کارل مارکس ءِ رِد ءَ دنیا ءِ تہا انسان وتی ہست ءْ نیستی ءِ حساب ءَ دوبہر ءِ تہا اَنت۔ یک بہرے ءِ مردم ’مال ہست‘ طبقہ ءِ تہا اَنت ءْ دومی ’مال نیست‘ ءِ ۔ مال ہست ءِ گورا ہرچی ہست۔ مال ہست چیز ءِ پیداواری واہْند[owns means of production] اِنت کہ ہمیشی ءِ زَراں [capital] چہ چیز ءِ پیداواری عمل بندات بیت۔ 

ءْ اے نیام ءَ ہروڑیں پیداوارے بیت، اے دْراہ مال ہست ءِ دست ءَ بنت۔مال نیست ہچ چیز ءِ واہْند ءْ ہْدا بْند نہ اِنت۔ آ تہنا وتی ہذمت ءِ واہْند وت اِنت۔ آئی ءِ گورا ہذمت ءَ ابید دگہ ہچ نیست۔ انسان ءِ اولی ملکیت انسان ءِ بدن اِنت کہ آئی ءِ ہذمت ءْ محنت ءِ بن زِہ اِنت۔ پمیشکا مارکس گْشیت کہ انسان چہ بْن اصل ءَ ہذمت کَشے [labour]۔اگاں پیداواری رِد ءَ بچارئے گڑا مال نیست ءَ ہچ وڑیں ملکیت نیست۔

بلئے اے دنیا ءِ تہا مال ہست چہ مال نیست ءَ تعداد ءَ کم تِر اَنت۔ حق وَ اِیش اِنت کہ ہما گیشتر اَنت بائد اِنت مال ہماہانی گورا گیشتر بہ بیت۔ مارکس گْشیت ، اے مال ہست پہ وتی سلامتی ءْ مقام ءِ برجاہ دارگ ءَ وتی گورا یک انٹیلی جنشیہ یے داریت کہ اے مال ہست ءِ قدر ءَ یک جہانی دروشمے دنت ءْ ایدگراں ہمے وڑیں زندے ءِ گوازینگ ءِ سکین ءَ دنت۔

آجار جنت کہ الکاپیں زند ہمیش اِنت کہ مال ہست ئیگ اِنت۔ ہر کس مال ہست ءِ وڑیں زندے گوازینت کنت۔ پہ اے وڑیں زند ءِ گوازینگ ءَ بِل اِت کہ اینظام محکم بوہان بیت ، پرچہ کہ ہمے نظام ءِ تہا ہر یک نفرے ءَ چیزے رسیت۔ اگاں اے نظام پْرْشت گڑا کس ءَ ہچ نہ رسیت۔مارکسٹ ہمے سرپد بنت کہ مال ہست ءِ حاکمی ءِ اے نظام مردماں آزاتی نہ دنت بلکیں اے مردماں دائما وتی اجل ءِ زَدہ کنت۔ 

مال نیست کہ مال ہست ءِ گورا وتی ہذمت ءْ محنت ءَ بہا کنت۔ آئی ءِ ہذمت ءَ چہ ہما چیز جوڑ بیت ، مال ہست ہذمت کار ءِ حق ءَ جنت ءْ ہمنچو زَر پہ آئی ءَ جوڑ بوہگ ءَ اِنت۔ ہمیشانی سرا اجل جنت ءْ ہمیشاں وت زْوریت۔ ہمے زَرآئی ءِ ہستوں مند بوہگ ءِ بْن زِہ اَنت۔ ہمے زَر یک نیمگے یکے ءِ ہذمت ءِ نہ اَنت، ہمائی ءَ ازگار کنگ ءَ اَنت ءْ ہمائی ئیگ اَنت آئی ءَ نیزگار۔پمیشکا مارکس ایشی ءَ اجل زَدیں نظامے [exploited system] گْشیت۔

