رخشان ڈویژن ءِ بل 2015 ءَ غلام دستگیر ءَ مجیب الرحمان ءِ نیمگ ءَ بلوچستان اسمبلی ءَ دیم ءَ آؤرتگ ات۔ اے بل بلوچ مہلوک ءِ دیریگیں واہگے بوتگ پرچکہ بلوچستان ءِ ڈگار سک پراہ ءُُ شاہگان انت کہ ایشی ءِ بندوبوجی سبنالگ سک گران ءُُ نگیگ انت ۔

بلوچستان ءِ ڈگار پاکستان ءِ سرجمیں دمگ(صوبہ) آں ہوار گوں اسلام آباد ،آزاد جموں کشمیر ءُُ فاٹا44 درسد انت ۔اے وڑا بلوچستان ءِ ہرچ ڈویژن کے پی کے ءِ دمگ ( صوبہ) ءَ بیت بلئے اے درچ ءَ گوں بلوچستان ءَ چہ 1948 ءَ اے نارواہی بوہگ ءَ انت کہ اے بلائیں پراہ ءُُ شاہیگانیں دمگ ءَ را ایوک ءَ شش ڈویژناں بہر کنگ بوتگ ہمے سوب ءَ بلوچستان ءِ زبہری ءِ مارشت دیم ءَ اتکگ وہدیکہ بلوچستان ءِ جند ءَ بلوچستان ءِ گوریچانی دمگاں کسان کسانیں ہند(ضلع) جوڑ کنگ بوتگ انت کہ اے ہند وتی کچ ءُُ کیاس ءَ زرباری بلوچستان ءِ ہنکینے (تحصیل) ءِ حد ءَ نہ بنت ۔

2015 ءَ وہدے رخشان ڈویژن ءِ بل بلوچستان اسمبلی ءَ پاس کنگ بوت گڑا آ وہد ءَ بلوچستان ءِ انوگیں سروزیر میر عبدالقدوس بزنجو اسمبلی ءِ اسپیکر ات بلئے نوں اے وہد ءَ کہ بلوچستان ءِ سر وزیر انت آئی ءَ وتی اے دور ءَ اے نیکیں کار کرت کہ بلوچستان ءَ را یک نوکیں ڈویژنے دات پرچکہ اے ڈویژن ءِ یک بہرے کہ چاغے (ضلع) گشگ بیت وت جتا گوریچانی بلوچستان ءِ ڈویژنے ءِ کچ ءُُ کد ءَ بیت کہ آئی ءَ ہوار نوشکی ، خاران ءُُ واشک کہ پیسرا کوئٹہ ءُُ کلات ڈویژن ءَ ہوار بوتگ انت اے ڈویژن ءِ پراہ ءُُ شاہیگانی ءِ سوب ءَ نہ ایوک ءَ سرکار ءَ مزنیں جنجال ءُُ مصیبتے دیم اتکگ بلکیں اے دمگ ءِ مہلوک پہ کوئٹہ ءُُ کلات ءِ آہگ ءَ سک تکانسر ءُُ پریشان بوتگ۔

بلئے یک دراجیں مدتے ءَ مہلوک ءُُ سرکارءَ وت وتی جند ءِ جنجال ءُُ اڑاند دیم ءَ نہ یتکگ انت پرچکہ پہ دالبندین ءِ مردم ءَ کوئٹہ ءِ آہگ ءُُ ناگ ءُُ بیسمہ ءِ مردم ءَ کلات ءِ آہگ روچے ءِ راہ ات ۔

پمشکہ اے ڈویژن ءِ جوڑ کنگ ءَ اے ہند ءِ مردمانی بازیں جنجالے ہلاس بوتگ بلئے گوں رخشان ڈویژن ءِ جوڑ کنگ بلوچستان ءِ ایندگہ دمگانی مردمانی جیڑہ ہلاس نہ بوتگ انت ۔

اے درچ ءَ بائدیں سرکاری کاردار چو گوریچانی بلوچستان ءِ حساب ءَ ذرباری بلوچستان ءِ دمگاں ڈویژن ءُُ ڈسٹرکٹ جوڑ بکن انت تنکہ اے دمگانی مردمانی جیڑہ کم تر بہ بنت ۔اے درگت ءَ اگاں آواران ءُُ مشکےءُُ پنجگور ءَ یک ڈویژن ءُُ کیچ ،گوادر ءُُ کولواہ ءَ دگہ ڈویژنے جوڑ کنگ بہ بیت ہمے وڑا حب چوکی ، اوتھل ءُُ لسبیلہ ءَ را دگہ ڈویژنے جوڑ کنگ بہ بیت ءُُ ہمے درچ ءَ سبی ءُُ نصیر آباد ڈویژن اگاں بہر کنگ ءُُ کستریں ڈویژن جوڑ کنگ بہ بنت گڑا نہ ایوک ءَ سرکار ءِ کار ارزان تر بیت بلکیں مہلوک ہم آسودگ بوت کنت ۔

اے وہد ءَ تمپ ڈسٹرکٹ ءِ حال ہم دیم ءَ اتکگ اگا ں میر عبدالقدوس بزنجو ہمے وڑیں گامگیجے تمپ ءِ حاترا بزور انت گڈا بلوچ مہلوک بن دپتر ءَ مدام میر عبدالقدوس بزنجو ءِ اے گامگیج گیر کارایت اے چشیں کارنہ انت کہ گوں بلوچستان ءِ سروزیراں مہ بنت بلئے اگاں میر عبدالقدوس بزنجو چو بلوچستان ءِ راج دوستیں سروزیرانی وڑادل ءَ مہ دزایت ءُُ وتی دل ءَ چو بلوچستان ءَ پراہ ءُُ شاہیگان بکنت گڑا بن دپتر ءَ مدام آئی ءِ نام ءُُ توار مان ات۔