گوستگیں حکومت ءَ بلوچستان ءَ وانگ ءُُ زانگ ءِ دیمروئی ءِ سرا مزنیں اوگامے جت ، گوستگیں وزیراعلی وت روانکاں ہوار بوت چکاس جاہانی تروتاب ئےِ کت بلئے انوگیں حکومت ءِ گشگ ایش انت کہ بلوچستان 2013 ءَ پد وانگ ءُُ زانگ ءَ پد ا گیشتر پد منتگیءِ آماچ بوتگ ۔

انوگیں سروزیر ءِ گشگ انت کہ چوکہ گوستگیں حکومت ءَ بلوچستان ءَ نوکریانی دروازگ چٹ بند کتگ پمشکہ بے روزگاری ءُُ شدلاپی ءِ سوب ءَ پہ مردماں وانگ ءُُ زانگ ءِ دروازگ ہم بند بوتگ انت ۔

ہمے گوستگیں حکومت ءِ دور ءَ کوئٹہءَ کہ بلوچستان ءِ سر شہر انت کتاب جاہانی جیڑہ دیم ءَ اتکگ ات ،اے وہد ءَ کوئٹہ ءَ ایوک ءَ یک کتاب جاہے کار ءَ انت کہ آ جناح( گوستگیں بلوچستان ) لائبریری انت بلئے جناح لائبریری کسان انت آئی ءِ تہا سوجگر ءُُ نودربراں پہ نندگ جاگہ نیست،لائبریری ءِ کماش ءِ گشگ ایش انت کہ لائبریری ءَ گنجائش 400 مردم ئیگ انت بلئے اے وہد ءَ 8000 نودربراں لائبریری ءِ رجسٹریشن کارڈ گون ءُُ لائبریری ءَ اے وہد ءَ پہ وانوکاں اوشتگ ءَ ہم جاگہ نیست ۔

اے درچ ءَ ساچینک ءِ گوستگیں پیش لبز ءُُ شونگالاں وزیراعلیٰ بلوچستان ،چیف سیکریٹری بلوچستان ، سیکریٹری ایجوکیشن ، ءُُ سیکریٹری کلچر ءَ بار بار گشگ بوتگ کہ اے بائدیں اوگام ءُُ روتاکی حال تراناں یلہ بدئینت ءُ کار بکن انت پرچکہ پہ اوگام ءُُ حال تراناں ہچ کارے نہ بوتگ ءُُ ننکہ بیت ۔

اے بابت ءَ بلوچ اسٹوڈنٹس ایکشن کمیٹی ءَ ہم بازیں گامگیجے زرتگ اَت آہاں گوں سیکریٹری کلچر ءُُ سیکریٹری ایجوکین ءَ ہم گندو ءُُ نند کتگ ات بلئے سیکریٹری کلچر ءُُ سیکرٹری ایجوکیشن ءَ ایکو ءَ ایشاناں تسلی داتگ کہ کار بیت،ایشیءَ ہوار کوئٹہ ءَ بلوچ زانندگیں مردمانی دگہ یک ڈلے ءَ ہم سیکریٹری کلچر ءُُ مئیر کوئٹہ ءَ گوں گند ءُُ نند کرتگ ات ءُُ شہر ءَ بندیں لائیبریریانی پچ کنگ ءِ گپ جتگ ات ۔

اے ڈل ءَ گوں سیکریٹری کلچر ءَ گشتگ ات کہ اسپنی روڑ ءَ کلچر ڈیپارٹمنٹ ءِ مزنیں حال ءَ (2000مردم داریت) پہ ریڈنگ حال ءِ حاترا کارمرز کنگ بہ بیت ،دومی سنڈیمن لائبریری ءِ واک داراں کھڈن بکنت کہ آ اوں چو جناح لائبریری ءِ وڑا وتی رجسٹریشن ءَ پچ بکنت پرچکہ اشکنگ ءَ سنڈیمن لائبریری ءِ واکدار ایوک ءَ گچینی مردماں رجسٹریشن کارڈ دئیگءَ اَنت دگہ گپے اے سیکریٹر کلچر ءِ دیم ءَ آرگ بوتگ ات۔

کہ صادق لائبریری ءِ کاراں گشاد بکنت پرچکہ اے لائبریری ءَ ہم نودربراں نندگ ءِ گنجائش باز انت بلئے لائبریری ءِ گر ءُُ دار جوان نہ انت ، ہمیشی ءِ ہمراہی ءَ سیکریٹری کلچر ءَ را اے گشگ بوتگ ات کہ کلچر ڈیپارٹمنٹءَ چوکہ مالی باغ ءَ مزنیں ماڑی ءُُ بلڈنگے است پمشکہ ورنا ءُُ وانوکانی در پہ در بوہگ ءِ بدل ءَ ہمے بلڈنگ ءُُ ماڑیاں پہ ریڈنگ روم ءِ حاترا کارمرزکنگ۔

بہ بیت بلئے اے درائیں سر ءُُ سوج ءُُ پنت ءُُ شورگشئے گوات ءَ برتگ انت ننکہ سیکریٹری کلچر اے گپانی سرا گامگیجے زوریت ءُُ ننکہ سیکریٹری ایجوکیشن ءُُ مئیر کوئٹہ ءَ زرتگ ،نودر ءُُ وانوک انگت سہب ءَ بگرداں بیگاہ ءَ جنا ح لائبریری ءِ دیم ءَ لین ءَ اوشتاتگ انت۔

کہ بلوچستان ءِ گوستگیں ءُُ انوگیں حکومت ءِ وانگ ءُُ زانگ دوستی ءِ نام سوالے؟ ایشی ءَ ہوار سیکریٹری ایجوکیشن ءَ را اے ہم گشگ بوتگ ات کہ آ بائدیں کوئٹہ ءِ استیں کالجانی لائبریبریاں اگاں پہ ہمک مہلوک ءَ پچ نہ کنت ۔

کم چہ کم پہ وتی نودربرانی حاترا وَ پچے بہ کنت اگاں کوئٹہ ءِ کالجانی لائبریبریاں داں شپ ءِ 9 بچ ءَ ہم پچ کنگ بہ بیت گڈا بلوچسان ءِ یکیں لائبریری جناح لائبریبری ءِ بار کم تر بوت کنت ءُُ اگاں کوئٹہ شہر ءِ لائبریریانی جیڑہ ہلاس کنگ نہ بوت گڈا بوت کنت نودربر دگہ مستریں جیڑہ یے ءَ وتی سرا بکش انت۔

دومی اے وہد ءَ جناح لائبریری ءَ کہ 2،3 ہزار مردم پہ سیٹ گرگ ءَ لین ءَ اوشتاتگ ،اگاں ناشری یے آماچ بہ بیت گڈا بلکیں کلچر ءُُ ایجوکیشن سیکریٹری جارے بہ پرین اَنت کہ ما کوئٹہ ءَ دو نوکیں لائبریبری جوڑ کنیں!؟