مردمانی دل پہکی زانگ نہ بیت باز مردم پہ زاہر تئی درد وار اِنت بلئے اندر ءَ تئی مستریں دژمن ہما اَنت ءُُ باز مردم پہ زاہر بلکیں پہ دژمن ءَ اَنت بلئے شرتریں دوست تئی ہما بیت ۔
پیش ءَ مہر ءُُ دوستی گوں دل ءَ بوتگ ،گوں مردم ءَ بوتگ ،آئی ءِ شری ءُُ نیکیانی بوتگ،بلئے نوں مہر ءُُ دوستی ایوک ءَ وتی حاجتانی پیلوئی ءَ گوں بندوک اِنت بزاں اگاں کسے ترا کار دنت یاکہ تئی چیزے ءَ کمک ءُُ مدتے کت کنت ہمائی ءَ گوں ایوک ءَ دوستی بوت کنت بلئے آ کہ پرتو ہچ کرت نہ کنت آ دوستی ءِ لاحق نہ انت ۔
پدا چش اِنت کہ تو ستر پہ مردمے ءَ جوانی بہ کن بلئے پہ کزائی اگاں ہما مردم ءِ کارے تئی گوما مہ بیت آ انچو زہر کنت گشئے آئی ءِ مستریں دژمن اِنت۔اے وڑ پمشکا بیت کہ آ تئی دوست نہ انت آئیءِ دوستی ایوک ءَ پہ مول ءُُ مرادے ءَ بوتگ۔
من ءَ اپسوز پمشکا بیت انچیں دوستاں کہ جاہے اکدگے رستگ آواں وتی دوست ءُُ دوستی شموشتگ اَنت بلئے چیزے دوست است اَنت کہ آوانی مہر انگت ءَ برجاہ اِنت ہما دوستانی دوستی آوانی مزن اکدگی ءَ ہچ رنگ ءَ بدل نہ بنت ہما اصل دوست اَنت بلئے آوانی دوستی کہ اکدگاں گوں بدل بنت داں سدک بو کہ آ ہچبر تئی سنگت ءُُ دوست نہ بوتگ بلکیں آئی یک حاجتے گوں تو بندوک بوتگ۔
باز براں زند ءِ اڑ ءُُ جنجال انچو باز بنت کہ دوستے ءَ گوں دوستے ءَ تران ءِ موہ اوں نہ رسیت پریشی ءَ بائد گم کنگ مہ بیت پرچکہ دوستانی یات مدام گیربنت ءُُ آوانی گیر ،گیرم کنگ نہ بنت۔
دوستءُُ دوستی ءِ اگاں مانا ءُُ بزانتے است اِنت داں آ ہمیش اِنت کہ دوستی گوں بیسہ ءَ بندوک اِنت اگاں بیسہ نہ بوت دوستی نہ بیت ۔دومی گپ ایش اِنت کہ اگاں کسے ہچ تو مدام چیزانی لوٹ ءُُ طلب کنت ،ہچ تو مدام تئی توسیپ ءُُ ستا ءَ کنت بزاں آ تئی دوست نہ اِنت ۔چار نوکیں مردمانی تہا اگاں تئی دوستے ءَ ترا کم وہد دات بزاں آ تئی دوست نہ اِنت دوستی ءِ مانا ایوک ءَ دئیگ اِنت بزاں وفا ،مہر،وہد،زند ءُُ زندمانی،مال ءُُ مڈی ءُُ درائیاں گیش بیسہ اگاں کسے تئی دوست اِنت آئیءِ بیسہ گڑا انچو بہ بیت کہ آئی ءُُ تئی جند ءِ مانا یک بہ بیت۔بلئے چش نہ اِنت اے دور ءَ سنگت وَ باز اِنت بلئے دوست نیست اِنت ۔۔۔۔۔
دوستی یک زمانگے بوتگ بلئے مرچاں گواہ نہ کنت پرچکہ لوٹ ءُُ واہگ بدل بوتگ اَنت مردمانی تما ایوک ءَ ہما دوستانیگ اِنت کہ چیزے دات بہ کن انت بلئے لوٹ ایت مہ کن اَنت ءُُ اگاں کسے ہچ تو وتی ہزار سوگاتاں پد یک چیزے ءِ تما بہ کنت ءُُ تو آئیءَ اوں دات مہ بئے بزاں سنگتی وَ شمئے نیام ءَ بوتگ بلئے دوستی نہ بوتگ ۔
تئی تما ہ ءُُ واہگانی پیلو ءَ عمرے شت
بلئے وفا ءِ ترمپے ءَ مدام زر تئی ا‘شیت
(بی ایچ نورؔ )