مارکس ءْ ایشی ءِ پلہ مرز ہمے سرپد بنت کہ داں اے نظام برجاہ اِنت ، پہ اے اجل زَدی ءَ ہچ وڑیں آمود [justice] نہ بیت۔ پہ آمود ءَ اوّل سرا اے نظام ءِ جند پْروشَگی اِنت۔ اگاں کسے ہمے نظام ءِ تہا آمود ءِ جْہد ءَ سر بِہ کَشیت، چہ ایشی ءَ ہمے نظام ءِ جند محکم بیت۔ اگاں اِنچو جفا ءَ پد آمودے بہ بیت گڑا اے آمود چہ وتا نابکاریں عملے ودی کنت یا اے آمود چہ وتا نابکار بیت۔ 

ایشی ءِ سر ءَ تاں پاد بدل کنگ اے نظام ءِ پْروش ءْ شکست بیت۔انٹیلی جنشیہ وت بْن اصل ءَ مال ہست طبقہ ءِ مردم نہ بنت بلکیں اے مال ہست ءِ گورا دست بند اَنت ءْ ایشانی ہؤ ءَ گوں ہؤ کن اَنت۔ اے رِد ءَ اِیشاں مال ہست ءِ نیمگا چہ مال ءْ زَر رسیت۔ چونائی ءَ انٹیلی جنشیہ پہ زانت ءْ سما اے کار ءَ گوں ملمہ نہ بنت۔ 

بلکیں اے مال ہست ءِ طلسم ءَ گوں گنوک بنت۔ مارکس اے طلسم ءَ فیٹش [fetish] ءِ نام ءَ دنت۔ہمے طلسم ءِ زِد ءَ کَپتگیں مردم ہر ہما چیز ءَ وتی ذات ءِ ہڑدری اِیں بہر سرپد بیت کہ بْن اصل ءَ آئی ءِ ذات ءِ بہر نہ بیت۔ ہما کار ءْ کِرد کہ آئی ءَ ذات ءَ گوں بْن اصل ءَ پیوست اَنت، آہاں چہ وتا سِندیت ءْ چگل دنت۔ 

ایشی ءِ مطلب اِنت انٹیلی جنشیہ وتا نہ زانگ ءَ اِنت۔ بزاں آبیگانہ اِنت۔ اے دائما زند ءَ مال ہست ءِ وڑا گوازینیت بلئے وتا چونائی ءَ مال نیستے لیکیت۔پہ مال ہست ءْ کپیٹلسٹک آرڈر ءِ رَکینگ ءْ محکم کنگ ءَ انٹیلی جنشیہ مزنیں کِردے پیلو کنت، اے درگت ءَ مستریں کار ہم ہمیشی ئیگ اِنت۔ 

اے مردماں اَنچیں قدرے ءِ رندگیری ءَ پِرینیت کہ آہانی وتی قدر نہ اِنت۔ اے مال نیستیں مردماں وتی جند ءِ قدر ءَ چہ دْور بوہگ ءِ سکین ءَ دنت کہ مردم مال ہست ءِ قدر ءَ اصلی قدرے سرپد بہ بنت۔

مال ہست ءِ قدر ءِ رَندگیری ءِ دَرگت ءَ انٹیلی جنشیہ آئی ءِ قدر ءَ اوّل سرا جہانی قدرے گْشیت۔ مردماں سکین دنت کہ مال ہست ءِ فِلاں قدر ءِ زْورگ ءَ چہ مال نیست ہم الکاپیں زندے ءِ واہْند بیت۔کپیٹلسٹک [سرمایہ دارانہ] زند قدرانی گیش کنگ ءِ زند اِنت۔ مال نیست ہمنچو قدراں گیش کنان بیت آ مال ہست ءِ زند ءَ رَست نہ کنت۔ ہمنچو قدر گیش بوہان بنت، زند بْرز تر روان بیت۔ ہما چیز مردمانی دست رَس ءَ مہ بنت۔ ہمے دست نہ رَسگ ءِ نیمگا انٹیلی جنشیہ مردمانی حیال ءَ گور کنان نت۔