امریکہ کماش ڈونلڈ ٹرمپ ءَ 8 مئی وتی یک کماشی میمورینڈمے ءَ گوں ایران ءَ وتی کتگیں منگ نامہ یے ءَ درکپگ ءِ جار پرینت ۔ امریکہ ءِ اے منگ نامہ پیسریگیں کماش بارک اوباما ءِ وہد ءَ گوں ایران ءَ کنگ بوتگ ات کہ آئی ءِ تہا یورپی ملکاں ہوار چین ءُُ روس ہم ہوار بوتگ ات انت ۔

اے منگ نامہ روس ءَ 2015 ءَ دیم ءَ اتکگ ات ءَ اے منگ نامہ ءِ رد ءَ ایران ءِ گشگ ایش ات کہ ایران ءِ نیوکلیر پروگرام چٹ ایمنی ءِ بیت ءُُ ایران عالمی ایمٹی چار ءُُ تپاس کنوکاں اے اجازت دنت کہ آ ایران ءِ ایمٹی پروگرام ءِ چار ءُُ ٹپاس ءَ بکن انت ۔اے درگت ءَ ایران رازی ات کہ یورنیم ءِ شر ءُُ جوان کنگ ءِ ریچءَ 98 درسد کنت اے منگ نامہ ءِ رد ءَ ایران ءَ را اے اجازت دیئگ بوتگ ات کہ وتی ٹیل ءَ درملکاں بہاکت کنت ءُُ گوں بازیں ملکاں بیپار ہم ۔

ہمے منگ نامہ ءِ رد ءَ ایران ءِ یک سدبلین ڈالر ءِ بازیں مال ءُُ ملکتے کہ ایران ءِ آشوب ءَ پد دنیا ءَ بند بوتگ ات انت آہاناں پچ کنگ بوتگ ات کہ چریشی ءَ ایران ءِ مالیات ءَ سارتیں دمے کش اتگ ات ۔زانتکارانی گشگ ایش انت کہ ایران ءَ منگ نامہ ءِ رد ءَ جوانین کردے پیش نداشتگ پمشکہ امریکہ ءِ نوکیں کماش ڈونلڈٹرمپ ءَ وتی 8مئی ءِ میمورینڈم ءِ دست رند ءِ پدءَ حالتران ءَ گشتگ کہ ایران ءَ گوں وتی 2015 ءِ نیوکلئیر منگ نامہ ءَ امریکہ ءُُ آئی ءِ ہم پنتیں ملک رد داتگ انت ۔

اے درچ ءَ ایرن ءَ نہ ایوک ءَ وتی نیوکلیر پروگرام برجم داشتگ بلکیں سعودی عرب ،شام ،بحرین ،اردن ، ءُُ عراق ءَ درکانودی رنگ ءَ دزمانجنی کتگ ءُ اے ملکاں امریکہ ءُُ عالمی براہندگانی تب ءِ کاراناں تاوان بار کتگ پمشکہ امریکہ ءِ نوکیں کماش ءَ ہوش کتگ ءُُ اے منگ نامہ ہلاس ءُُ وتی ہم پنتیں ملکاں کھڈن کتگ کہ گوں ایران ءَ دے ءُُ زور ءَ بند بکن انت ۔امریکہ ءَ گوں ایران ءَ وتی اے منگ نامہ ہما وہد ءَ ہلاس کتگ کہ وہدے آئی ءِ نیوکلیر جیڑہ گوں گوریچانی کوریا ءَ ٹہینتگ انت ۔

امریکہ ءِ کماش ءَ گوں کوریا ءِ کماش کمال جونگ ان ءَ 12 جون ءَ ماں امریکہ ءَ گندو نند ءِ جار جتگ ءُُ گوریچانی کوریا ءَ گوں امریکہءَ وتی نیوکلیر سلاہانی ہلاس کنگ ءِ منگ نامہ ءَ جاڑی ءُُ جریدگ انت وہدیکہ دومی دست ءَ سعودی عرب ،بحرین ،عرب امارات مسقط ءُ ایندگہ مزن ہور ءِ ملک چہ ایرانءِ نہ وشیں کار ءُُ رہبنداں بیزار انت ۔

اردن ءَ ہوتی یا گیانی پلہ مرزی ءُُ دھان سلاہ ءُُ ماں دیئگ بھتام ایران ءَ جنگ بیت ہمے وڑا چاروچ ساری اسرائیل شام ءَ ہما ہند ءُُ آہاں کہ بمباری کتگ اسرائیل ءِ ردا ہودا ایران ءِ ارد ءُُ سپاہیگ جنگ ءِ تیاری ءَ بوتگ انت ۔آدینگ ءِ روچ ءَ چہ عراق ءِ سیمسراں اے حال اتکگ کہ چہ ایران ءَ آوکیں کروڑاں ڈالر ایران نوازین پوسٹرے عراق ءَ گرگ بوتگ کہ اے ایران ءِ کش ءُ کر ءَ ملکاں دزمانجی شاہدی انت ۔

