پہ سنجر بہار ءِ وش تبیں موسم ءُ کوہ ءِ نوانءَ خیرنہ بوتءُ آ شہ کوہ ءِ نوانءَ ہسپتالءِ تہت ءِ باہوٹ بوت۔شکر ورنائیں سنجر وتی چار براس ءِ کسترین اَتءُ وتی ،مستریں براس ءِ رمگ یے چارینت۔
دانکہ مکہیں ماس یے زندگ ءُ سلامت ات ،آئرادنیا ءِ ہچ گم ءُ گڑتی نیست ات۔ پس ءَ وَ دو سال ساری کوڑہیں دنیا یلہ دات اتءُ وہدیکہ شہ ماس ءِ ساہگ ءَ ہم زبہر بوت گڑاپنچ شش ماہ ءَ پد گندیت کہ مستریں نشار ءِ تب دگہ وڑ انت ءُ کستریں نشار ہم آئی دست ءَ دار انتءُ روچے یک وڑیں حالے وتی لوگواجہانی گوشاں گوازین انت۔
یک شپ یے ر مگ ءِ ہنکین ءَ آرگ،دوشگ ءُ میچینگ ءَ پد نان یے وارت ءُ وتی نپادانی سرءَ وپت تہ پگرے کرت کہ داں کدیں من اے وڑ بے جاہ ءُ بے نپادءَ پہ چنڈے نان ءُ تل یے پچ ءُ پازوارءَ بے زوبگ ءَ براسانی شوانگ بین ءُ منا پہ وت ءَ گس ءُ جاہ ءُ مال ءُ ہنکین یے جوڑ کنگی انت۔ گوربام ءَ براس آت کہ پہ شیوان ءَ پادے پکنت تہ گندیت کہ نپاد ہورک انت۔
دل ءَ گشت یے کہ بلکیں پہ آپدست یےءَ شتہ، کئیت بلئے تا سہب ءِ روژنائی ءُ روچ ءِ ٹکّءَ سنجر پدی نیات ءُ کس ءَ نزانت کہ شگربءَ شت یا مگربءَ۔نیمروچ ءَ برپی ءِ ہنکین ءَ مہمان بوت۔ حال احوال ءَ رندبرپی گشت کہ ورنا اگہ تو منی ر مگ ءَ چارین ئے گڑا ہرچی کہ و خت ءُ زمانگ ءِ حساب ءَ زوبگ رسیت، ترا دئیاں ءُ سال ءَ ترا دوجوڑی پچ ءُ پازوار ہم دئیاں۔
سنجر ہمدا شوانگ بوت، شام ءَ دیست یے کہ برپی ءِ ر مگ آئی جنک ءَ نودی آؤرت۔سوج یے کرت کہ ناکو برپی ترا بچکیں زھگ نیست زاناں کہ تئی ر مگ تئی جنک ءَ گون انت۔۔۔۔؟نابچ نیست، منی است ءُ نیست نودی انت۔برپی پہ اپسوز گشت۔نودی ہم شیرزالیں جنکے ات،نہ رنگ ءُ دانگ ءَ کم ات ءُ نہ کار ءُ کمالءَ۔وخت وتی رپتار ءَ روان اَتءُ نودی روچ پہ روچ ءَ گیشتر سنجر ءِ دلءَ جاگہ کنان اتءُ آھدوناک ات کہ کدیں نودی را وتی دل ءِ واھگاں سرپد پکنت ءُ اگہ رازی بوت گڑا پہ آئی سانگ لوٹیت۔
یک شپے ہورتانی میچینگ ءِ وخت ءَ نودی ءُ سنجر کہ کمّونزینک بوت انت تہ سنجر گشت کہ ماہیں نودی من پہ تئی مہراں زراںءُ لوٹاں کہ تو منی وابانی بانوری ءَ قبول پکن تہ نودی پہ ترس ءُ لرز گشت۔۔۔نا موٹو دوارگ چشیںھبرنہ کنئے۔۔سردار دلمانگ انت کہ من آئی نشارببین ءُ تو وت زانئے کہ منی پیریں پس سردار ءَ جواب دات نہ کنت۔اگہ جوابے بدنت سردار منا پہ زور بارت ءُ پہ منی پسءَ مال ءُ حال ہم نئیلیت۔
