نصیر کبدانی لبزانکی دیوان خاران ءِ چیردستی ءَ یک دیمدارھی مراگشے گل ءِ کارمستر واجہ مومن مزار ءِ پاگواجہی ءَ جم دارگ بوت۔ کہ آئی تہ ءَ نصیر کبدانی لبزانکی دیوان ءِ باسکاں ابید راھشون لبزانکی چاگرد ءِ باسک ، نودربر ، ٹیچرز ، وکلاء برادری ، احوالکار , لبزانت ءْ شاعراں بہر زرت۔وھدیکہ مراگش ءِ ھاسیں مہمان ڈاکٹر عبدالغنی ساسولی اَت ءْ جارچین ارمان آزگ اَت۔

مراگش ءِ بندات چہ بلوچی زبان ءِ کوھیں قلات ءْ نامداریں شاعر واجہ عبدالمجید گوادری ءِ یات ءَ گوں یک منٹ ءِ ھاموشی ءَ بوت۔پدا ارمان آزگ ءَ ملا محمد نصیر کبدانی ءِ بابت ءَ دیوان ءَ را سرپدی دیان ءَ گشت کہ ملا محمد نصیر کبدانی ، خاران ءِ نامداریں شاعرے بوتگ کہ 1914 ءَ خاران ءِ کوچگ بڈو کبدانی ءَ نائب محمد کریم ءِ لوگ ءَ ودی بوتگ۔

واجہ ءَ چہ درکسانی ءَ شعر ءِ گشگ بنا کرتگ اَت۔ آئی ءَ زندمان ءِ درستیں تک ءْ پہناتانی سرا وتی شعری بور تاچینتگ۔ واجہ ءِ شعرانی تہ ءَ مدگ ، زلزلہ ، موت ، مرد پیر ءْ جن ورنا ، جن پیر ءْ مرد ورنا ءْ دگہ بازیں شعر باز نامدار اَنت۔آئی ءَ گشت کہ ملا محمد نصیر کبدانی ءَ 4 نومبر 1993 ءَ اے کوڑوھیں امروز یلہ دات ءْ ابدمان بوت۔

چہ واجہ ءِ مرگ ءَ چیزے سالاں پد خاران ءِ لھتیں لبزانکی سنچ داروکیں ورناھاں خاران ءِ تہ ءَ یک لبزانکی گلے ءِ کمی مار اِت ءْ 1999 ءَ ماں خاران ءَ ملا محمد نصیر کبدانی ءِ نام ءِ سرا ” نصیر کبدانی لبزانکی دیوان” ءِ بن ھشت ایر کرت۔کہ مروچاں نصیر کبدانی لبزانکی دیوان ، خاران ءِ تہ ءَ ھر وڑیں علمی ءْ لبزانکی کاراں گوں گلائیش اِنت ھمے وڑا ملا محمد نصیر کبدانی ءِ شعرانی دپتر پٹ ءْ پول کرتگ ءْ ” گپتارانی شیوان ” ءِ نام ءَ رد ءْ بند داتگ ءْ کتابی رنگ ءَ دیما آورتگ۔

قیوم سادگ ءَ نصیر کبدانی لبزانکی دیوان ءِ باسکاں ھوار تیوگیں خاران ءَ را ” گپتارانی شیوان ” ءِ چھاپ ءْ شنگ بوھگ ءِ مبارکی دیان ءَ گشت نصیر کبدانی وتی اھد ءِ مزن بالادیں شاعرے بوتگ واجہ ءِ شاعری چہ وتی اھد ءِ شاعرانی شعراں ھچ وڑا کم نہ بوتگ۔نصیر کبدانی ءَ را گوں وتی راج ءْ سر زمین ءَ باز مہر بوتگ آئی ءَ وتی شعرانی تہ ءَ راج ءْ وتن ، وشی ءْ ایمنی ءَ را چو دوستدارئیگ ءَ نازینتگ۔

ھاسیں مہمان ڈاکٹر عبدالغنی ساسولی ءَ گشت نصیر کبدانی لبزانکی دیوان ءِ ورناھیں باسک ءْ اگدہ دارانی جہد ستا کرز اِیت کہ آیانی جہد ءْ کوشستاں نصیر کبدانی ءِ شعرانی دپتر مروچی مئے دست ءَ انت۔نصیر کبدانی لبزانکی دیوان ءِ ایگزیکٹو کمیٹی ءِ چیئرمین احمد مہر تران کنان ءَ گشت نصیر کبدانی ءَ را شاعری ءِ بودشت چہ پس ءْ پیرکاں گون بوتگ واجہ ءِ پس ءْ پیرک ھم نامداریں شاعر گوستگ اَنت۔

