دنیا ءَ کہ مروچی انچو دیمروئی کتگ ایشی ءِ سوب ایوک ءَ سائنس ءُُ ٹیکنالوجی اِنت سائنسی وتی جوڑ کتگیں چیزاں چہ وت زانگ بیت کہ آئی ءَ چنچو دیمروئی کتگ ۔

مروچی ہمے سائنسی جوڑ بوتگیں چیزاں چہ دنیا ءَ ہر وڑیں آسراتی است انت ہمک مردم اگاں وتی زند ءَ پہ وڑے گوازینگ ءَ اِنت گڈا ایشیءِ سوب سائنس ءُُ ٹیکنالوجی اِنت بلئے ٹیکنالوجی ءِ دنیا ءَ مردم وتسرا نہ روت بلکیں وہدے ایشیءِ نپ ءُُ سیت مردماں سوج ءُُ سر کنگ بنت گڈا مردم ایشیءِ بابت ءَ بابت ءَ سرپد بیت ءُُ اے شعبہ ءِ نیمگ ءَ روت اِنت ۔

وھدے یک مردمے چرے شعبہ آنی بابت ءَ سرپد کنگ بیت ہمائی ءَ کیر ئر کونسلینک گشگ بیت بزاں اے گشگ بیت کہ کجام شعبہ ءَ چنچو نپ ءُُ سیت است اِنت ءُُ کجام شعبہ ءِ تہا مردم وانگ بندات مہ کنت کہ آئی ءِ آیوکیں باندات روشنا ءُُ وشحال بہ بیت ۔

مرچی ما دیستگ کناں کہ کیر ئر کونسلینگ نہ بوھگ ءِ سوب ءَ بازیں انچو نودر کہ آ وانگ ءُُ نبشتہ کنگ ہردوکاں نامدار اَنت بلئے ردیں شعبہ آں دور کن اَنت ءُُ نوبت ایش بیت آئی ءِ درائیں ھُب پہ ہمے ردیں شعبہ ءَ گو ں ھلاس بنت نوں اے اوں زانگی ھبرے کہ اگاں یک نوکیں مردمے ءَ اے گشگ مہ بیت کہ کجام شعبہ پہ وانگ ءَ آئیءِ شر اِنت گڈاآ وت وَ نزانت ءُُ وتی آسوگی ءِ ہاتر ءَ آ انچو شعبہ یے پہ وت گچین کنت آوکیں وھد ءَ پہ آئیءَ یک بلکیں جنجالے جوڑ بیت ءُُ رند ءَ ایوکءَ اپسوز کنگ ءَ آئیءِ گور ءَ ھچی نہ بیت بلکیں چشیں مردم چہ وانگ ءَ مایوس بیت ءُُ وانگ ءِ جند ءَ اوں یل کنگ ءُُ روت دگہ انچیں دیمی ءَ کہ آئی ءَ را کارءُُ روزے رست بہ بنت ۔

مئے چاگرد ءِ تہا مرچی ایوک ءَ ہما مردم ءَ را دوست دارگ ءُُ توسیپ کنگ بیت کہ آئی ءَ یک نوکری یے گپتگ ،آ ایشیءَ نچار اَنت آ چنچو ءُُ شریں مردمے ،آ چنچو کار ی یے چکے ،آئیءِ تہا ادب ءُُ اخلاق مان کہ مان نیست ، آ وہد ءَ مردمے پہ آئی ءِ کرد ءَ دوست دارگ بوتگ بلئے مرچی مردم پہ آئی ءِ اگدھا ءُُ نوکری ءِ ھساب ءَ چارگ بیت اے مردمانی وتی جند ءِ ردی اِنت یاکہ دور ءِ جند انچو بدل بوتگ اے گشگ نہ بیت بلئے اے گشگ الم بوت کنت اگاں مردمانی جوانی کیر ئر کونسلینک کنگ بہ بیت داں چو ھچبر نہ بیت کہ یک مردمے اے ہاتر ءَ وانگ ءَ یلہ نہ کنت ءَ اے شعبہ ءَ نوکری ءُُ جاب مان نیست ۔


گیشتریں گپ ایش اَنت کہ ڈنی ملک ءِ تک ءَ اگاں چارگ بہ بیت کہ آھود ءَ مردم وتی اگدھا ءُُ نوکری ءِ ھساب ءَ دوست کنگ نہ بیت بلکیں آ وتی کرد ءُُ شری ءِ ھساب ءَ دوست کنگ بیت ۔