پدر انت کہ ایران ءِ اے کاراں آئی ءِ سُنی ہمساہگاں ہوار عالمی براہندگ ناوش ءُُ بیزار انت ۔پمشکہ امریکہ ءَ اے جار پرنیتگ کہ آ گوں ایران ءَ وتی 2015 ءِ نیوکلیر منگ نامہ ءَ ہلاس کنت ءُُ اے جار ءِ تہا اے گشگ بوتگ 90 یا 80 روچ ءَ پد امریکہ پدا ایران ءِ سرا مالیاتی ءُُ سیاسی بندش جنت ۔زانتکارانی گشگ انت کہ امریکہ ءُُ یورپی ملک ایران ءِ اے ناشریاں چہ بندر ءَ سہی ءُُ سرپد بوتگ انت بلئے آ چہ گوریچانی کوریاءِ کار ءُُ کرداں گیشتر تکانسر بوتگ انت پمشکہ آہاں اے نیمگ ءَ دلگوش گور کت نہ کتگ نوں وہدیکہ گوریچانی کوریا ءِ کماش گوں امریکہ ءَ وتی نیوکلیر گپ ءُُ رپ ءَ تپاک بوتگ ۔

اے وڑا امریکہ ءَ گوں ایران ءَ یک دست ءَ دو دست بوہگ گرانیں کارے نہ انت ۔پدا اے درگت ءَ سعودی عرب ءُُ اسرائیکی دو انچیں ملک انت کہ نہ ایوک ءَ چہ ایران ءَ بیزار انت بلکہ اے دوئیں ملکانی کوہین واہگ ءُُ تماہے کہ ایران ءَ آپی سنگے ءَ سر بکن انت ۔اے وہد ءَ کہ امریکہ ءُُ عالمی براہندگ چہ ایران ءَ وتی نہ وشی ءَ درشان کنگ ءَ انت پرے دوئیں ملکان اے پُلے ۔۔۔

دومی نیمگ ءَ مزن ہور ءِ بازیں ملکے چہ ایران ءِ رو ءُُ دم ءَ نہ وش ءُُ بیراز انت، پدر انت کہ اے ہم امریکہ ءِ پلہ مرزی ءَ کن انت۔ اے درچ ءَ پش کپتگیں ملک پاکستان انت بلئے پاکستان ءِ پیسریگیں آرمی چیف ءِ سعودی عرب ءِ اسلامی ارد ءِ کماشی ءُُ راحیل شریف ءِ ارد ءِ کماش ءِ وہد ءَ سعودی عرب ءِ نیمگ پاکستان ءَ 2 سد ارب ڈالر پہ سوگات دئیگ ءَ پد ایران ءِ نگاہ گوں پاکستان ءَ بدل بوتگ ءُُ ایشی ءِ اشارہ ایرانءِ واکدارے ءَ گوستگیں روچ ءَ گوں اے حال تران داتگ ات کہ اگاں پاکستان گوں سعودی عرب ءَ وتی سیادیاں برجاہ دارات گڑا ایران ءِ سیادیاں گوں ہندوستان ءَ مہ ڈوبار ات ۔

جیڑہ ایش انت کہ امریکہ سعودی عرب ءُُ اسرائیل اگاں ایران ءِ سرا ارشے کن انت گڈا پدر انت کہ پاکستان امریکہ ءِ ہوار ی ءَ سعودی عرب ءُُ اسرائیل ءِ پلہ مرزی ءَ کنت اگاں چوش بوت گڑا ایران ءِ نیمگ ءَ پاکستان ءِ سیمسر ترسناک بنت ءُُ اگاں پاکستان ایران ءِ پلہ مرزی ءَ بکنت گڈا امریکہ ،اسرائیل،افغانستان ءُُ سعودی عرب گوں ہندوستان ءِ ہوری ءَ پاکستان ءِ حلاپ ءَ گردانکے کش انت گڈا پاکستان ءِ گوریچانی ءُُ رودرتکی سیمسر نہ رک انت ۔

اے وہد ءَ جاور انچیں انت کہ دگہ راہ ءُُ درے نیست بلئے اگاں ملک واکدار ءُُ زانتکاریں سر بنند انت ءُُ چار ءُُ بچار بکن انت گڈا بوت کنت کہ نوکیں راہے در بئیت بلئے اے وہد ءَ جاور حال ہرچ وڑا جوان ءُُ وش نہ انت۔