فلسفہ ءِ راجدپتر ءِ تہا آزاتی ءِ بابت ءَ اَنچیں نوبت ہم اتکگ کہ نفر ءَ وتی آزاتی پہ رضا یک اتھارٹی یے ءِ حوالہ کُتگ۔ اگاں ما ہمے ربیت ءِ رندگیری ءَ بکنیں گڑا زانگ بیت کہ اتھارٹی ءِ گْورا آزاتی ءَ چہ ،پہ رضا دست کش بوہگ ءِ عمل میزاں میزاں یک واہشتے جوڑ بوہان بوتگ۔

روبرکتی سیاسی فلسفہ ءِ تہا آزاتی ءِ اے وڑا حوالہ کنگ ءِ فکری ربیت مارا ٹھامس ہابس ءِ گْورا دست کپیت۔ اے نبشتانک ءِ تہا ہم آزاتی ءِ حوالہ کنگ ءِ گپ بیت بلئے اِدا ما وتی گپ ءَ چہ ایرک فرام ءِ فکری ریچ ءَ چہ بندات کنیں ءُُ پدا گپ ءَ ریس ءُُ پریس کنان ءَ ادارہ، نفر ءُُ آزاتی ءِ بنگپ ءَ نشان کنیں۔

فرام ءِ وانوک ہمے گپ ءَ نشان کن اَنت کہ انسان ءِ مستریں واہشت اتھارٹی ءِ وشان کنگ اَت ءُُ من سرپد باں اے واہشت انگت ہم مئے زندگی ءِ بے بہریں عملے نہ اِنت۔ بلئے منا سما بیت کہ ساری ءَ اتھارٹی ءِ وشان کنگ ءِ ڈُبّا انسانی مُچی ءِ کوپگان بوتگ ۔ بلئے ہستیں وہد ءَ نفر ءَ ایوک ءَ فیصلہ کُتگ کہ اتھارٹی ءِ وشان کنگ آئی ءِ وشیّانی بنزہ اِنت۔ ہستیں وہدءَ اتھارٹی یک انسانی طاقتے نہ اِنت بلکیں ادارہ اِنت۔

چونائی ءَ ہم مُچی ءِ تہا انسان وتا محفوظ سما کنت۔ اے درگت ءَ مُچی محفوظ بوہگ ءِ مارشت اِنت۔ پہ ہمے مارشت ءِ ازل ءُُ دلجم کنگ ءَ ماڈرنزم ءَ یک نیمگے ادارہ ءِ شکل ءَ مُچی یے جوڑ کُتگ ءُُ پہ نفری آزاتی ءَ نفر چہ انسانی اتھارٹی ءَ آزات کُتگ۔

ادارہ انسانی اتھارٹی ءَ چہ بہتر اِنت کہ ادارہ تبکبندی فرمان (categorical imperative) ءِ بنیاد ءَ محکم بوہان بیت، ءُُ ہمے ادارہ ءِ اتھارٹی بوہگ ءِ بنزہ اِنت۔ انسان پہ ادارہ ءَ وتی عقل ءِ کمال ءَ کار بندیت ءُُ ادارہ ءِ رہبنداں جوڑ کنت۔ بلئے پہ انسان ءَ عقل ءَ چہ زبہر بوہگ ءِ ساعت زانگ نہ بنت۔ بلئے ادارہ ءِ عقلی بنیاد ءَ نابود بوہگ پمیشکا ممکن نہ اِنت کہ نابودیں انسان ادارہ ءِ رہبندانی سازگ ءَ بہر زُرت نہ کنت۔

اے رِد ءَ ادارہ عاقل ءِ آزاتی ءَ ہچ وڑا زَدگ نہ کنت۔ بلکیں ادارہ عقل ءِ محفوظ کنگ ءِ جوڑشت ءُُ ساختے۔ اے درگت ءَ آ نفر ءَ یک عاقلیں اتھارٹی یے ءِ بنیاد ءَ آزاتی ہم دنت ءُُ محفوظ بوہگ ءِ مارشت ءَ اوں ۔

بلئے اگاں بچارئے اِدا ارزشت انسان (نفر) ءِ نہ اِنت بلکیں ادارہ ئیگ اِنت ءُُ ادارہ ءِ بستار مرزبومی اِنت۔بزاں آزاتی نفر ءِ نہ اِنت ادارہ ئیگ اِنت۔