چو نہ اِنت کہ آہانی پگر ءُُ سما ہما کہنیں دور ءِ ھساب ءَ انت بلکیں آہانی اسل ءَ رنگ ءَ دیمروئی ءُُ سوب مندی کتگ ۔بلئے مئے چاگرد ءِ تہا کیر ئر کونسلینگ نہ بوھگ ءِ ہاتر ءَ مہلوک ردی شعبہ چہ وت ءَ زوریت ءُُ رند ءَ ہمے سو ب ءَ آ وتی وانگ ءَ یلہ دنت ءُُ وتی ءِ جند ءِ نابودی ءَ را دومی ءِ کوپگ دنت بلئے وت ءَ بہہ ملام بار نہ کنت ۔آئیءِ ہمے کم زانتی ءَ وتی ہمرائی ءَ بازیں مردمے بزگ کنت بلئے اے میار منی دل ءَ آئی ءِ اوں نہ اِنت بلکیں اے میار ہما چاگر د ءِ زانوگر ءُُ بودناکیں مردمانیگ اِنت آئیءَ را سوج ءُُ سر نہ کن اَنت بلکیں آئی ءَ را اے اوں نہ گش اَنت کہ کجا چیز پہ آئیءَ شر انت ءُُ کجام چیز پہ آئی ءَ ھراب۔

اے درائیں گپانی گشگ ءِ مول ءُُ مراد ایوک ءَ ہمیش اِنت کہ ہمک مردم ءِ تہا یک نہ یک ٹیلنٹے است انت شرت آئیءِ درانگازی انت۔ بلئے مرچی کس ٹیلنٹ ءَ نچارایت بلکیں اے چاریت کہ کجام شعبہ ءِ نوکری ءَ چنچو زر مان ءُُ ایشیءِ سرجم ءَ کنگ چنچو جلدی بہ بیت ۔

چوکہ مرچی درائیں نوک باھندیں ورنا یا وَ میڈیکل ءِ تیاری ءَ کنگ ءَ انت یاکہ انجئینر ے اگاں چہ اے شریں ڈاکٹر ءُُ انجئینر جوڑ بہ بنت وَ شر انت بلئے ایشانی جاور اتکگ ادا سراِنت کہ کس ایشانی بدکردی آں ایشاں سرپد کت نہ کنت ۔مئے چاگرد ءِ تہا ناشرکار ءُُ بدکردی ءِ یک بلاھیں سوبے اے اوں است انت کہ کس سوشل شعبہ آں وانگ ءَ تیار نہ انت ،اگاں کسے ءَ سوشل شعبہ یے زرتگ ایوک ءَ ہمے ہاتر ءَ کہ ایشی ءِ وانگ چہ سائنس ءِ وانگ ءَ ارزان تر انت پمشکا آ ایشی ءَ آ ہساب ءَ نہ وانیت ۔

اے یک بلائیں جیڑگے پمشکا مارا ایشیءِ بابت ءَ باز جیڑگ ءِ درکار انت اگاں ما اے تک ءَ زوت جوانیں گام گیجے نہ زرت گڈاں دیم ءَ کیر ئر کونسلینگ نہ بوہگ ءَ یک زھگے وتی ودی کنوکیں ماتءَ ءُُ رودینوکیں پت ءَ اوں پجا نیاریت ۔

پمشکا اے تک ءَ مئے دیمے سروکاں باز کار کنگی انت آہاں لوٹیت کہ آ وتی کستریں زھگانی رہشونی ءَ بہ کنت آہاں شعبہ آنی ببات ءَ سر ءُُ بہ کنت داں پہ نوکری ءُُ اگدگ ءِ ہاتر ءَ نہ وانت پیشی مردماں گپے جتگ کہ وانگ انسان ءَ شریں مردمے کنت ‘‘ آہاں بہہ وتی کول ءُُ بتلانی تہا نہ گشتگ کہ وانگ مردم ءَ را بلائیں نوکری یے دنت ‘‘ اے کہ وانگ مردم ءَ مزنیں نوکری یے دنت اے مئے نوکیں دور ءِ جوڑ کتگیں کول ءُُ کرار اِنت کہ ورنائیں نودر بر ہرجائے کہ نوکری یے گندایت چمے ہمود ءَ سر سرجنت پمشکا کیر ئر کونسلینگ پہ راج ءُُ قوم ءِ دیمروئی پہ چکاں سک باز نپ بکش اِنت۔