ساچینک ءِ شونکار ءَ سلام انت کہ اے تاک ءَ نوکٰں بنگپے ءِ سرا ھال ءُُ احوال ءَ انت۔چوکہ ساچینک لبزانکی تاکے بلئے اے جوانیں گپے کہ پمّا چشیں ھالے ءِ گنجائش جوڑ کنگ ءَ اِنت۔ 

بائدیں سنگت ءُُ دوست اے بنگپ ءِ سرا وتی حیال ءُُ لیکہاں درشان بکن انت پرچکہ بلوچ مرچی ہما جاگہ سربوتگ کہ آئی ءَ وتی بازیں سوڈگ باہندیں رنگ ءِ بدل ءَ سما ءُُ ہوش ءَ گوں کنگی کپ انت ، ساچینک ءَ من رامین ءِ نبشتانک ونت اگاں کہ من ءَ آئیءِ بازیں گپ ءُُ حبراں گوں تپاکی نیست بلئے من ءَ اے حاترا دوست بوت کہ آئی ءَ وتی لیکہ وانوکانی سرا نہ مشتگ بلکیں گشتگ کہ اے درچ ءَ آئی ءِ رہشونی کنگ بہ بیت ءُُ من ہمے رہشونی گپ ءِ سرا وتی کلم چست کتگ اگاں کہ اے بابت ءَ منی گپ ءُُ حبر باز انت بلئے اے وہدی من بس کمو حبر کنگ لوٹان ایندگہ گپاں دگہ پرے۔ 

واجہ رامین ءَ وتی نبشتانک ءَ نبشتہ کتگ کہ چو کہ بلوچ ءِ حق ئیں لیڈر ءُُ رہشون دیم ءَ آرگ نیلگ بوتگ ۔ پمشکہ بلوچ راج پدمنتگ بوتگ آئیءِ گشگ ءِ رد ءَ اگاں پاکستان ءِ پارلیمنٹ حقی ئیں بلوچ راج ءُُ وتن دوست آرگ بہ بنت گڑا بلوچ ءِ بازیں جیڑہ یے گیشوار بیت گوں سد احترام ( پرچکہ من رامین ءَ زاناں ) ءَ من گوں رامین ءَ تپاک نہ کناں اولی گپ ایش انت کہ شیر ءَ شتگیں بلوچ راج دوستے پاکستان ءِ پارلیمنٹ ءَ دیم دئیگ بہ بیت ۔

اوں آ زمزنیں زحمے جت نہ کنت پرچکہ پاکستان ءِ لیڈر وتی جاگہ ءَ من گشاں پاکستان ءِ دوستیں مزنیں پارلیمنٹ ( قومی اسمبلی ءُُ سینٹ) آں ہم چشیں واک ءُُ اختیارے نیست کہ آ پہ وتی مہلوک ءَ کارے کت بکن انت پرچکہ پاکستان ءِ بنکی واک ءُُ اختیار کئی دستان انت ،من ہوں زانان ، بائدیں میر رامین ہم بزانت ، وہدیکہ پاکستان ءِ واک ءُُ اختیار پارلمنٹ ءِ کر ءَ نیست گڑا ما چوں یک پارلیمنٹے ءِ یک باسکے ءَ گوں اے امیت بداراں کہ آ پارلیمنٹ ءَ روت ءُُ بلوچ مہلوک ءِ حق ءُُ واک ءُُ اختیارانی گپ ءَ کنت ءُُ اگاں بکنت گڑا ملک ءِ اختیار دار آئی ءِ گپ ءُُ سوجانی سرا عمل کن انت ۔

ءُُ اگاں کسے آئی ءِ گپ ءَ گوشدارگءَ تیار ءُُ ساڑی نہ انت گڈا بلوچ ووٹ دنت یاکہ نہ دنت ہور ءِ سر ءُُ نوک ءِ چیر۔ مارا وتی جاورانی گیشینگ ءَ یک نہ یک سوڈگے پکار اِنت بلئے آ سوڈگءِ در پارلیمنٹ بہ بیت شرط نہ اِنت ۔

گوستگیں باریگ ءِ مردمانی پارلیمنٹ ءِ باسک ءُُ ممبری ءَ پہ راج ءَ کٹ ءُُ سیت نہ کتگ کہ باری پرے واجہ کارانی بہ بیت۔بلئے واجہ رامین ءِ سدکی اِنت کہ پنچیں لنکک بروبر نہ اَنت ءُُ ہر مرگ کدئے بالِ وت ،ہرکس پہ وتی گشاد ءَ کار( انچو کہ کنگ بہ بیت) بلکیں چیزے پہ بزگیں راج ءَ کنگ بہ بیت بلئے پرے زوتاں چشیں جاورے نیاتکگ کہ پریشی ءَ امیتے دارگ بہ بیت۔ساچینک ءِ وانوک ءُُ نبشتہ کنوکانی پسو ءِ رہچار۔