اے حبر منی نہ اِنت بلکیں یک دیوانے ءَ سے ءُُ چار سنگتانی دپ ءَ ات کہ ’’بلوچاں ما بلوچستان مئیگ اِنت ءُُ بلوچی زبان بلوچانی زبان اِنت‘‘باریں پرچہ بلئے من ءَ اے گپ ایشانی دوست نہ بوتاں چو گشت نہ کناں کہ پرچکہ من ءَ ایشانی گپ دوست نہ بوتاں بس نہ بوتاں ۔۔۔!!!

مرچاں دیواناں آ تام ءُُ لذت وَ نیست انت کہ پیش ءَ بوتگ پرچہ کہ نوں ہمے شُمّیں موبائل نامیں چیز ءَ کس ءَ را کسی نہ کتگ من ہم دیوان ءَ گوں ہمے شُم جت ءَ گوں سرءُُ لینڈ اِتاں داں چماں یک ویڈیو یے کہ سنگتاں وٹس اف ءَ روان داتگ انت۔

کہ آہود ءَ من گنداں کہ یک جنین آدمے کہ اسکولے ءَ را استادے اَت ءُُ بی بی سی ءِ کارگشادے آئی ءَ گوں تران کنگ ءَ ات۔

آوتی وانگجاہ ءَ باریں چتوریں زبانے ءَ زہگاں وانینگ ءَ اَت پرچہ انگریزی وَ نہ اَت ،اردو کہ پاکستان ءِ پنڈاِتگیں زبان انت آ اوں نہ اَت اے دگہ وڑیں زبانے اَت بلوچی ءِ وَ جست ءَ مہ کن کہ ایشی ءَ وَ کس کدئے چل اوں جست نہ کنت اے کجام زبان اَت رند ءَ وتی ہمے کارگشاد ءَ گوادر ءِ نام گپت داں زانگ بوت کہ اے وَ چائینہ زبان اِنت۔۔۔۔۔

یا منی رب اے چتوریں قومے کہ وتی زبانے اشتگ ءُُ انچیں زبانے ءِ پد ءُُ رنداں کپتگ کہ ایشی ءِ ساز ءُُ ساماناں کس نہ گپتگ کہ روا نہ کن اَنت گڈاں ایشیءِ زبان ءُُ سنگتی چون رواکنت ۔۔۔۔۔؟بلئے بے سریں راج ءُُ بے سریں سودا۔۔۔۔لہتیں روچ پیسر ہما کالج ءِ لہتیں منی بے زانتیں گوہاراں تربتی ءُُ پنجگوری کت ءُُ ہمے گشت کہ ما تربتاں وتی چاتانی جنگ نیلاں ءُُ چائینہ ءِ مردماں وتی لوگ ءَ کل اَنت ۔۔۔۔

آآآآآ بلئے آ بے بحت ءَ نزانتگ کہ چائینہ ءِ مردم پرتو چات ءِ جنگ ءَ نہ یتکگ بلکیں تئی جند ءَ ،تئی ءَ ربیدگاں ،تئی دودءُُ دومانانی چات ءَ کنگ ءَ اتکگ ءُُ اے پرتو نہ یتکگ اَنت کہ یک وانگجاہ یے ءِ استادے بگوشیت کہ مئے زہگانی حاترءَ چائینہ وانگ الم اِنت ۔ہما گپ کہ پیسر ءَ من گشتگ کہ من بد ءُُ ضد اتکگ اَت کہ وہدے آ سنگت ءَ گشت کہ بلوچی بلوچانی زبان اِنت ،بیا بچار کہ تئی زبان ءِ چے حال انت۔

ہما جاگہ کہ سید وڑیں بلوچی زبان ءِ دیوانگے ودی بوتگ آہود ءِ یک استادے کہ گشیت کہ مارا چائینہ ءِ زبان ہیئل برگی انت ،ہما جنین آدم کہ آئیءِ وتی بلوچی پہک ءُُ ذگر نہ انت بلکیں ہوار ءُُ سوارانت آ گشیت کہ مئے چکاں چائینہ ءِ زبان ہیئل برگی اِنت۔۔۔۔!!

! بیچارگیں سید شر انت کہ کراچی ءَ کل اِنت اگاں گوادر ءَ بوتیں الم ءَ شپ ہمے جنین آدم ءِ گس ءَ پہ جنگ ءُُ مڑ ءَ شتگ اَت بلئے میار آئی ءِ نہ انت بلکیں مئے سروک ءُُ زانتکارانی اِنت آگپ وَ باز جن اَنت کتابانی کتاب اوں نبشتہ بوہگ ءَ انت گوادر ءِ جند ءِ تہا چون چونیں نبشتہ کار ءُُ شاہ زانت بوتگ ءُُ است اَنت۔

انچیں مردم کہ آیانی کتاب حسا ب نہ بنت بلئے ہمائی ءِ جند ءِ دمگ ءِ مردم گشنت کہ مارا چینی زبان ہیئل برگی اِنت کہ انٹرنیشنل زبانے ءُُ مئے آکبت گوں ہمے زبان ءَ اَنت گڑا ہما زانتکار ءُُ شاہ زانتانی زانت ءُُ زانگ ءَ برو بُنڈی ءِ ڈگار ءَ کیچ کور ءَ یلہ دئے ۔۔۔۔۔

سرکار وَ واب انت آوَ نہ زانت کہ یک قومے است انت آئیءِ مردم است انت آئیءِ مردم بزگ ءُُ بے وس اَنت ،آئیءِ راج ءَ را یک زبانے اوں است انت کہ وتی منّ ءَ دنیا ءِ کہن تریں زباناں شمار بیت بلئے اپسوز کہ مئے سروک ءُُ رہشون چرے گپاں بے سما اَنت ۔دنیا ءِ درائیں ملکاں زہگانی بنداتی وانگ بزاں پرائمری آوانی جند ءِ زبان ءَ دئیگ کانود انت پاکستان ءِ اے دگہ دمگاں اے کانود است انت ایوک ءَ بلوچستان ءَ نیست انت اے جست وَ ہرکس بہ کنت بزاں مرتگ ۔۔۔۔

بلئے مرگ وَ است انت برحق انت مرچی اگاں ناں باندہ وَ مِرّگی انت گڑابائدانت کہ مردم اے گپ ءَ وَ بجنت کہ چوش پرچہ؟ پمشکہ گمان روت کہ اے زبان بلکیں مئے وتی نہ اِنت پمشکہ گوں ایشیءَ چُش بوہگ ءَ اِنت اگاں ناں وتی دوستیں چیزاں کئے چُش بے در ءُُ بے بُن کنت؟بلئے یات بدار اِت کہ وہد یک ظالمیں چیزے آ ئی ءَ را اچ من ءُُ تو گیشتریں زوراکیں راج ءُُ قوم گار ءُُ بیگواہ کتگ اَنت ،چو مہ بیت کہ باندہ تئی آوکیں پُسگ ٹی وی ءِ دیم ءَ وتی ماڑیانی اندر ءَ بہ ننداں ءُُ بگش اَنت کہ بلوچی مئے زبان بوتگ۔۔۔۔بلوچانی زبان بوتگ۔۔۔!!!!