تمپ ڈسٹرکٹ کہ نامینگ بوتگ اے ضلع کیچ ءِ دو مزنیں تحصیل ،تحصیل دشت ءُُ تحصیل تمپ ءَ ہوار کنگ ءُُ جوڑ کنگ بوتگ ۔راستیں گپ ایش انت کہ کیچ ءِ اے دوئیں تحصیل یک یک ءَ گوریچانی بلوچستان ءِ دوضلعانی کچ ءُُ کیاس ءَ بنت پمشکہ بائدیں اے دوئیں تحصیل جتا جتا ڈسٹرکٹ کنگ بوتین انت بلئے شاہو کہ شاہو یے بوت انت ماہو پساں نہ بوت۔اے ہم اللہ شگر انت ءُُ واجکارانی منت کہ اےء دوئیں تحصیلاں یکجاہ کنگ بوتگ ڈسٹرکٹ جوڑ کنگ بوتگ ۔ 

تحصیل تمپ ،تحصیل دشت، تحصیل بلیدہ ءُُ زاعمران ءِ مہلوک ءِ دیریگیں واہگ ءُُ تماہے بوتگ کہ کیچ ءَ اگاں سے، چار ناں گڈاں بائدیں دو ضلعاں بہر کنگ بہ بیت بلئے ایشی ءَ چہ مستریں بد بحتی چے بہ بیت کہ کیچ ءِ گیشتریں راہشون ءُُ جہگیراں مدام اے گپ ءِ مذمت کتگ کہ چریشی ءَ بلوچستان ءِ بجٹ ءِ سرا مزیں بار ءُُ ڈبہ یے کپیت بلئے ما دیستگ وہدے گوریچانی بلوچستان ءَ ضلع ءُُ تحصیل ءِ بہر ءُُ بانگ ءَ ہچبر بلوچستان ءِ بجٹ ءِ جیڑہ نہ بوتگ ماہم کہ تمپءَ ضلع جوڑ کنگ ءِ سرا بلوچستان ءِ ہما راج دوست ءُُ رہشون ءَ گوں برزتریں توارے ءَ اے جار جت کہ آ نہ لوٹ ات کہ گیش ضلع جوڑ کنگ بہ بیت ءُُ بلوچستان ءِ بجٹ زوال کنگ بہ بیت ۔

بلئے ہمے مرد ءِ جند ءَ نہ ایوک ءَ گوریچانی بلوچستان ءَ گیشیں ضلع جوڑ کت بلکیں چہ وتی بجٹ ءَ 47ارب ءَ گیش واپس وفاق ءَ دات انت گپ ایش انت وہدے وفاق ءَ اے زر ءُُ مال کہ صوبہ ءَ داتگ انت آئی ءِ گمان ہمیش بوتگ کہ اے زر صوبہ ءَ حرچ بنت ءُُ صوبہ چہ وفاق ءَ دگہ زر ءِ طلب ءَ کنت کہ نوں اگاں ہمے مردماں اے جست کنگ بہ بیت سالے 47ارب کلدار پدا وفاق ءَ دئیگ ءِ بدل ءَ شرتر نہ ات کہ اے زر ءُُ مال بلوچستان ءِ یک دگہ ضلع یے جوڑ کنگ ءُُ آئی ءِ سرا ہرچ کنگ بوتین انت ۔

ءُُ اگاں صوبہ ءِ تہا ضلع جوڑ کنگ تاوان ءُُ نقصانے بوت انت اول گوریچانی بلوچستان ءَ بچل ءِ سرا ضلع جوڑ کنگ نہ بوت دومی پنجاب ءُُ سندھ ءُُ کے پی کے ءَ گڈا پرچہ ہنچو ضلع جوڑ کنگ بوتگ ؟