نصیر کبدانی بلوچی زبان ءِ مزن بالادیں شاعراں چہ یکے بلے بدبہتی ءَ واجہ ءِ سرجمیں شعر تنیگہ دست نہ کپتگ اَنت۔نصیر کبدانی ءِ شعرانی دپتر ءِ شنگ بوھگ پہ نصیر کبدانی لبزانکی دیوان ءَ بلاھیں سوبمندی یے زانگ بیت۔راھشون لبزانکی چاگرد ءِ کارمستر شمیم شاجی ءَ نصیر کبدانی ءِ شاعری ءِ سرا چمشانک دیان ءَ گشت نصیر کبدانی نوکیں دور ءِ شاعرے اَت بلے آئی شاعری اھدی شاعری یے اَت بزاں بلوچی شاعری ءِ دومی دور ءِ شاعری اَت کہ ایشرا ملائی دور ھم گشنت۔

آئی شاعری ءِ تہ ءَ رنگی ، راجی ءْ کؤمی ، نیکراھی ، دود ءْ ربیدگی ءْ وتی اھد ءِ چاگردی اڑ ءْ جنجالانی لبزی اکس گندگ بیت۔ واجہ ءِ شاعری ءِ تہ ءَ رخشانی لبزاں ابید فارسی ءْ عربی ءِ لبز ءْ تلمیح بازیں جاھاں کرمرز بوتگ۔ آ ایوک ءَ خاران ءِ نا بلکیں سرجمیں رخشان ءِ شاعرے اَت۔

بلوچی اکیڈمی کوئٹہ ءِ کارگشاد شکور زاھد ءَ وتی ھیال درشان کنان ءَ گشت نصیر کبدانی لبزانکی دیوان ءِ باسکاں گوں وتی جہد ءْ کوشستاں نصیر کبدانی ءِ شعرانی دپتر پٹ ءْ پول کرتگ کتابی سورت ءَ دیما آورتگ ءْ مروچی یک سوبمندیں دیمدراھی مراگشے اڈ اش داتگ من آیان ءَ مبارک باد گشین۔ نصیر کبدانی ءِ شعرانی دپتر ءِ چھاپ ءْ شنگ بوھگ پہ نصیر کبدانی لبزانکی دیوان ءَ نیکیں پالے۔

آئی ءَ امیت کشان ءَ گشت ایشی ءَ پد ھم ورنا خاران ءِ ایدگہ شاعرانی گار ءْ بیگواھیں شعراں پٹ ءْ پول کننت ءْ دیما کار اَنت۔ ایف جے فیضی ءَ گشت نصیر کبدانی خاران ءِ تہ ءَ بلوچی شاعری بن ھشت ایر کنوکیں شاعراں چہ یکے۔

آئی شاعری وتی مردمانی عشقی ءْ قوم دوستی ءِ مارشتانی درانگازی ءَ کنت۔من اے داوا نہ کناں کہ آ مزنیں شاعرے اَت یا کسانیں یا بس شاعرے اَت من بس اے گشت کنین کہ آ زیبائی ءِ شاعرے اَت۔آئی شاعری ءِ تہ ءَ وشیں ندارگ کشی یے گندگ بیت کہ آئی شاعری ءِ زیبائی ءَ زیبدار کنت۔

بلوچی زبان ءِ پروفیسرنورالحق شاہ ءَ تران کنان ءَ گشت اگاں نصیر کبدانی ءِ شاعری ءِ سرا چمے دور دیئگ بہ بیت گڑا آ مارا یکیں وھد ءَ رنگی شاعر ، نیکراھی شاعر ، راجی شاعر ءْ چاگردی شاعرے گندگ بیت۔ پریس کلب خاران ءِ کارمستر سفر خان راسکوئی ءَ گشت کہ ” گپتارانی شیوان ” خاران ءِ علمی ءْ لبزانکی سرڈگار ءَ ھؤر ءِ اولی ترمپ انت کہ خاران ءِ لبزانکی سرڈگار ءَ سیراب کنگ ءِ اولی گامگیج زانگ بیت۔

گڈسر ءَ نصیرکبدانی لبزانکی دیوان ءِ کارمستر مومن مزار ءَ آؤکیں مہمانانی منت گران ءَ گشت کہ ملا محمد نصیر کبدانی ءِ شعرانی دپتر ءِ شنگ بیئگ گل ءِ سنگتانی جہدانی برورد انت۔ نصیر کبدانی لبزانکی دیوان ءِ مدام ھمے جہد بوتگ کہ شاعرانی گار ءْ بیگواھیں شعراں پٹ ءْ پول بہ کنت ءْ دیما بیاریت کہ مروچی ” گپتارانی شیوان ” ءِ سورت ءَ مئے اولی سوبمندی انت۔