بلوچستان کہ پاکستان ءِ مستریں صوبہ انت بلئے وار ءُُ بزگی ءِ آماچ اِنت ایشیءِ سوب ءَ اگاں کسے جست بہ کنت داں ہرکس ایشی ءِ ذمہ واری ءَ سیاسی گلءُُ پارٹیاں لڈ ایت ۔ءُُ آ درائیں مردم کہ ایشیءِ ذمہ واری ءَ پارٹی ءَ لڈ اَنت آ وتی جاہ ءَ پہک ءُُ راست اَنت ۔

وہدے راج پہ وتی سروکی ءَ مردمے گچین کنت داں گوں آئی ءَ چیزے وابستگی اوں دار ایت کہ آ پرائی ءَ کارے کنت ،پرائی درد ءُُ دورے ءِ پاگپان بیت بلئے مئے سروک ءُُ سیاسی گلاں گوں مردماں ہچ سروکارے نیست انت۔بلوچستان ءَ پارٹی وَ باز جوڑ کتگ بلئے بلوچانی حقی ایں پارٹی نہ رستگ ہما پارٹی کہ پہ بلوچاں یک حدے ءَ کار کنگ ءِ واہگ داریت آ منی چماں بی این پی اِنت۔

بی این پی ءِ انوگیں سروک واجہ اختر جان مینگل اِنت ہمائی سروکی ءَ اے پارٹی امبری گچین کاریاں بہر زورگ ءِ واہگ دار اِنت ءُُ یک حسابے ءَ آئی پارٹی اے اگدگ ءِ حق دار اِنت ۔پرچکہ اگاں آئی دست ءَ ہچی نہ بوتگ داں وتی زار شانی یے وَ مدام کتگ ۔واجہ ءِ پارٹی حکومت ءَ وَ نہ بوتگ بلئے پہ بلوچ را ج ءِ جیڑگ ءُُ جنجالانی شونداری ءَ مدام گامے دیم ءَ بوتگ۔

اختر جان مینگل نہ ایوک ءَ یک پارٹی یے سروک اِنت بلکیں آ وت بلوچ راج ءِ مسترءُُ کماش اِنت بزاں یک قبیلہی سردار ءُُ سروکے اوں است اِنت ۔یک وہدے ہمے نعرہ باز مشہور اَت کہ بلوچانی مستریں دژمن وت بلوچانی سردار ءُُ نواب اَنت بلئے واجہ اختر جان ءَ اے گپ رد کتگ پرچکہ آئی ہچ جاہ وتی سردار ی ءُُ نوابی ظاہر نہ کتگ بلکیں یک جاہے ءَ وت گشیت کہ من وتی جند ءِ ہند ءُُ وتی میتگ ءَ سردار اں بلئے وہدے ڈن ءَ درکایاں داں یک سیاسی مردمے آں ءُُ من یک لس مردمے ءِ ڈول ءَ مہلوک ءِ مدت ءُُ کمک ءَ کنگ لوٹاں اگاں منی دست ءَ چیزے نہ بیت داں مپت ءُُ ناحق ءَ دروگ بندی نہ کناں‘‘ ۔

یک جستے مدام منی مارشتاں تگ بندایت کہ اے جاوراں بلوچ ووٹ ءُُ الیکشن بہ کنت یا حاموشی ءَ بہ نندایت ؟ہمے جست من بازیں مردماناں جست کتگ داں گیشترءَ ہمے گشتگ کہ ووٹ ءُُ الیکشناں کدی نپ ءُُ سیتے داتگ کہ باری مرچی بہ بیت ۔۔۔! 

بلئے چیزے ءَ گشتگ کہ اگاں ما ووٹ ءُُ الیکشن ءَ بہر مہ زور اَنت داں سرکار وتی حساب ءَ مردم گچین کنت ءُُ آ راجی مردمے نہ بیت بلکیں سرکار ءِ آورتگیں مردم بیت انچو کہ پیسر ءَ بوتگ نوں زاہر انت کہ سرکارءِ آورتگیں مردم ءِ دست ءَ ہچی نہ بیت ہرچی کہ سرکار گشیت آکنت ۔گوں سرکاری مردماں بائد گلگ کنگ مہ بیت گلگ ہما مردماں گوں کنگ بہ بیت کہ آ چشیں وہد ءَ دیم ءَ نیااَنت،وہد ہمیش اِنت کہ وتی بزگیں راج ءِ بزگی ءَ بچار اَنت ءُُ دیم ءَ بیااَنت وہد ہمیش اِنت ۔۔۔۔۔

ترس وَ است جان ءُُ مال ءِ ترس بے عزت بوہگ ءِ ترس ،بے سوب بوہگ ءِ ترس،بے اختیاری ءِ ترس،جنگ ءُُ پسات ءِ ترس ۔۔۔ترس وَ ہر حساب ءَ است اِنت گڑا پرچہ مردم بہ ترس ایت اگاں آئی جاہ ءَ دگہ مردمے بئیت انت ءُُ آ پدا سرکار ءِ مردم بہ بیت داں آ گیشتر پہ راج ءِ بزگیں مردماں تاوان اِنت اگاں یک مردمے کہ پہ حق راج ءِ سروکی ءَ دیم ءَ کیت انت ءُُ بے سوب بیت داں آئی ءِ ہمے بے سوبی اوں پہ راج ءَ سیت ءُُ فائدگ اِنت پرچکہ مردم وتی راستیں سروکاں وَ زانت کنت ۔

دومی اگاں ووٹ ءُُ الیکشنانی باہیکاٹ کنگ بہ بیت ہرکس وتی لوگاں نندوک بہ بیت کہ مارا ووٹ ءُُ الیکشن ءَ کار نیست انت داں حکومت ءُُ سرکار وَ سروکے کاریت آ سروک پدا چون بیت ءُُ چون نہ بیت رند ءِ پشومانی ءَ ہچی نہ بیت پمشکا بائد مردم ملہی ءَ پہ وت ءَ انچیں سروکے گچین بہ کنت کہ آ وتی بزگیں راج ءِ درد ءُُ دوراں اگاں ہلاس کت نہ کنت داں حدے ءَ کمترے وَ کت کنت ۔

دومی تنی وہد ءَ بی این پی ءِ سروکانی دمب ءَ چشیں بہتامے بندگ نہ بوتگ کہ آ بے کاریں مردم اَنت یاکہ پہ راج ءُُ قوم ءَ کار نہ کن اَنت ۔بی این پی ءِ جاہ ءَ اے دگہ درائیں پارٹی چکاس بوتگ اَنت ۔بی این پی ءَ یک واری موہ رستگ اَت ءُُ آئی ءَ چندے انچیں کار کت کہ داں مرچی ءَ گیر آرگ بنت ۔

اگاں چہ آوانی مدت کم بوتگ بلئے کاراِش کتگ ءُُ چرآن اے امیت دارگ بوت کنت اگاں حکومت ہماوانی بہ بیت داں بلکیں پہ بزگیں راج ءَ چیزے بہ کن اَنت۔