ربیدگ ءُُ راج دوئیں زندگیں چیز انت ، ربیدگی زند آئی ءِ عالمی میارانی پشدر ءَ انت وہدیکہ راج ءِ زندگی گوں آئیءِ ربیدگ ءَ بستگ ۔ پہ راج ءَ ربیدگ ہنچش انت چوکہ پہ ساہ دارے ءَ آئی ءِ ساہ ءُُ نپس ۔

اگاں راجے وتی ربیدگ ءَ پہریز ءُُ پہازت مہ کنت گڑا جہان ءَ آ پہ راجی دروشمے ءَ زندگ ہم بوت نہ کنت پمشکہ زندگیں راج پہ وتی راجی زندمان ءَ ربیدگ ءِ پہازگ ءُُ رکینگ ءَ جہد، جفا ءُُ کوشست کن انت پرے حاترا آہاں بازیں ادارگ ءُُ گل جوڑ کتگ انت پرچکہ آزان انت کہ اگان آہانی ربیدگ گار بہ بیت گڈا آہانی پجار ہم نگواہ ایت پمشکہ آ وتی جندی پجار ءِ دارگ ءِ حاترا وتی ربیدگ ءِ رکینگ ءُُ سلامتی ءِ حاترا کار کن انت۔ 

پاکستان یک ہنچیں ملکے کہ ادا بازیں راجے گوں وتی جتائیں دود ءُُ ربیدگاں جہ منند انت ۔ عالمی گل ءِ منگ نامہانی رد ءَ ہرچ راج ءَ تری ہرچ ملک ءُُ ڈگار ءَ نشتگ، وتی دود ءُُ ربیدگ ءِ پہریزگ ءِ حق ءُُ بستا ر است انت ءُُ اگاں کسے راجے ءَ چہ اے حق ءُُ بستار ءَ گستا کنگ لوٹ ایت گڑا بزاں آ عالمی کانود ءِ رد ءَ یک درکانودی کارے کنگ ءَ انت ءُُ پریشی ءَ آسزا ءِ حق دار انت ۔

ہمے مول ءُُ مرادانی درچ ءَ بلوچستان ءَ ہم یک ربیدگی دمگی ( صوبائی) بہرگے( ڈیپارٹمنٹے) ہست انت کہ آئی ءِ کار بلوچستان ءِ بلوچ ربیدگ ءِ پہریزگ ءُُ رکینگ انت اگاں اے ادارگ ءُُ بہرگ ءِ پیشی کاراں چارگ بہ بیت گڈااے بہر گ ءَ بلوچ ربیدگ پہریزگ ءَ چشیں کارے نہ کتگ کہ مردم نامے بہ گپت البت بلوچستان ءَ فرانس ،جرمنی ءُُ اٹلی ءِ بازیں دمب زانتیں مردمانی ہواریءَ اے بہرگ ءَ کار کتگ کہ چرائی ءَ چے بازیں دمبے بلوچستان ءَ پٹگ بوتگ بلئے آ وڑا کہ اے بہرگ ءَ دمبانی پہریزگ ءِ ھاترا کار کنگی بوتگ آ وڑا کار کنگ نہ بوتگ ۔

البت درملکی زانتکارانی سوج ءُُ سکین ءَ پد اے بہرگ ءَ لہتیں جوانیں گامگیج زرتگ کہ ستا کرزانت چوکہ بازیں ہند ءُُ جاگہاں کلچرل کمپلکس جوڑ کنگ بوتگ کہ چرآہاں بازیں گوریچانی بلوچستان ءَ جوڑ کنگ بوتگ ءُُ دو زرباری بلوچستان ءَ جوڑ کنگ بوتگ انت کہ اشانی تہا یکے گوادر ءُُ یکے تربت ءَ جوڑ کنگ بوتگ انت ،گوستگیں کیچ فیسٹول ءَ ہم ہمے تربت کلچرل کمپلکس ءَ برجم دارگ بوتگ ات کہ ایشی مکران ایف سی ءِ مزنیں جوانیں کردے بوتگ کہ مکران ءِ مہلوک ءَ باز گلا ءُُ ستا کرتگ اگاں تربت ءَ اے کلچر کمپلکس مہ بوت انت ۔

گڑا بلکیں اے فیسٹول مہ بوت انت بلئے دومی دست ءَ لہتیں وہدے انت کہ بازیں ادارگانی نیمگ ءَ اے کلچرل کمپلکسانی سرا قبضہ کنگ ءُُ زورگرگ ءِ حال ءُُ احوال چاگردی رسانک در ءَ شنگ ءُُ تالان انت ءُُ بازیں ادارگ ءُُ زوراوریں مردم اے جاگہ ءُُ کمپلکساں کاری ءُُ ارزشتی جاہ ءُُ ہند نہ پہم انت ۔

پمشکہ اشانی قبضہ کنگ ءَ وتی حقے سرپد بنت کہ سکیں نا وشیں حال ءُُ جاورے ، اے بابت ءَ بائدیں این ،جی اوز، سول سوسائٹی، لبزانکی ءُُ سیاسی گل بائدیں گامگیج بزور انت تنکہ اے ربیدگ ءِ بنجاہ ءُُ بنجل سلامت برجم دارگ بہ بنت۔

دومی دست ءَ مستریں ذمہ واری کلچر سیکریٹری ئیگ انت کہ آبائدیں جوانیں ءُُ ترندیں گامگیجے بزورایت پرچکہ کلچر ڈپارٹمنٹ اے درگت ءَ مزنیں زرے ہرچ کتگ ءُُ بازیں جکانسری یے کش اتگ اگاں اے درگتءَ کلچر سیکریٹری بے وس انت گڑا بائدیں آ چیف جسٹس پاکستان ءَ دزبندی ءُُ ارزے بکنت۔