بلوچ چاگرد تاں ازل وتی گِرءُُ چل ءَ مشگول بوتگ ءُُ است اِنت ۔آئیءِ گِرءُُ چِلی جیڑہ سک باز اَنت،لاپ ءِ شوہازی،چکءُُ چلانگانی آکبت، جہد آجوئی،جنگ ءُُ جڑ،چاگرد ءِ تب داری ءُُ دودانی پیلوئی ابید چہ ایشاں نوک باہنداں وانگی گل ءُُ ادارگانی جیڑہ نوکیں جیڑگ اَنت شمار اَنت دگہ جیڑگے گوں سوشل میڈیا ءَ بندوک اِنت ،سوشل میڈیا بزاں تئی فیس بک،وٹس اف،ٹوئیٹر ءُُ اے دگہ اوں بزگیں بلوچ ءِ جیڑہاں گون کپتگ اَنت ۔

ہمے جیڑہاں بلوچ چہ مردم گری ءَ سرگوستگ آ بے حال اِنت کہ آ بلوچاں ۔۔۔۔۔! بلوچ!!! یک وہدے بوتگ کہ بلوچانی زبان ءُُ کول سنگ ءِ رستگیں لکیر منگ بوتگ کہ سنگ پرشیت بلئے لکیر گار نہ بیت ہمے رنگ ءَ بلوچ چہ وتی کول ءُُ زبان ءَ اے دیم ءُُ آدیم نہ بیت ۔حئیر گلہ وَ کنگی نہ انت کہ مروچی بلوچ وَ است بلئے بلوچی نیست ،زبان است ،زبان داری نیست ،کول وَ کنگ بنت بلئے کولانی پیلوئی نہ بیت ، گونڈ گونڈیں گپاں یکے دومی ءِ ایرجنی ءُُ پادکشی کنگ بیت ۔

گپ جنو ک سک باز گپانی باری ءَ انچیں کوہ پروشکائی بیت کہ نام مہ گر بلئے کرد ءُُ کار ءِ باری ءَ کس دیم ءَ نئیت بلکیں گڈی ءَ وت ہما گپانی ایراد گیری ءَ کن اَنت کہ یک وہدے ءَ وت ہمائی ءِ منوگر بوتگ ۔انوں سیاست ءِ موسم اِنت ،سیاست دو رنگ ءَ کنگ بیت یکے پہ قوم ءُُ راج ءَ یک پہ وت ءُُ وتی کٹم ءُُ کہول ۔ گوستگیں بازیں حکومت ءُُ سیاسی گل چکاس بوتگ اَنت کہ آوانی بید چہ وتی جند ءِ کہول ءَ در ہچی نہ کتگ ۔

بازیں مردم کار کنگ لوٹیت آ زانت کہ بئید چہ سیاست ءَ راج ءُُ قوم ءَ پہ کار کنگ سک اِنت۔ بلوچستان ءَ یک جنگے برجم اِنت کہ باریں کدی آسریتءُُ آئیءِ آسر چے بیت جنگانی آسر مدام گوں سیتاں تاوان اوں کار اَنت حئیر آ جتائی حبر بلئے اے وہد ءَ اے دگہ شیوار ءُُ زانتکاریں بلوچاں چے کنگی اِنت حاموشی ءَ نندگ ءُُ وداری کنگی اِنت یا یک گامے دیم ءَ آئیگ ءُُ جاورانی گہتری ءِ جہد کنگ ءُُ پہ راج ءِ باندات ءَ گہتریں راہے جوڑ کنگی اِنت ۔

ایشی ءِ سوڈگ منی تئی دست ءَ اِنت بلئے فیس بک ءُُ وٹس اف ءَ نہ ۔۔۔۔۔۔انچو گش اِنت کہ جن پہ کلوہ آپس نہ بیت ۔۔ہمے رنگ ءَ فیس بک ءُُ وٹس اف ءَ ایوکیں بٹاک جنگ ءُُ زنڈیں ردانی نبشتہ کنگ ءَ کس پہ قوم ءِ درد وار گشگ نہ بیت ۔قوم ءِ درد وار ہما اَنت کہ آوانی کرد دیم ءَ اِنت ۔

ظاہر اِنت یک مردمے اگاں شر بہ بیت دراہ آئیءِ توسیپ ءُُ ساڑا ءَ کن اَنت ءُُ یکے حراب ءُُ گَندگ بہ بیت آئی ءِ ایرجنی اوں الم بیت ۔بلوچ راج ءَ چشیں مردم باز کم پشت کپتگ بلے ہما کہ چندے است اَنت ما آواں اوں انچو ڈوبارگ ءَ اَنت کہ باند آ چو دلپروشے ءِ ڈول ءَ جہندم کنت قوم ءُُ راج ءَ ءُُ روت درملکاں جاہ مہ نند بیت ءُُ ہمک روچ وٹس اف ءَ وش گپتاریں ویڈیو پمن ءُُ پر شما راہی کنت۔ 

