مکران بلوچستان ءِ ہما دمگ اِنت کہ مدام گرمی ءِ آس ءَ روک اِنت بہ گندئے ہمے واستہ اے ہند تربت کہ معنائے قبر اِنت کہ چو دوزخ ءَ گرم اِنت آ دگہ حبرے کہ وائے وطن حشکیں دار بلئے گرمی ءَ وَ گرم اِنت ۔
بلئے مرچاں ابرمی گرمی وتی جاہ ءَ سیاسی گرمی ءِ زور گیشتر اِنت انچوکہ الیکشن ءِ روچ نزیک بوہان اَنت ہمے رنگ ءَ سیاسی سروک ءُُ پارٹیانی جوش ءُُ جوزگ اوں گرم گران اَنت ۔ہمے سیاسی سروکانی رم ءَ واجہ جان محمد دشتی ءِ نام کہ نوک ہوار بوتگ درائیں کہنیں سیاسی سروکاناں ائیدے ءَ مانشانتگ پرچکہ واجہ جان محمد دشتی کہ قوم اسمبلی ءِ سیٹ ءِ اوشتگ ءَ جاڑی بوتگ ءُُ انوں مکران ءَ واجہ ءِ نام ءُُ آئیءِ پارٹی ءِ محکمی ءَ اے دگہ سروک ءُُ سیاسی پارٹی کمے گیش گرم ترینتگ اَنت ۔
پرچکہ ہر چند کہ الیکشن ءِ روچ نزیک بوہان اِنت ءُُ بی این پی پارٹی ءِ محکمی گیشتر بوہان اَنت ۔واجہ جان محمد دشتی ءِ کار ءُُ کردانی بابت ءَ و ہرکس سہی ءُُ سرپد انت اگاں کسے آئیءِ دیوان ءَ نشتگ داں زانت کنت کہ واجہ ءَ پہ کار وتی نپ ءُُ پائدگے ءَ نہ کتگ بلکیں پہ بلوچے ءَ کتگ آئی ءَ بہہ نہ چاراِتگ کہ اے مردم ءَ پہ کہ آ کار کنگ ءَ اِنت آ پرائی چونیں کارے کت کنت بلکیں آئیءَ ایوک ءَ یک لس بلوچے ءِ جہت ءَ ہرچی کہ آئی وس ءُُ واک ءَ بوتگ آئیءَ کتگ ۔
واجہ جان محمد دشتی آ وہداں کہ بازیں سرکاری اگدہانی سرا بوتگ چوکہ اے سی،ڈی سی ، سیکڑی،ایجوکیشن سیکٹری ءُُ وتی سرجمیں بیوروکرسی ءِ وہداں آئی ءِ جہد ہمے بوتگ کہ وتی راج ءَ را گیش ءَ چہ گیش نپ بہ رسیت ۔
بلکیں زانندگاں یات بہ بیت کہ ہما وہد ءَ کہ آ سیکٹری اَت ءُُ بلوچی زبان ءُُ لبزانک ءِ لیکچرارشپ ءِ ہمائی ءَ پوسٹ جوڑ کت اَنت کہ مرچی چیزے ورنا اگاں بلوچی ءِ پشت ءَ نان ورگ ءَ اِنت اول حدا ءُُ دومی ہمے واجہ ءِ برکت ءَ ۔۔۔۔۔ بلوچی زبان ءُُ لبزانک ءِ چیدگ بلوچی اکیڈمی ءِ ماڑی کہ مرچی کوئٹہ ءِ دلبند ءَ مِک اِنت اخترجان مینگل ءُُ واجہ جان محمد دشتی ءِ جہد ءُُ کوشتانی برکت اِنت ۔
نوں کمے گمان بہ کن اِنت کہ اگاں اے واجہ یکبرے پدا حکومت ءَ نوکیں اگدگے ءَ دیم ءَ بئیت گڑا پہ راج ءُُ قوم ءَ چتوریں کمک کت کنت ۔۔۔۔۔!ہما مردم کہ واجہ ءِ دیم ءَ ہمے سیٹانی حاترا اوشتاتگ اَنت آوانی کرد ءُُ کتہ کاریاں چہ اوں مردم جوانی ءَ سرپداَنت چوکہ بی بی زبیدہ جلال اِنت کہ مدتے بیت سیاسی چست ءُُ ایراں گون نہ بوتگ بلکیں باز مردمءَ گشتگ کہ آ چہ سیاست ءَ دست کش بوتگ بلئے انوں پدا ہمے گرمی ءَ گون کپتگ۔
بائد آ بلوچی شرپے ءَ وت واجہ جان محمد دشتی ءِ باسکی ءَ بہ کنت ءُُ چہ اے سیٹ ءَ دست کش بہ بیت انچو کہ گوستگیں روچ ءَ حال رسانکاں ہمے حال شنگ اَنت کہ واجہ ءِ دیم ءَ بائد مکران ءِ سیاسی سروک وتی امیت دار مہ اوشتارینت پرچکہ واجہ جان محمد دشتی وڑیں مردم مدام راج ءِ دست ءَ نئیت اِنت ۔راجی سروک اگاں مکران ءِ ابرمی گرمی ءُُ سیاسی گرمی ءَ توسگ لوٹ اَنت داں وتی گران بہائیں ووٹ ءَ ہمے واجہ کار ءَ بدینت اگاں اے گرمی انچیں دروشمے کاریت کہ نہ ایشی ءَ نہنگ ءِ سارتیں آپ توست کنت ءُُ نیکہ گوادر ءِ پُرآپیں زر۔۔۔۔۔!
بدوا بہ گندئے گشنت کہ اے ایوک ءَ توسیپ گری بوہگ ءَ انت بلئے روچ ءَ را وتی رژن ءِ پدرائی ءَ چراگانی منت نہ لوٹ ایت۔واجہ جان محمد دشتی ءِ اولی براِنت کہ سیاسی گرمی ءِ دورخ ءَ دورے کتگ پہ کئی ہاترا پہ راج ءِ بزگی ءُُ لاچاری ءِ ہاترا اگاں واجہ ءَ را حدا گنج داتگ کہ عمر ءِ اے نوبتاں جوانیں منگیرے ءُُ شاہی کاپرے ءِ چیر ءَ وتی وہد ءَ گوازینت بہ کنت بلئے اناں آئیءَ را پہ راج ءُُ قوم ءَ کار کنگی اِنت پمشکا آئیءَ لانک بستگ ءُُ اے جلایں گرمی ءَ اگاں کسے تربت ءَ جون ءُُ جولائی ءِ ماہاں گشتگ داں آ ایوک ءَ زانت کنت کہ چتور جان سوچیں لوار ءُُ جل اِنت بلئے اے کماش عمر ءِ اے نوبتاں پہ کئی ہاترا تروتاب ءَ انت پگری گپے ۔
دومی نیمگ ءَ اے دگہ چکاس اِتگاں سیاسی سروک وتی بہا زور،دئیگ زورگ ،کول ءُُ کرار بندی ،سوگند واری ءَ مشگل اِنت ءُُ اے گرمی اوں روچ پہ روچ ودان اِنت ۔گڈی ءَ ہمے گش اَنت کہ راج ءِ سوبمندی گوں ہمے واجہ ءِ سوبمندی ءَ بندوک اِنت بائد راج اے پارٹی ءَ کمک بہ کنت ءُُ واجہ جان محمد دشتی ءَ سوبین بہ کنت۔