بلوچ رہشوناں مدام اوگانانی ہندءُُ دمگانی بلوچستان ءَ ہوار کنگ ءِ ہلاپ کتگ ۔ہما وہد ءَ کہ انگریزانی حکومتی بوتگ آہاں وتی زوراکی ءَ چہ ریاستِ قلات ءَ ڈن دگہ بازیں ہندے ءَ اے ہند ءُُ دمگانی یکجائی کتگ ۔
اے درگت ءَ مری بگٹی آنی ہند نصیر آباد،چاغی،ءُُ کوئٹہ ءَ ہمے اوگانانی ہند ہوار کتاں ۔ اے درائیں کار پہ زور بلوچانی سر موشگ بوتگ اِتاں ۔بلوچ رہشوناں ہچبر اے دمگانی حاکم وت ءَ نہ لیک اِتگ بلکیں اے ہنداں ہچبر ووٹ ءُُ الیکشن اوں نہ کتگ بلکیں بلوچ سیاسی ءُُ زانتکاریں مردماں مدام ہمے لوٹ کتگ کہ بلوچستان ءِ درائیں اوگانی ہنداں فاٹا ءَ ہوار کنگ بہ بیت ۔ پرچکہ فاٹا ءُُ آئیءِ چاگرد ءِ درائیں ہند یک وہدے وت اوگانستان ءِ بہر بوتگ اَنت ءُُ بلوچستان ءِ چیزے ہند گوں ایشاں نزیک انت پمشکا ایشانی زبان ءُُ بولی ہم یک اِنت۔
بلئے ایشانی سیادی یک اِنت بزاں گوں پشتون قوم ءَ اِنت پمشکا ایشانی یکجائی ءِ دارگ پگر ءَ آدیم اِنت۔بائدیں اے ہندو گوں فاٹا ءَ یکجا بہ بیت ءُُ بلوچستان ءِ حد ءُُ سیمسراں چہ اے ہنددور دارگ بہ بنت ،چریشی ءَ ہما ہند ءِ مردم وتی بنکی جاہ ءَ سر بوت کن اَنت پرے گپ ءَ ما دنیا ءَ اے پدرکت کناں کہ مئے زندگیں راجے آں ءُُ ہمک ٹک ءُُ ہند ءِ مردمانی حق ءَ زانت ءُُ ایشانی حق جنی ءَ نہ کنت ۔پمشکا اے ہنداں چہ بلوچستان ءَ گستا کنگ بہ بیت دانکہ آوانی گیشتر حق ءُُ مز ایشاں رست بہ بنت ۔ پختوناں یک جتائیں دمگے ءَ بوہگ ءِ حق اِنت ءُُ اے حق بائد ایشاں ہر وڑ ءَ دئیگ بہ بیت ۔
بلئے اے گپ اوں ڈالچار مہ بیت کہ بلوچ حد ءُُ سیمسراں ایشانی ہچ رنگیں حق ءُُ جاہگیری یے نیست اِنت ءُُ بلوچانی وسائلاں گوں ایشاں بہر نیست انت ۔پمشکا پاکستان ءَ صوبائی حد ءُُ سیمسرانی دوبر جوڑشت کنگ الم اِنت۔ہما ہند کہ دپتری حساب ءَ بلوچستان ءِ بہر بوتگ اَنت چوکہ ڈیرہ غازی خان ، ڈیرہ اسماعیل خان ،جیکب آباد ءُُ اے دگہ درائیں بلوچ ہند ءُُ دمگ دوبر بلوچستان ءِ بہر کنگ بہ بنت۔
ہمے رنگ ءَ بلوچستان ءِ درائیں اوگان دمگاں پختون صوبہ ءِ بہر جوڑ کنگ بہ بیتءُُ ایشاناں کے پی کے ءِ اسمبلی ءَ جوانیں اگدگ دئیگ بہ بیت۔واجہین محمود خان اچکزئی ءَ چوکہ فاٹا گیشتر دوست بیت پمشکا آ بلوچستان ءِ درائیں اوگان ہنداں ہمے زوتاں فاٹا ءَ ہوار بہ کنت۔فضل الرحمان ءُُ محمود اچکزئی پختونانی مزنیں سیاسی پارٹی اَنت آ بائد اے کار ءَ زوتاں چہ زوت بہ کن اَنت ءُُ زاہر اِ نت ایشی ءِ بنجاہ وَ پشاور بیتءُُ ایشیءِ درائیں کار پشاورءَ بنت اِداکوئٹہ ءَ نہ بنت ۔
مئے گوں راجی سروک ءُُ سیاسی گلانی رہشوناں دزبندی اِنت کہ آ بائدیں بلوچستان ءِ ہندءُُ دمگانی دومی دمگے ءَ ہوار کنگ یا بلوچستان ءِ معاملاتاں در قومی مردمءَ را دست ءُُ پادی کنگ میئلنت۔ انوگیں حکومت بلکیں آ وڑا نہ اِنت بلئے آ بلوچ حکومت اَنت ءُُ بلوچ اسمبلی ءِ بہر اَنت اے اوں زانگ انت کہ پی ایم اے پی ءَ سر ویزیز ءِ فنڈ داشتاں کہ آ بلوچستان ءِ دیمروئی ءَ کار کت مہ کنت ءُُ مردمانی پیشداری ءَ انچیں کسان کسانیں چیزانی ہاترا ءَ زر دات کہ آوانی اے وہد ءَ بلوچ ءَ را پکار نہ اِنت ۔
بلئے نوں کہ مئے دوستانی حکومت ءِ وہد ہلاس بوتگ نوں زار ءُُ پریات اِنت کہ سرویزیری فنڈ ءُُ زر۔۔۔ پرچکہ نوں یک نوکیں حکومتے گوں نوکیں چار ءُُ بچاراں جوڑ کنگ بیت ۔گوستگیں حکومتانی کار ایوک ءَ ہمے گٹرانی گر ءُُ دار ءِ سرا ہشتاد درسد منصوبہ بندی کنگ بوتگ مئے لوٹ اِنت کہ آ درائیں بے ءُُ سرپادیں اسکیماں ہلاس بہ کنتءُُ بائد اِنت کہ ایم پی اے ءِ واجکار ایوک ءَ کانود سازی بہ کن اَنت آیاں گوں کارداریءُُ منصوبہ بندی ءِ کاراں دستمانجی مہ کن اَنت۔
آ بائدیں نوکیں حکومتانی ،ووٹ ءُُ الیکشانی کارءَ بہ کن اَنت کہ ہمے زوتاں بوہگی اَنت اے دگہ کدگاں بِل اَنت کہ آ وتی کار ءَ کن اَنت۔بس دعا ہمیش اِنت کہ انچیں حکومتے بئیت کہ آ کرسی ءِ دیوانگ مہ بیت بلکیں راج ءُُ قوم ءِ دوستی یے دل ءَ بہ بیت ءُُ پہ قوم ءَ کار بہ کنت۔