی ذمہ واری اِنت کہ ما مدام چاگردی جیڑہاں چہ حکومتی سروکاں سرپدی بدئینت ۔ مروچی ہما جیڑہ کہ لہتیں روچ اِنت گندگ ءَ پیداک اِنت ءُُ ما وتی ہمے اوتاگاں ایشی ءِ بابت ءَ تران کنان اَنت آ اِنت ورد ءُُ وردنی ساماناں ملاوٹ ءُُ دونمبریں چیزانی بہر ءُُ بانگ کنگ اِنت ۔

بلئے بنجاہی سروکاں گوں اے جیڑگ ءَ گوں ہچ سروکارے نیست انت ۔اے جیڑگ ءَ گوں گوستگیں ہچ حکومتی سروکاں گوں سروکارے نہ بوتگ ایوک ءَ ہما کہ اے کارانی کنوکیں مافیا اِنت آ وتی اے نمبریں کار ءَ ہمک سال گیشتر کنان اِنت ۔

گوستگیں ماہ ءَ یک جوانیں گامگیجے بلوچستان ءِ لس مہلوک ءُُ چاگرد ءَ زرتگ اَت آ دونمبریں درمانانی بہر ءُُ بانگی ءُُ دُزی کتگیں درمانانی دیم پہ دیم ءَ بہا کنوکائی اِت کہ ایشی ءِ بابت ءَ آمیدگس کیس اوں کنگ بوتگ اَت ۔

چرے گامگیج ءَ لس مہلوک ءَ اے سدکی بوتگ اَت کہ بلکیں نوں درمان جاہاں جوانیں درمان پہ بہا دست کپ ایت ءُُ نمبریں درمانانی بیپاری بند کنگ بیت بلئے ایشانی اے ارمان ءُُ واہگ پیلو نہ بوت انت ءُُ بلوچستان ءَ ڈرگ مافیا چہ حکومت ءَ گیشتر زور مند ات۔پمشکا گوستگیں سیکرٹری صحت ءِ چیر دستی ءَ ہمے کیس اوں ہلاس کنگ بوت۔

اشکنگ ءَ ہما ڈرگ مافیا ءِ سروکاں مزن اگدگیں بنجاہی سروکاناں گشتگ کہ مارا اے درمانانی کروڑاں کلدار ءِ تاوان بوتگ، پمشکا اے کیس زوتاں بند کنگ بوت۔نوں حکومتی سروکانی ذمہ واری انت کہ آ اے پدرائی بکن اَنت کہ آ چہ اے ڈرگ مافیا ءَ گیش زور مند انت ءُُ پرے کار آہاں یکبرے پدا ہمے کیس ءُُ ہمے توار دوبر چست کنگ کپ ایت ءُُ ہمے کیس کہ ہما ئی ءَ آمید گیس ءَ آورتگ اَت آئی ءَ را وتی اگدگ دئیگ بہ بیت ۔

اگاں نہ لس مہلوک ءِ گور ا ہمے پدر بیت کہ ڈرگ مافیا زور مند اِنت ءُُ حکومت ءَ را گوں لس مردمانی زند ءُُ مرگ ءَ گوں سرکار نیست اِنت ۔ابید چہ ایشیءَ دمگی درائیں چیزاں ملاوٹ است ءُُ بوہگ ءَ انت انوگیں روچاں یک ویڈیو یے زیات چارگ بوہگ ءَ انت کہ آرت ءَ ہوار پلاسٹک ءُُ ربڑ ہوار کنگ بوہگ ءَ انت ۔اے کار مزنیں ملانی تہا کنگ بیت دکاناں ناں ۔

پمشکا بلوچستان ءَ ہم پنجاب ءِ وڑا فوڈ اتھارٹی ءِ بنجاہ یے جوڑ کنگ بہ بیت ۔سندھ ءَ اوں پہ دمگ ءَ فوڈ اتھارٹی ءِ کدگے جوڑ کنائینتگ۔بلوچستانءَ نہ ایوک ءَ فوڈ اتھارٹی یے جوڑ بہ بیت بلکیں انچیں لیب اوں جوڑ بہ بیت کہ آہود اے ملاوٹ بوتگیں چیزانی چار ءُُ تپاس کنگ بہ بیت ۔

درستاں ساری ہما ورگی تیل ءُُ روگنانی چار ءُُ تپاس کنگ بہ بیت اے پہ انسان ءَ ورگ ءِ لائق اَنت یا ناں ؟ ساری ءَ CNN ءَ کوئٹہ ءَ لوگانی تہا ہمے وڑیں دونمبریں تیل ءُُ روگن ءِ جوڑ کنگ ءُُ بازار ءَ بہا کنگءِ چیزے ویڈیو شنگ کتگ اَت۔ہمے وڑیں یک کارجاہ یے اوں بند کنگ بوتگ اَت ۔بنی آدم ءِ نادراہی ءِ بابت ءَ حکومت بائد انت ہچ وڑیں گامگیج ءَ چک ءُُ پد مہ بیت ۔

انوگیں سروزیر ءِ واہگ اِنت کہ آ وتی کسانیں وہدے ءَ گونڈگونڈیں کار بکنت بلئے مئے گوں سروزیر ءَ دست بندیءُُ سوج انت کہ آ اے جیڑگ ءِ بابت ءَ گامگیج بزور ایت ءُُ بلوچستان ءَ فوڈاتھارٹی جوڑ بکنت ءُُ مہلوک ءَ را ساپ ءُُ شریں بے ملاوٹیں وردن بدنت ۔ہما مردم کہ چشیں کارے ءَ گرگ بہ بیت آئی ءَ را داں زند زندان ءَ بندیگ کنگ بہ بیت ءُُ آئیءِ دکان بند کنگ بہ بیت۔

دومی گپ ایش انت کہ حرابیں ءُُ دونمبریں درمان جوڑ کنوکاں گونڈیں سزا ءُُ کسانیں جرمانہ گرگ ءُُ یل دئیگ بیت بائد انت ایشانی سزا اوں داں عمر کنگ بہ بیت دانکہ ملک ءَ یک نمبریں درمانانی بہر ءُُ بانگی کنگ بہ بیت اگاں چش نہ بیت داں حکومت پہ ہچ کارے نہ بیت ۔

واجہ صدیق بلوچ ءِ اے گڈی شونگال انت کہ رجانک کنگ بوتگ۔