سیمی اہم تریں گپ ایش انت دنیا سائنسی ءُُ منطقی حساب ءَ پراہ ءُُ شاہیگان بوہگان انت ( آ دگہ گپے کہ سائنسی ءُُ منطق اے رہنبد ءَ بلوچستان ءَ مردم شماری سرا ہچ وڑیں اثر نہ کتگ چوہمے مرد ءِ عقل ءَ ) ایشیءِ درور ءَ ماہ چو دات کنیں اولی جنگ عظیم ءَ دنیا ءِ ملک 32 یا 40 بوتگ انت بلئے دومی جہانی جنگ ءَ پد دنیا ءِ ملک 52 بوت انت وہدیکہ اے وہد ءَ دنیا ءَ ملک 2002 انت ۔

دنیا ءَ ملک ءُُ آبادی گیش ءُُ شاہگان بوہگان انت ۔ایوک ءَ بلوچستان ءَ ابرم ،سائنس ءُُ منطق ءِ رہبند چپوکائی روگان انت کہ آبادی کم بوہان انت ءُُ ضلع تحصیل ءُُ تحصیل ،یوسی بوہگان انت اگاں دنیا ءَ دگہ ہچ جاہ اے وڑ بوہگان نہ انت ضلع ءُُ تحصیل اے واستہ جوڑ کنگ نہ بنت صوبہ ءُُ ملکانی بجٹ زوال کنگ بنت ءُُ اگاں گپ ہمیش انت گڈا تحصیل ءُُ ضلع جوڑ نہ بوہگ ءَ زاناں کجا بلوچستان ءِ بجٹ لیڈرانی کیسگ درکپتگ ءُُ بزگیں مہلوک ءِ ہذمت ءَ حرچ بوتگ ؟ 

دومی وفاق صوبہ ءَ کہ بجٹے دنت آئی ءِ مول ءُُ مراد ہمیش انت اے زر ءُُ مال گیش ءَ چہ گیش مہلوک ءِ سرا حرچ کنگ بہ بنت ءُُ پدا ملک ضلع ءُُ تحصیل اے واستہ جوڑ کنگ بنت کہ ہمے ذر ءُُ مال جوانین ءُُ شہمیں وڑےءَ لس مہلوک ءِ آسراتی ءِ حاترا حرچ بوت بکن انت بلئے اگاں رہشوناں سوگند وارتگ کہ ما ضلع ءُُ تحصیل اے حاترا جوڑ نہ کنیں کہ اے ذر ءُُ مال کہ وفاق ءَ پہ بلوچستان ءِ مہلوک ءُُ الس ءُُ داتگ انت واپس بہ بنت۔ گڑا اشانی سوگند ئے سرے پروشگ گران انت ۔

چریشی ءَ دوتاوان بوتگ کہ مہلوک ءِ تہا بے روزگاری باز بوتگ دومی چرے گامگیجاں مہلوک ءِ تہا مارشت ودی بوتگ کہ وفاق نہ لوٹ ایت کہ بلوچ دمگ دیمروئی بکن انت پرچکہ راج دوستان مہلوک اے سدکی داتگ کہ ما زر ءُُ مالاں پمشکہ مہلوک ءِ سرا حرچ نہ کنیں کہ وفاق نہ لوٹ ایت ۔

اے مردماں کہ ضلع جوڑ نہ کنگ ءِ نیمون کتگ ایشانی گپ ہمیش بوتگ کہ وفاق زر ءُُ مال دنت بلئے چہ ماراں اے طلب کنت کہ گیشتریں زرءُُ مال حرچ کنگ مہ بنت ءُُ پدا وفاق دوبر دئیگ بہ بنت پدر انت کہ چہ اے وڑیں لیکہ ءُُ پگر ءَ وفاق کمزور بیت ءُُ پد منتگیں دمگانی مہلوک جہل جنی ءِ آماچ بنت بلکیں گوں وفاق ءَ کنتی بنت کہ آہانی رہشون لوٹ انت کہ مئے دمگ دیمروئی بکن انت بلئے وفاق ءُُ ایوک ءَ یک صوبہ یے نہ لوٹ ایت کہ بلوچستان ءِ مہلوک دیمروئی بکنت ءُُ وشحال بہ بیت۔