پہ پاکستان ءَ اے وشیں حالے ات کہ امریکہ ءَ پاکستان انسانی شپکی( انسانی سملنگ) ءِ لڑ ءَ چہ برزی سند ءَ جہل ءَ آورتگ ات ، امریکہ ءِ دری کارانی وزارت ءَ اے لسٹ ءِ چار ءُُ ٹپاس ءَ پد پاکستان ءِ نام چہ ایندگہ بازین ملکاں جہل تر آورتگ ۔

اے گپ زانگ بہ بیت کہ پاکستان گوستگیں پنچ سالاں امریکہءِ اے واچ لسٹ ءَ برزی سند ءَ بوتگ ۔امریکہ ءَ پاکستان ءِ نام چہ پاکستان ءِ اسمبلی ءَ دو قانود جوڑ کنگ ءَ پد جہل ءَ آورتگ بلئے بد بختی ایش انت۔

کہ ہمے وہد ءَ کہ پاکستان ءِ امریکہءِ انسانی سملنگ ءِ لسٹ ءَ جہل کنگ بوتگ ہمے روچاں پاکستان ءِ نام گرے لسٹ ءَ ہور کنگ بوتگ کہ ناں پہ پاکستان ءِ مالیات ءَ جوان ءُُ نیکیں حالے ءُُ نہ کہ پاکستان ءِ سیاسی نام ءُُ شان ءَ پرچکہ دنیا ءَ گرے لسٹ کہ فانینشل ایکشن ٹاسک فورس ءِ یک لسٹے کہ آئی ءِ تہا ہما ملکانی نام نامینگ بنت کہ آ ’’ منی لانڈرنگ‘‘ ءُُ ناشری ءِ دیمروئی ءَ زر ءُُ مال ہرچ بکن انت ۔

ہما ملکانی نام کہ اے لسٹ ءَ ہوار گیجگ بنت گڈا پہ مالیاتی ءُُ سیاسی دنیا ءَ اے پکائیں گپے کہ اے ملک مالیات ءِ ناروئیں کار ءُُ بار ءُُ ناشریں مردم ءُُ گلانی زر ءُُ مال ءِ دے ءُُ زور ءَ ہوار انت ءُُ اے لسٹ ءَ نام ہوار گیجگ ہنچو پہ دیم یا پہ سٹی نہ بیت بلکیں اے ٹاسک فورس بازین شاہدی ءُُ گواہاں دیم ءَ ایر کنت ءُُ فیصلہ کنت پدا اے ٹاسک فور س ءِ تہا ایوک ءَ یک دمگےءِ یا ایوکءَ ہواریں لیکہ داروکیں ملک ہوار نہ انت بلکیں جتا جتائیں دمگ ءُُ لیکہانی مردم ہوار انت پمشکہ اے ٹاسک فورسءِ سوڈگ یک نیمگی ءُُ ریا ءُُ روئی گشگ بوت نہ کنت ۔

اے درگت ءَ دگہ یک ناوشیں گپے اے دیم ءَ اتکگ کہ ٹاسک فورس ءِ دیوان ءَ پاکستان ءِ دوستریں ملک چین، ایران ، ءُُ سعودی عرب ہم ہوار بوتگ انت کہ اے پہ پاکستان ءِ دوزواہاں جوانیں گپے نہ انت ۔

اے وہد ءَ گرے لسٹ ءِ تہا اے ملک ہوار انت ۔ ایتھوپیا ، سربیا، سری لنکا ، شام ، نرینداد ، توباگو،تونیزیاءُُ یمن،بزاں پاکستان اے لسٹ ءَ ہواریں یکیں ملک نہ انت دگہ ملک ہم ہمے لسٹ ءَ ہوار انت بلئے شریں گپ ایش انت کہ پاکستان ءِ بلیک لسٹ ءَ ہوار بوہگ ءِ ہچ وڑیں گمان نیست اگاں کہ ایندگہ ملک بلکیں بلیک لسٹ ءِ تہا ہوار کنگ بہ بنت دومی وشیں گپ ایش انت۔