بلئے سنجر گشت کہ یکبرے تئی سانگ ءَ لوٹاںءُ گنداں کہ چے بیت۔۔۔؟گشت یے شر بلوٹ۔۔۔ گڑا سنجر شہ نانءُ ورگءَ پدآچءَ را کٹینک یے پِرکُرتءُ گشگءَ لگّ ات۔ناکو برپی یک ءُ نیم سال انت کہ من تئی گسءِ زھگے اُن،منی نیکی،بدی ءُ است ءُ نیست ہرچی تئی دیما زاہر انت،من دلمانگ اُن کہ تو منا زاماس پکن۔برپی درائینت کہ تئی ہر گپ بے بدل انت بلئے سردارہم دلمانگ انت ءُ پہناد پہناد ءَ من اشکتہ کہ آنودی راوتی نشار کنگ لوٹیتءُ تو وت زانئے کہ سردار۔۔۔۔۔
گوں ہمے گپاں برپی ہاموش بوتءُ سنجر سھبءَ پدار مگ پہ چارینگءَ برتءُ آؤرت۔ہمے درنیامءَ ہؤرہم بوتءُ کاہ ءُ پوچ بازبوتءُ سنجرانوں نزینکءِ کوہانی شماں چارینتءُ نودی پہ آئی نیمروچءَ شہ گسءَ نان برت تہ یک روچے سردارءِ براسءَ آوانءَ شہ کوہے شمءَ یکجاہ نان ورگءَ دیست۔آبے کمار اتنت کہ کئے استءُ کئے نیست۔
شپءَ سنجرر مگ کہ گسءَ برت تہ مالوم بوت کہ سردارءِ پرمانءِ پداشہ آئی شوانگی لٹّ پچگرگ بوتہءُ سھبءَ سنجرزوبگءَ رستگیں بیست ہورت دیما گپت انتءُ رہادگ بوت۔
بہار ءِ وشیں شیرگرمے۔سنجر گوں ائیدو مال چارینگءََ انت،برے بیرہءَ ائیدو رؤتءُ برے سنجر۔ اے بری سنجر شت ات کہ دو پرپٹءَ چار سلاہ بندیں مردم سوار ات انت،آت انتءُ ائیدوراسوج اش کرت کہ سنجر کجاانت؟آئی براس ءِ پیگامے آئرا دئیگی انت۔ائیدو گشت کہ اے کوہءِ آدستءَ ر مگءِ بیرہءَ شتہءُ آ دیم پہ آئی رہادگ بوت انت۔گوں سربوھگءَ سنجرءِ دست ءُ پاد اش بست انت،آئی پونزءُ گوش اش برّت انتءُ دؤر اش دات کہ چون تونودیءِ بانوریءُ وتی سالونکی ءَ واھگدارئے کہ۔۔۔۔ نا۔۔۔۔؟
اے تئی سزا انتءُ وتی راہءَ اشت ءُ شت انت۔تاں دیرءَ سنجری پدی نیاھگءَ ائیدوتکانسر بوت،شت چارت یے تہ چے گندیت کہ سنجر شہ پونزءُ گوشاں زبہر انتءُ کپتہ پلپٹگءَ انت،دست ءُ پادے پچ کرت انت،روڈءَ آؤرت یے ،گاڑی یے داشت،سوارے کرتءُ شہرءِ ہسپتالءَ رسینت یے۔نون سنجر ہسپتال ءِ تہتءِ باہوٹ انتءُ وتی زندءِ منتگیں روچانی گمءَ روچ پہ روچّ آپ بوان انتءُ ائیدومپتِ ھدا عدالتءَ پیشی جنتءُ ّ آوانی سُنٹ پہ ہمے غیرانسانی حرکتءَ گوں پؤران انت پرچاکہ آوانی بڈّءَ سردارءِ دست ایر انت۔