اے وہد ءَ ملک ءَ گچین کاریانی بج بجارگ انت بلئے زانگ نہ بیت کہ جاور حال چونیں تابے ور انت پرچکہ پاکستان ءِ بن دپتر ءَ اولی وار ءَ ملک ءِ ہما دمگ کہ آئی ءَ ہچبر گوں ملک ءِ حاکم ءُُ واکداراں گلہ ءُُ زنگے نہ جتگ ،اے نوبت ءَ زہر شانی ءَ انت کہ آہانی حاکمی چہ ایندگہ در ءُُ سراں برز تر منگ بہ بیت۔

اگاں کہ اے ہما ٹک ءُُ تبک انت کہ آئی ءِ جہل ءُُ کستریں دمگانی دیم پہ دیمی ءَ مدام بنجاہی حاکمانی پلہ مرزی کتگ بلئے بلوچ گشنت کہ پہ وت سک انت، پہ دگر ءَ وش انت ،اے وڑا اولی وار ءَ پنجاب ءِ حاترا’’ سنگ وتی ءُُ سر وتی ‘‘ ءِ جیڑہ انت چوکہ سنگ ءُُ سروتیگ انت ۔بوت کنت جیڑہ ہما سیمسراں بروت کہ ملک ءَ گچین کار ی بہ بیت ءُُ آوکیں اداروکی حکومت ءَ لہتیں سالاں دیم ءَ برگ مہ بیت بلئے اے درچ ءَ اے گمان ہم است انت کہ گچین کاری یے بہ بیت پرچکہ پاکستان ءِ اندری ءُُ دری جاور حال ہم ہنچو گیگ نہ انت۔

کہ واکدار گچین کار ی ءَ داں دیراں دارگ ءِ ہمت ءَ بکن انت ۔البت گچین کاری بہ بنت یاکہ مہ بنت بلوچ ءِ نگن کپے !اے درگت ءَ بلوچ گوستگیں 15 سالاں یک جنگے ءِ آماچ انت کہ آئی ءِ پشدر ءَ مزنیں دیم ہونی یے بوتگ ۔

بلوچ ءِ بازیں ورنا ءُُ کسان سند بیران بوتگ انت۔ہمے پشدر ءَ بلوچستان ءَ پارلیمان ءُُ اسمبلی ءِ جہدےءِ ہم نام گرگ بوتگ اگاں بلوچ راج دوستیں پارلیمانی کماش ءُُ گلانی نام گرگ بہ بیت گڑا اے ہما مردم انت کہ اشاں یک زمانگے بلوچستان ءَ ہون ءُُ حق ءِ گپ جتگ بلئے پارلیمان ءَ رسگ ءَ پد اے چہ اے گپ ءُُ کسہان پراموش بوتگ انت ءُُ اے وہد ءَ لاپ ءُُ پچ ءِ پشت ءَ گرّان انت ۔

اے منا فق ،پلینڈ ءُُ دوتل ءُُ دوپوستیں مردمانی پارلیمٹ ءِ روگ ءَ بلوچ ءَ چشیں نپ ءُُ سیتے نہ رستگ کہ آ سیت ءُُ نپ پاکستان ءَ پٹھان ،سندھی،ءُُ سرائیکی راجاں پہ وتی راج ءُُ کوم ءَ گپتگ ایشی ءِ سوب ءَ بلوچ راج ءِ تہا اے گپ ءُُ گمان پکا بوتگ کہ پارلیمٹ بلوچ راج ءَ ہچ وڑیں نپ ءُُ سیتے دات نہ کنت ۔

بلئے منی حیال ءَ گپ چش نہ انت کہ اگاں مردم ہورت بچارات گڑا گندایت کہ ہمے پاکستان ءَ سندھی،سرائیکی ،پٹھان ءُُ مہاجراں ہمے ملک ءِ پارلیمنٹ ءُُ اسمبلیاں پہ وتی راجی نپ ءُُ سیتاں بازیں کارے کتگ ءُُ انگت کار ءَ انت بلئے اے گپ ءَ پہ بلوچ راج ءَ تچک ءُُ راست نہ بیت یکے وَ ملک ءِ حاکم ءُُ واکداراں بلوچ ءَ را ہچبر نیشتگ کہ آ پکائیں ءُُ لاحقیں رہشوناں دیم ءَ بیارایت اگاں اے وڑیں راہشونے کزا دیم ءَ اتکگ گڈا آئی ءِ راہ ءُُ در بند کنگ بوتگ انت۔

بلئے اگاں کزا کسے دیم ءَ اتکگ گڈا ءَ آئی ءَ وتی پد ہم پیش داشتگ چوکہ باقی بلوچ، سردار عطا اللہ مینگل ،نواب اکبر خان بگٹی ،اسلم رئیسانی ءُُ اختر مینگل مردماں مدام وتی راجی ذمہ واری زانتگ ءُُ سرپد بوتگ انت پمشکہ پہ ملک ءِ واکدا ر ءُُ حاکماں اے مردمانی دارگ ءُُ سنبالگ مزنیں جیڑھ یے بوتگ وہدیکہ دومی دست ءَ قدوس بزنجو، ڈاکٹر عبدالمالک ءُُ نواب ثنا اللہ ؟ ادا گپ اے پادکیت کہ اگاں بلوچ وتی راجی جہد ءَ پارلیمان ءِ سیاست ءَ سنگین ءُُ جوانیں وڑے ءَ بکنت گڈا آ اے پڑ ءَ ہم سیاسی ءُُ معاشی نپ ءُُ سیت گپت کن انت۔

کہ چرے کار ءَ کہ بلوچ رہشون اے پڑ ءَ ایوک ءَ پہ بلوچ دشمن ءُُ سرکاری مردماں ویل بکن انت کہ بلوچستان ءِ پارلیمنٹ ء ءَ بلوچ دشمن ءُُ سرکار دوست بنداکنت ءُُ بلوچستان ءَ گوادر ،سیندک ءُُ ریکوڈک ءِ سودا بجن انت ۔

پرچکہ اے راستی وتی جاہ ءَ برجاہ انت کہ نواب اکبر خان بگٹی بہ بیت یااسلم رئیسانی اے ہما پارلیمانی رہشون بوتگ انت کہ اشاں پارلیمنٹ ءِ تہا ریکوڈک ،سیندک ءُُ سوئی گیس فلیڈ ءِ درگت ءَ ہما گامگیج زرتگ انت کہ بلوچ راج ءِ لوٹ ءُُ تماہ ءِ ردا بوتگ انت ءُُ اے مردماں سرکار بلوچ ءِ حلاپ ءَ آکاراں داشتگ کہ سرکار دلمانگ بوتگ ہمے وڑا اگاں 2018 ءِ گچین کاریاں بید ء اش کہ بائیکاٹ کنگ بہ بیت بلوچ راج ءُُ جہد کار پرچہ اے وڑیں جہد ءُُ کوشتے مکن انت کہ بلوچ ءِ دشمن ءِ جاگہ ءَ پارلمنٹ ءَ بلوچ ءِ دوستے دیم دئیگ بہ بیت کہ آ پارلیمنٹ ءِ تہا بلوچ دشمن ءُُ سرکار دوستیں مردمانی دیم ءَ داشت بکنت ۔