کہ پاکستان اے وہد ءَ ایوک سے ماہ ءِ حاترا گرے لسٹ ءَ ہوار کنگ بوتگ ءُُ پاکستان ءَ را گشگ بوتگ کہ آ لہتیں جیڑہانی سرا کہ گوں ناشری ءَ بندوک انت ،گامگیج بزورایت ءُُ اگاں پاکستان اے گامگیجانی زورگ ءَ سوبین بوت گڈا سے ماہ ءَ پد پدا فانینشل ایکشن ٹاسک فورس ءِ مراگش ءَ اے لسٹ ءِ سرا چار ءُُ بچار کنگ بیت ءُُ پاکستان ءَ را چہ اے لسٹ ءَ درکنگ بوت کنت اے گپ گیر آرگ بہ بیت کہ پاکستان ءَ یکبرے پیسرا 1989 ءَ ہم گرے لسٹ ءِ تہا ہوار کنگ بوتگ ات بلئے پداپاکستان چہ اے لسٹ ءَ درکنگ بوتگ ات ۔

اے وہد ءَ ہم پاکستان ءِ مالیات ءِ وزیرءِ گشگ ہمیش انت کہ ٹاسک فورس ءَ پاکستان ءَ را ہما گامگیجانی بابت ءَ کہ گشتگ آہانی سرا بازیں کارے کنگ بوتگ ءُُ اے کار ءُُ گامگیج ٹاسک فورس ءِ دیم ءَ ایر کنگ بوتگ انت بلئے مجلس ءَ ہواریں ملکاں پاکستان ءِ اے گپاں باور نہ کتگ آہانی گشگ ءِ ردا اے وہد ءَ پاکستان ءَ 430 مردم درملکاں زر ءُُ مال ءِ لین ءُ دین ءَ ہوار انت۔

اگاں کہ اسٹیٹ بینک پاکستان ءَ اے بابت ءَ گامگیج ءِ زورگ بنا کتگ بلئے اے وہد ءَ داں پاکستان ءِ کر ءَ چشیں جوانیں شاہدی ءُُ نشانے نیست کہ آناسک فورس ءِ دیم ءَ ایر کنگ بہ بیت فانیشنل ایکشن ٹاسک فورس یک مالیاتی گلے کہ 1987 ءَ جی 7 ءِ گروپ ءَ جوڑ کتگ کہ آئی ءِ بنجاہ پیرس ءَ انت ایشی ءِ کانودانی تہا ناشراں زر ءُُ مال دئیگ ءِ ہلاپ کانودسازی چہ 2001 ءَ امریکہ ءِ سرا ناشریں ارشانی کنگ ءَ پد کنگ بوتگ ۔

گرے سٹ ءَ ہوار بوہگ ءَ پد پاکستان ءِ جاہ مننداں مزنیں جنجالے یے دیمپان بوہگی بیت پہ گچینی پاکستان ءِ ہرچ جاہ منندےءَ بینکانی زر ءِ دیم دئیگ ءُُ زر ءِ لوٹائینگ مزنیں جنجالے بیت پرچکہ گروپ ءَ ہواریں درائیں مزنیں ملک زر ءِ اے رو ءُُ آ ءِ گر ءُ دار ءَ کن انت اے رد ءَ نہ وشیں گپ ایش انت کہ ٹاسک فورس ءِ مجلس ءَ پاکستان ءِ دوستریں ملکاں ہم پاکستان ءِ پلہ مرزی کت۔

نہ کتگ چین کہ آئیءِ دوستی گوں پاکستان ءَ زر ءَ جہل تر ءُُ چہ ہمالیہ ءَ برزتر انت آئی ءَ ہم پاکستان ءِ پلہ مرزی نہ کتگ اے درگتءَ حکومت پہ گچین(ن) لیگ ءِ حکومت ءَ عالمی تک ءَ سفارت کاری ءَ سک بے سوب بوتگ ءُ اگاں اداروکی حکومت دلمانگ انت۔

کہ پاکستان سے ماہ ءَ پد پدا بلیک لسٹ ءَ ہوار کنگ مہ بیت گڈا چو(ن) لیگ ءِ حکومت ءَ نزوری مہ کنت ءُ انوں عالمی تک ءَ وتی سفارت کاریِءِ بور ءِ تاچینگ ءَ بنا بکنت امیت انت کہ چہ اے پالسیاں پاکستان بلیک لسٹ ءَ ہوار کنگ نہ بیت پرچکہ بلیک لسٹ ءَ مالیاتی ءُُ سیاسی جنجال پہ پاکستان ءَ سک نگیگ بنت۔