بلوچ ءَ را مدام مردگ پرست گشگ بیت ،اے گپ یک حدے ءَ راست اِنت پرچکہ ما مرچاں وت ستا ءُُ وت گلائی ءَ کپتگ اَنت دانکہ کسے مئے ستا ءُُ ساڑا ءَ مکنت آ بزاں شر نہ اِنت یاکہ آ مئے دژمناں مہ ڈوباریت آ مئے دوست نہ انت ۔

اے ڈولیں چاگرد کہ ٹک ءُُ بولک ءُُ جاگہاں درنئیت ،اے راج کہ انگت ءَ تربتی ، پنجگوری،گوادری ، خارانی ،مستونگی،آوارانی ،براہوئگی ، بلوچی،ءَ چہ درنئیت اے وڑیں راج ءَ پہ دیمروئی ءُُ آجوئی چتور اتک کنت ؟اے وڑیں راج کہ گونڈ گونڈیں گپاں مزن کنت ءُُ یکے دومی ءَ را زاہ ءُُ بد کنت آآآآ من بے حالاں کہ مرچاں لبزانکار ءُُ شاعر اوں انچش اَنت چنائی ءَ شاعرانی یکے دومی ءِ نہ منگ وَ عہدی گپے بلئے آ نہ منگ ایوک ءَ ازم درگت ءَ بوتگ لیکہ ءُُ حیالانی درگت ءَ بوتگ اَنت ۔ 

بلئے مروچی چش نہ انت مروچیگیں نہ منگ نہ ایوک ءَ لیکہ ءُُ حیالی اِنت بلکیں پدا گوں وتی کدگ ءِ مردماں دومی لیکہ ءُُ حیال ءِ مردمانی حلاپ پروپیگنڈہ کن اَنت،نودربراں وتی نادوستیں لیکہ ءُُ حیالی مردمانی حلاپ کنگ بنت بلئے گپ ءَ درست ہمے جن اَنت اے دروگ نہ اَنت بلکیں من نام ہم گپت کن اَنت بلئے گپ جند ءِ سرا بار بیت۔

پمشکا نام نہ گراں من دیستگ من دو جتائیں لیکہی مردمانی دیواناں نشتگ اَنت ہردو یکے دومی ءِ حلاپ اَنت بلئے گپ ءَ ہردو وتی زبان ءُُ وتی لبزانک ،وتی بزگیں راج ءِ دردمانی ئیگ ءَ کن انت ۔من باز براں حیران باں کہ گڑاں اے یکے دومی ءِ حلاپ اَنت پرچکہ بائد اے گوں یکے دومی ءَ دست ماں دست بہ بنت بلئے اناں اِدا وَ باسک پروشکائی اِنت یکجائی کجا بیت۔

’’بے سریں راج ءُُ بے سریں سودا‘‘ انچو کہ لبزانک اِنت ہمے رنگ ءَ سیاست انت اگاں مارا کسے دوست نہ بیت داں آئیءِ ہرحساب ءَ ما ایراد گری ءَ کن اَنت انوں لہتیں نوکیں مردم کہ سیاست ءَ اتکگ لہتیں وش نیااتک اے حبر ءَ ایر برت کنگ ءَ نہ اَنت پمشکا ہمے شومیں سوشل میڈیا وتی بے سریں گپاں گوں آ مردمانی حلاپ ءَ کنگ ءَ اَنت بلئے بدبحت چہ وتی جند ءِ کرد ءُُ کتہ کاری ءَ بے حال اَنت کہ آواں پہ راج ءَ کجام زہم جتگ ۔۔۔۔؟؟

یک مردمے کہ انگت سیاسی حساب ءَ چکاسگ نہ بوتگ آئی بابت ءَ مپت ءُُ ناحقیں گپانی چے نپ ءُُ سیت؟who the Hell are youکہ آئی ءِ بابت ءَ گپے بہ جن اِت۔

بلئے ردی باسکانی نہ اِنت نشانگ چوٹ اِنت۔۔۔۔۔ نامداریں شاہ زانت پروٹا گورس ءَ گشتگ کہ بے سریں راجے سرپد کنگ وہد ءِ زوالی اِنت آئیءَ درور داتگ کہ اگاں یک مردمے ءَ رنگزانتی ءِ نادراہی انت( Colour Blindness)گڑاں آئی ءِ رنگے ءِ بابت ءَ سرپدی وہد ءِ زوالی اِنت ۔ہمے رنگ ءَ اے راج ءَ را چیزے ءِ زانت دئیگ اوں گنوکی یے ۔