مرچی بزاں ۸۱ ،فروری ۲۰۱۸ ءَ بلوچی اکیڈمی کوئٹہ ءِ چیر دستی ءَ بلوچی زبان ءِ نامداریں احوالکار ءُُ زانتکار واجہ صدیق بلوچ ءِ یاتگاری ءَ یک پرسی دیوانے برجم داشتگ اَت ۔اے دیوان ءَ بلوچی اکیڈمی ءِ اگدہ داراں ابید ،اے دگہ احوالکاراں اوں بہر زرتگ اَت ۔

دیوان ءِ جار چین بلوچی اکیڈمی ءِ وائس چئیر مین سنگ رفیق ءِ کوپگان اَت ۔ دیوان ءَ لالا صدیق بلوچ ءِ زہگ واجہ آصف بلوچ ،صادق بلوچ ، طارق بلوچ ،شانوار بلوچ ،ءُُ حسیب بلوچ اوں ہوار اِتاں ۔

شاہد سلیم بیوروچیف ڈان ءَ وتی گشتانک ءَ لالا صدیق بلوچ ءِ گوما وتی نند ءُُ نیادانی بابت ءَ بیان کتگ اَت ءُُ آئیءِ زند ءُُ کتہ کاریانی بابت ءَ تران کتگ آئی ءَ گشتگ ات کہ لالا صدیق بلوچ نہ ترسیں ندکارے نہ بوتگ اَت بلکیں بازیں دھمکی ءُُ بیہارانی پداں اوں آئی ءَ بلوچ ءُُ بلوچستان ءِ جاورانی بابت ءَ نبشتہ کنگ یلہ نہ کتگ اَت ۔آئی ءَ گوں وتی احوالکاری ءِ بابت ءَ سودبازی نہ کتگ ات۔واجہ ءَ نہ ایوکءَ اردو ءُُ انگریزی بلکیں بلوچی ءُُ براہوئی زباناں ہم نبشتہ ءُُ وانت کتگ اَت ۔واجہ ءَ وتی بلائیں نادراہی ءَ پد اوں چہ بلوچی ندکشی ءَ دست کش نہ بوتگ اَت ۔من کہ آئیءَ را دیستگ داں مدام آ گوں وتی لیپ ٹاپ ءِ دیم ءَ پہ روتاکاں شونگال ءِ نبشتہ کنگ ءَ بوتگ ۔

دیمترا دیوان ءِ واجہ امان اللہ شادیزئی ءَ وتی حیال درشان کتاں آئی ءِ گشگ اَت کہ منی گوں لالا ءَ اولی دیم گندی گوں زندانے ءَ بوتگ اَت ،آئی ءِ زندان ءُُ جیلاں ہم نبشتہ کتگ ءُُ ہچ نہ ترس اِتگ ہما وہد ءَ کہ بھٹو ءِ وہد بوتگ کہ کس ءَ یک دانکے اوں چہ دپ ءَ درکت نہ کتگ ہما وہد ءَ آئی ءَ پہ بلوچ ءُُ بلوچانی بابت ءَ نبشتہ کتگ۔اے آئیءِ مستریں دوستداری بوتگ ۔

واجہ ءَ رند لالا صدیق ءِ زہگ واجہ آصف بلوچ ءَ وتی تران ءَ گشتگ اَت کہ من گوں ماما صدیق بلوچ ءَ انڈیا وہدے علاج ءَ شتاں داں ہمود ءَ ہم صدیق بلوچ ءَ وتی روتاکانی گم پِر اِت ڈاکٹراں لہتیں روچ ءِ جلگ ءِ مارا گشتگ اَت منی دل ءَ اومان ات کہ انڈیا ءَ کمے بچاراں بلئے من ماما ءَ را یل دات نہ کت آئی ءَ من ءَ گشت کہ تو شت کنئے من گوں وتی روتاکانی شونگالاں کار کناں ،رند ءَ من ءَ ہم اے گمان نہ بوت کہ ما پہ علاج اتکگ انت یاکہ وتی روتاکانی کار ءَ ۔

آصف بلوچ ءَ گشتگ ات کہ ہما روچی کہ من واجہ صدیق بلوچ ءَ را پہ آزادی روتاک ءَ بلوچی تاکے ءِ گیش کنگ ءِ گشت داں آئیءِ پسو ایش کہ منی چک مرچی تو منی روتاک ءِ سرا پاگے دات ،،،چرے گپ ءَ وت پدر بیت کہ آئیءَ را گوں وتی زبان ءَ چنچو مہر است ات ۔اگاں زند ءَ وفا بکتیں داں آئیءِ واہگ ات کہ یک سرجمیں روتاکے درکنگ بہ بیت کہ آئی ءِ زبان بلوچی بہ بیت ۔ واجہ آصف ءَ اے کشتگ ات کہ انوں آئیءِ پنچ کتابانی سرا کار بوہگ ءَ انت ءُُ ہمے زوتاں چاپ اوں کنگ بنت ۔آئی ءِ اکیڈمی ءِ منت گپت ۔

دیوان ءِ گڈی بہر ءَ بلوچی اکیڈمی ءِ کماش واجہ ممتاز بلوچ ءَ دیوان ءَ ساڑی ایں مردمانی دل ءِ جہلانکاں منت گپت ءُُ آئیءَ گشتگ اَت کہ صدیق بلوچ نہ ایوک ءَ بلوچی اکیڈمی ءِ گوستگیں چئیر مین بوتگ بلکیں بلوچی ادب ءُُ احوالکار ءِ ہما بے بہائیں سر اَت کہ نوں آئیءِ ودی بوہگ نہ بوتیں حبر ءِ واجہ ءِ کنڈ وَ گرگ نہ بیت بلئے ہمے جہد کنگ بوت کنت کہ ہمائی ءِ راہ گپتی ءَ منزلانی شوہازی کنگ بہ بیت۔