زند ءُُ مرگ ہردو راستی اَنت زند است داں مرگ اوں یک راستی یے ہمے رنگ ءَ دروگ است داں راست اوں یک راستی یے پمشکا ہرپیم ءَ مردم حاموش بہ بیت بلئے گویاکی ءَ کس داشت نہ کنت ہمے گویاکی ءُُ ہلوت یک وہدے کیت کہ جاک ءُُ سلوتاں مٹ بنت ءُُ ہمے جاک ءُُ سلوت پدا راستی ءُُ گواچن بنت ۔باز گوں حاموشی ءَ روت ءُُ باز گپے جنت کہ داں کرن ءَ گیر کیت کہ فلانی ءَ گپے جتگ اَت ۔
ووٹ ءُُ الیکشنانی دور ءِ بندات ءَ بازیں سُک سُک ءُُ مجلس بوہگان اِنت ۔بازیں مردمے کہ آوانی عکس مردماں گیرام کتگ اَنت آسہرا بوہگ ءَ اَنت ۔پارٹی جوڑ بوہان اَنت ءُُ پارٹیانی باسک ءُُ ممبر بہر بوہان اَنت۔
بازیں مردمے چہ وتی پارٹیاں در دومی سیمی پارٹیاں روگ ءَ دلمانگ اِنت داں چیزے نوکیں پارٹی ءَ گوں بندوک ءَ شتگ انت ۔اے درائیں جاور وتی جاہ ءَ بلئے بائد اِنت مردم چہ بلوچستان ءِ ہما تہی جاوراں بے حال مہ بنت کہ لس مردمانی حال چے اِنت ۔
سرجمیں بلوچستان ءَ انوں ووٹ ءُُ الیکشنانی تچ ءُُ تاگ اِنت بلئے لہتیں جاگہاں مردم پہ وتی زندرکیءَ اوں تچ ءُُ تاگ کنگ ءَ اِنت کہ ووٹانی وہد ءَ آ کجام شہر ءَ بروت کہ آئی جند ءُُ کہول پریشان مہ بیت۔
اے اوں یک راستی یے ،بلوچستان ءِ بازیں دمگاں مردم ووٹانی تیاری ءَ گوں مُشگل اِنت ءُُ بازیں دمگاں مردم وتی گر ءُُ دار ءَ چاڑکگ اَنت ۔بلئے ہمے نیام ءَ یک جستے ودی بیت کہ بلوچستان ءِ انوگیں جاوراں یک لس مردمے چے بکنت ؟؟؟آ حاموشی ءَ وتی لوگ ءَ بہ نندیت ،گوں پارٹی یے ءَ ہوار بہ بیت ،یاکہ دانکہ ووٹ ءُُ الیکشن ہلاس نہ بنت آ دگہ شہرءُُ میتگے ءِ باہوٹ بہ بیت؟ہمے رنگ ءَ چیزے سرپد ءُُ زانتکاریں مردم کہ آوانی مہر ءُُ دوستی گوں ڈیہہ ءِ مردماں بندوک اِنت۔
چے بہ کن اَنت آ ایوک ءَ بہ نند اَنت ءُُ سیاست ءَ بہ ڈوبار اَنت ،سیاسی مردماں بہ ڈوبار اَنت ،یکے دومی ءِ پچوکاں بہ بنت یا وت دیم ءَ بیا اَنت ءُُ بلوچستان ءِ جاورانی گہتری ءِ جہد ءَ ہوار بہ کپ اَنت ؟اِشکنگ ءَ اے بری لہتیں انچیں مردم ووٹ ءُُ الیکشناں دیم کائینت کہ آیاں بہہ ووٹ ءَ نہ اوشتاتگ اَنت،آوانی کرد پہ مردماں جوان بوتگ ،پہ بلوچستان ءِ لاوارثیں راج ءِ نودربر ءُُ بے دراں جوان بوتگ ،وت ہر ہما پوسٹ ءِ کہ سرا بوتگ اَنت۔
داں پہ راج ءُُ قوم ءَ چیزے کنگ ءِ واہگ اِش ماں دل ءَ بوتگءُُ نوں ہمے واہگ ءُُ ارمانانی گیشیں پیلوئی ءَ سیاست ءَ پیداک اَنت،باریں لس مردم ایشاں چتور چکاسیت ایشاں ووٹ دنت ءُُ سوبمندکنت یاکہ ہما پیشی چکاستگیں سراں یکبرے پدا چکاسگ بنت ۔پیسری لیڈرانی کرد مردمانی دیم ءَ اَنت کہ آوانی پہ راج ءَ کجام زہم جتگ بائد اے بری مردم نوکیں مردماں بہ چکاس اَنت ۔اگاں اے نوکیں مردم پہ را ج ءِ دردواری ءَ سوبمند نہ بوتاں داں دگہ لہتیں مردمانی کرد اولس ءِ دیم ءَ پدر بیت گڑا شرتر ہمیش اِنت کہ نوکیں مردم چکاس بہ بنت ۔یک گپے ءَ وَ درست سہی اَنت کہ مئے ملک ءَ گوستگیں سالانی حساب ءُُ کتاب اگاں دیم ءَ کنگ بہ بیت داں اے ملک ءَ الیکشن پہ نام اِنت ءُُ دائم ءَ سلکشن بیت۔
بزاں ہما مردم دیم ءَ آرگ بنت کہ بنجاہی حکومت ءُُ زورمندیں مردماں دوست بہ بیت آ مردم ہچبر پہ حکومتی ءَ آرگ نہ بیت کہ آ بنجاہی حکومت ءُُ زورمندیں مردمانی راہاں اڈاندے بیارایت۔
پیسری مردم یاسیاست کارانی کرد پہ اولس ءَ چے بوتگ آ زاہر اِنت بلئے ہما نوکیں مردم کہ نوک اَنت ءُُ آ ہچ حساب ءَ چکاس نہ بوتگ اَنت بائد ہما نوکیں مردم چکاسگ بہ بنت ءُُ چارگ بہ بیت کہ آ باریں چنچو آپ ءَ اَنت ۔اے سکیں دورے ءُُ اے دور ءَ ہما مردم کہ اگاں سیاسی حساب ءَ نا بلئے پہ مردمے ءُُ مردم کاری ءَ دیم ءَ بوتگ آ بائد دیم ءَ آرگ بہ بنت پرچکہ اے ڈولیں مردمانی اے جاور اں پکار اِنت کہ آ بے تماہ ءُُ واہگ ءَ کار کنگ لوٹ اَنت انوں انچیں مردمانی پکار اَنت۔