نیکراہی زانتکارانی ردا اے وہداں داں دنیا ءَ یک لکھ ءُُ بیست ءُُ چار ہزار پیغمبر دیم دئیگ بوتگ انت گپ ایش انت کہ پرچہ؟ مردماں جتا جتائیں وہد ءُُ زمانگاں پیغمبر ءِ پرچہ زلورت بوتگ ؟ ایشی ءِ پسو ہمیش انت کہ بنی آدم ہرچ وہد ءَ راہشون ءُُ رہدربر ءِ زلورت بیت بنی آدم چہ وت ءَ وتی راہ ءُُ کشکاں گشینت نہ کنت ۔

آئی ءَ وتی آکبت ءِ گندگ ءُُ گہتر کنگ ءِ ہاترا دیدوکیں ، سنچ ءُُ بودی مردم پکار بیت کہ آئی ءِ دست ءَ بگپت ءُُ آبسرے ءَ داں سر بہ کنت اے درچ ءَ بلوچ راج اے ہاترا بد بحتیں راجے کہ آئی ءَ نوکیں عہد ءُُ زمانگ ءَ چشیں رہدربر ءُُ رہشونے نہ رستگ کہ آئی ءِ دست بگپت ءُُ آئی ءَ راہے شون بدنت پمشکہ نوکیں عہد ءَ بلوچ سیاسی پارٹی پہ ناز اے اوگام ءَ جن انت۔

کہ فلانی ءَ اے ہاترا ووٹ بدی ات کہ سے کلومیٹر ءِ سٹرکے جوڑ کتگ ،گپ ایش انت کہ بلوچ راج ءِ حق ءُُ دروسیلہانی نام گپت ءُُ آئی ءِ آکبت ءِ مانزمانانی داوادارانی لیکہ آتکگ ءُُ یک سے کلومیٹر دگے ؟ پرچکہ اے وہد ءَ بلوچستان انچیں جاوراں گوں دچار انت کہ عالمی سیاست ءِ پیچ ءُُ تابانی تہا بلوچ ءُُ بلوچستان ءِ آکبت ءِ جمادار کاینت ءُُ یک سے کلومیٹر روڑ ءِ گپ ءَ بجن انت ؟ دومی دست ءَ لہتیں لاپ چاریں لیڈرانی بے سنچی ءِ سوب ءَ بلوچستا ءِ سیاسی وارث لہتیں ملا ءُُ ڈزگز مافیا ءِ مردم جوڑ بوہگ ءَ انت ۔

آئی ءِ سوب ایش انت کہ بلوچ راج ءِ دود ءُُ ربیدگ ءُُ آئی ءِ آکبت ءِ نام گروکیں لہتیں سیاسی پارٹیاں گوں کہول ءُُ کٹمی پشدر ءَ بلوچ راج ءِ لس مہلوک یک کورچاتے ءَ دور داتگ ءُُ چات ءِ دپ ڈنگر جتگ ۔ چوکہ اے لیڈرانی بے سنچیں کارپدانی پشت ءَ مہلوک اے جیڑگ ءَ مجبور بوتگ۔

کہ چوکہ ہچ لیڈر ءَ گوں بلوچ راج ،بلوچ راج ءِ جیڑہ ،آئی آکبت ءُُ آئی ءِ درورسیلہاں گوں ہچ وڑیں کارے نیست پمشکہ درائیں پارٹی ءُُ لیڈرانی معنا ءُُ حساب یک انت ۔اے ہاترا آ پرچہ وتارا جوزگی رنگ ءَ گوں لہتیں پارٹیاں بندوک بکن انت ، آ پرچہ وتی ذاتی ءُُ کہولی مفادان گوں وتارا ہمگرنچ مکن انت اگاں پریشی ءَ آہاں وتی ووٹ بہا کت گڈا حرابیں سوداہے نہ انت ۔

اے درگت ءَ اگاں ووٹ ءِ بہا کنگ ءِ نوبت اتک اے بلکیں پہ یک مردمتے ءَ یا کہ کہولے ءَ نپ ءُُ سیتی گپے بہ بیت بلئے پہ بلوچ ءِ اوبادگاں سکیں حرابیں ءُُ نہ وشیں گپے پرچہ اگاں اے وڑ بوت گڈا آوکیں وہد ءَ بلوچ راج ءَ رہشون ءُُ رہدربر پہ نام ءَ نہ بیت ءُُ بلوچ ءِ درائیں رہشون ءُُ رہدربر کارو باری ءُُ ڈرگز مافیا ءِ مردم بنت اگاں بلوچ راج ءِ دوزواہ لوٹ انت کہ بلوچ ءِ آکبت اے ناشرانی دست ءَ بئیت گڑا بائدیں اے دوزاہ ءِ دیمٗ۔ 

بیاینت ءُُ وتی کرد ءَ پیلو بکن انت اے دور ءَ بلوچ وانندگیں ءُُ زانندگ ءُُ شاعر ءُُ لبزانکارانی ذمہ واری انت کہ بلوچ سیاسی ءُُ معاشی آکبت ءِ بابت ءَ وتی کرد ءَ پیلو بکن انت ۔ اے بلوچ سیاسی کارندہ ءُُ زانتکارانی ذمہ واری انت۔

کہ اے عہد ءَ بلوچ لس مہلوک ءِ سیاسی رہشونی ءَ بکن انت تنکہ انوگیں گچین کاریاں بلوچ چہ یک ردیں سیاسی فیصلہ یے ءَ برک اَنت پرچکہ اگاں بلوچ وانندگ ءُُ زانتکاریں مردمان وتارا چہ اے ذمہ واری ءَ دور داشت گڈا بلوچ راہشون ءُُ رہدربربے سنچ ءُُ بے بود ، ڈرگز ءُُ لینڈ مافیا ءُُ ڈیتھ اسکوارڑ ءِ مردم بنت کہ آہان گوں بلوچ ءِ آکبت ،زبان ،لبزانک ءُُ ربیدگ ءَ گوں ہچ وڑیں کارے نہ بیت۔