حکومت ءِ نیمگ مردم شماری ءَ ضلع ءِ کیچ بلوچستان ءِ سر شہر کوئٹہ ءَ پد بلوچستان ءِ مستریں شہر زانگ بیت ۔بلوچستان ءِ اے ضلع آبادی جہ منندی ءَ ابید زمینی کچ ءُُ کیاس ءَ ہم سک مزن انت ۔

پمشکہ کیچ ءِ یک تحیصلے تمپ ءَ را لیک گیشی ہلکے (حلقہ یے) نامینگ بوتگ بلئے چد و پیش ،پدر انت، کہ حاکم ءُُ واکدارانی دل ءُُ گمان ءَ بوتگ کہ کیچ ءِ چاریں تحصیل یک یک ضلع یے ءِ کیچ ءَ کد ءِ زیارتؔ ءُُ دکیؔ ءَ دودو بنت پمشکہ چہ ہلک بندیاں پیسر بلوچستان ءِ وزیراعلی میر قدوس بزنجو ءَ جار پر بیتگ ات کہ تمپ ءَ را یک جتائیں ضلع یے کنگ بہ بیت ۔

چدو پیش ہم تحصیل تمپ ءُُ دشت ءِ جہگیر میر محمد علی رند ءَ بلوچستان اسمبلی ءَ اے گپ دیم ءَ آورتگ کہ تمپ یک جتائیں ضلع یے کنگ بہ بیت بلئے بازیں واہ ءُُ پریتاں ابید ہم تمپ ءَ را ضلع ءِ کد ءُُ کچ دئیگ نہ بوت بلئے دومی دست ءَ چہ تمپ ءَ آبادی ءُُ زمینی کچ ءَ باز ءَ کستریں ہلکءُُ دمگ ضلع کنگ بوت انت حالانکہ اے تمپ ءِ مہلوک ءِ یک بنکی حقے بوتگ کہ بائدیں اشاں دیری دئیگ بوتگ انت بلئے بلوچ راج دوستیں گلانی بے دلی ءُُ بدنیتی ءِ سوب ءَ اے کار دیریں مہتل بوتگ اگاں اے راج دوستیں گلانی رہشوناں تمپ ضلع بکت انت گڈا تنگہ ہمے رہشونانی دگہ بازیں سیاد ءُُ وارثے داں بلوچستان اسمبلی ءَ سر وبوتگ ءُُ اشانی امبار ہم مستر بوتگ انت بلئے وائے گدان ءِ نشتگیں ۔۔۔؟

وہدے میر قدوس بزنجو بلوچستان ءِ سر وزیر بوت گڈا اے مرد ءَ تمپ ءِ مردمانی اے دیریکیں واہگ ءُُ تماہ چارات ءُُ وتی تربت ءِ تروتاب ءَ جار جت کہ آ تمپ ءَ را جتائیں ضلع یے کنت حالانکہ اے کار ایندگہ سروزیراں شرتریں وڑے ءَ کرت کتگ ات بلئے آہاں بلکیں نیئت ءُُ نشتگ ات کہ ہمے جار ءَ بجن انت۔ میر قدوس بزنجو اے جار جت بلئے بلوچ گش انت کہ دلمانگی نہ کش ایت، کہجین ات ۔

تربت ءُُ تمپ ءِ مہلوک میرقدوس بزنجو ءِ پرے کار ءَ سک وش ءُُ گل بوت انت کہ ضلع کیچ ءِ مردماں مزنیں آسراتی رسیت۔پرچکہ گوریچانی بلوچستان ءَ بازکسانین زمینی ہلک ضلع جوڑ کنگ بوتگ انت وہدیکہ زرباری بلوچستان ءِ سکیں ٹوہیں زمینی ہلک ءُُ آبادی ءِ درچ ءَ مزنیں دمگ چہ ضلع بوہگ ءَ سند ءَ محروم انت ۔اے درچ ءَ بژنی گپ ایش انت کہ وزیراعلی بزنجو اے جار پریں دو ماہ گوستگ بلئے تمپ ءِ ضلع بوہگ ءِ کار بنا نہ بوتگ ۔

اے درچ ءَ بازیں مردمانی گشگ ایش انت کہ اے بلوچستان ءِ سروزیر ءِ نیمگ ءَ ایوک ءَ سیاسی جارے کہ آئی ءَ ماں تربت ءَ وتی ساڑی بوہگ ءِ وہد ءَ کیچ ءِ مردماں وش کنگ ءِ حاترا پرینتگ بلئے وتی واتری ءَ پد وزیراعلیٰ چہ وتی چرے تران ءُُ جار ءَ بے ترانگ انت اگاں اے وڑیں گپے گڈا پہ مکران،تربت ءُُ تمپءِ مہلوکءَ وشیں گپے نہ انت ۔

پرچکہ بلوچ میار ءِ ردا اے پہ دمگ ءِ مہلوک ءَ کلاگےْ دومی مہلوک ءَ گوستیگں 72سالاں ہنچو گپ ءُُ حبرانی سرا رپینگ بوتگ ءُُ مہلوک میر قدوس بزنجو ءَ وش بوتگ کہ آمہلوک چو ایندگہ رہشوناں کلاگ نہ گپت ءُُ گوں آہانی جوزگ ءُُ مارشتاں گوازی نہ کنت بلئے اگاں قدوس بزنجو ایوک ءَ سیاسی حال ترانے دیم ءَ آورتگ ءُُ مہلوک ءِ توازہ کتگ گڈا اے وت پہ میر قدوس بزنجو ءُُ پہ حکومت ءَ جوانیں گپے نہ بیت۔

بلئے اگاں قدوس بزنجوءِ مہلوک کلاگ نہ گپتگ ءُُ پہ سنگینی اے گپ ءَ دیم ءَ آؤرتگ گڑا بائدیں میر قدوس بزنجو چہ آؤکیں گچین کاریاں پیسر تمپ ضلع بوہگ ءِ گامگیجاں بزور ایت ءُُ دمگی واکداراں کھڈن بکنت کہ تمپ ءِ ضلعی دروشم ءَ جوڑ بکن انت تنکہ اے ضلع ءِ نام ءِ شرپ میرقدوس بزنجو ءِ نام ءَ بہ بیت ۔چو مہ بیت کہ کاراں قدوس بزنجو بکنت ءُُ باندا دگہ سروزیرے اے ضلع ءِ تورہءَ وتی نام ءَ بہ کنت۔