اے گپ باز رنداں دیم ءَ اتکگ کہ بلوچستان حکومت ءِ دستی جیڑہ یے نہ انت بلئے 2013 ءِ گچین کاریان پد اے گپ چو روچ ءَ درا ءُُ سہرا بوتگ ءُُ انگویں اداروکی سروزیر ءِ دارگ ءَ گوں اے گپ پکا بوتگ کہ نوں بلوچستان سیاسی ٹپاس جاہے ءِ درچ ءَ کارگرگ بوہگان انت ۔

پرچکہ سیاست یک سنگینیں کارے ءُُ بائدیں برزی تک ءَ سیاسی چست ءُُ ایر گوں سنگینیں وڑے ءَ دیم ءَ برگ بہ بنت دنیا ءَ ہچ ملک ءَ سیاسی چست ءُُ ایر ریاست ءِ ازا ابید نہ بنت بلئے ریاست مہلوک ءِ واہگ ءُُ تماہ ، سیاسی لیکہ ءُُ چاگردی زلورتانی پشدر ءَ سوڈگ کتن ۔

اے ریاست ءِ اولی ذمہ واری انت کہ ریاست سلامتی ءُُ سیمسرانی رکینگ ءِ ڈبہ ءَ وتی سرا بزورایت ءُُ پریشی ءَ نہ ایوک ءَ مہلوک ءَ سرپد بہ کنت بلکیں زور ءُُ طاقت ءَ ہم کارمرز بہ کنت بلئے گپ ایش انت کہ اے کار پہ مہلوک ءِ نپ ءُُ سیت ءُُ ریاست ءِ سلامتی ءِ حاترا پہ سنگینی ءُُ ذمہ واری ءَ کنگ بہ بنت ءُُ اے پرے کارءَ مہلوک بمارایت کہ ریاستی آہانی عزت ءُُ شرپ ءُُ لیکہ ءِ حیال ءِ دارگ ءَ اے کاراں کنگ لوٹ ایت ۔

ریاست ءِ کاراں مہلوک ءِ گمان ایش مہ بیت کہ ریاست نہ آہانی عزت ءِ پرواہ کنت ءُُ ننکہ آہانی مال ءُُ ملکت ءُُ ساہ ءِ ءُُ ننکہ مہلوک ءِ گمان ایش بہ بیت کہ ریاست مہلوک ءَ را چو شیرمچیں تپل ءَ لیب دارگ ءَ سہڑینگ لوٹ ایت چوکہ 2013ءِ گچین کاریاں داں روچ ء مرچی گوں بلوچستان ءَ بوہگ ءَ انت ۔ دومی دست ءَ بلوچ سیاسی گل ، زانتکار ءُُ نبشتہ کارانی ہم اے ذمہ واری انت کہ ریاست ءُُ حکومت ءِ ہرچ کارءِ پلہ مرزی ءَ مکن انت ۔

پدر انت کہ اے درچ ءَ مستریں ذمہ واری سیاسی گلانی انت کہ آ وتی سرپانی تہا ہنچیں مردم دیم ءَ بیار انت کہ آ بلوچی مہلوک ءِ جوانی ءَ رہدربری ءَ بکن انت پرچکہ اے وہد ءَ گیشتر ہمے گندگ بوہگ ءَ انت کہ پارٹی ءُُ پارٹیانی رہشون سیاسی لائقی ءُُ بود ءِ چارگ ءِ بدل ءَ گچین کاریانی ٹکٹاں ہما مردماں دئیگ لوٹ انت کہ آہانی گورا زر ءُُ مال است یا گوں چیریں ادارگاں ساز ءُُ باز کت کن انت ۔

کہ اے نہ ایوک ءَ پہ مہلوک ءِ آکبت ءَ جوانیں چیزے نہ انت بلکیں وت ہمے پارٹیانی جند ءِ آکبت ءَ ہم جوان ءُُ وش نہ انت پرچکہ ہما مردماں کہ مہلوک رہشونی سنچ بود نہ جنت یا گوں مہلوک ءَ دل ستک ءُُ پہک نہ انت آ نہ ایوک ءَ مہلوک ءِ سیاسی ءُُ چاگردی نپ ءُُ سیتاں تاوان بار کن انت بلکیں پارٹیاں ہم سک باز نقصان دئینت ۔

دومی دست ءَ مہلوک ءِ گوں پارلیمانی سیاست ءَ دلپروشی ءَ گیش کن انت کہ اے پہ ملک ءِ وفاق ءُُ ریاست ءِ جند ءِ آکبت ءَ سک نہ وش ءُُ ناشریں کارے بیت پرچکہ اگاں مردمانی یک برے بھروسہ پرشت کہ ملک ءِ پارلیمنٹ ءَ اے زور ءُُ طاقت مان نیست انت کہ آہانی حق ءُُ اختیاراں دات بکنت گڑا آ پدا مجبور بنت کہ دگہ راہ ءُُ درانی شوہازی بکن انت ۔

پمشکہ وفاق ءُُ ریاست ءِ ذمہ واری انت کہ مہلوک ءَ را اجازت بدئینت کہ وت وتی امیت واراں گچین بکن انت ءُُ انچیں امیت وار گچین بکن انت کہ آہانی ہمک روچی جیڑہاں گش ءُُ گیوار بکن انت گچین بوہگ ءَ پد وتی کار کنوکاں اے مہ گش انت کہ مارا شما گچین نہ کتگ ۔

بلکیں چیریں ادارگاں گچین کتگ پمشکہ نوں اے ذمہ واری مئے نہ انت کہ ما شمئے جیڑہانی گشواری ءَ بکنیں یا شمارا نوکری بدئیں ،ریاست بائدیں اے وڑیں امیت وارانی دلبڈی مہ کنت کہ مہلوک ءِ دیمروئی ءِ حلاپ انت یا مہلوک ءِ نام ءَ ایوک ءَ وتی بینک بیلنس ءَ گیشتر کنگ لوٹ انت۔