بلوچستان ءِ سیاسی دور ءُُ باریگ ءِ گپ بہ بیت داں مدام گِش ءُُ مانگش ءِ مانجی ءَ بوتگ ۔اول وَ بلوچ ءَ را سیاست ءِ جوانیں موہ نہ رستگ اگاں رستگ داں انچیں پیشوانک بوتگ اَنت کہ آ راجءِ آورتگیں نہ بوتگ اَنت بلکیں زوراکیں حکومت ءِ بوتگ اَنت پدر اَنت آ کہ راجی پیشوانکے نہ بیت آ چتور مردمانی درد واری ءَ کت کنت؟ چو ہچبر بوت نہ کنت دانکہ راج ءِ پیشوانک راجی مردمے مہ بیت آ ہچبر راج ءِ دردوار بوت نہ کنت ۔

بلوچ راج ءَ ہما سیاسی سروک کہ چہ بندات ءَ بزاں نیپ ءِ حکومت ءَ ون یونٹ ءِ پروشگ ءَ ساری ءِ جہد کار بوتگ آوانی کرد پہ راج ءَ آ وڑ نہ بوتگ کہ راج ءَ واہگ داشتگ ۔بلئے بوگے گہتر بوتگ بلئے ہمے گہتری دیم ءَ نہ شتگ بلکیں پد کنزان انت ءُُ انوں انچیں وہدے اتکگ کہ راج چہ راجی سروکاں بیزاری اِنت پرچکہ آ راجی پیشوانک ءِ بدل ءَ آورتگیں سیاست دان بوتگ اَنت کہ وتی ءُُ وتی حاکمانی دلوشی ءَ کاراِش کتگ ۔

اگاں یکے سروکے کہ پہک راجی واہگاں پیلو کنگ بلوٹیت آگار ءُُ بیگواہ کنگ یا آئی ءَ سروکی ءِ موہ دئیگ نہ بیت ۔مئے راج ءِ بد بحتی ہمیش اِنت کہ آ ئی ءَ ہچبر وتی پیشونک پجا نیاورتگ آئی ءَ مدام انچیں مردمانی سرا باوری کتگ کہ آوانی گپ ءُُ گال ءُُ چرپیں دروگ بندگ ءَ شیوار بہ بنت من یک دوستے ءَ را گشت کہ اے بری وتی ووٹ ءَ کیا دئیے داں آئی ءَ پسو دات کہ کس ءَ ۔۔۔پرچکہ کس بیسہ ءِ لاحق نہ انت ءُُ اے درست دروگ بند ءُُ زوراکانی مردم اَنت ۔

یک حسابے ءَ آئی گپ رد نہ انت بلئے درائیں مردم۔۔۔۔۔؟چوش نہ اِنت۔مرچی سیاسی موسم گرم اِنت ءُ اگاں کسے ءِ یک مردمے ءِ نام ءَ بہ گپت داں گشگ بیت کہ تو وَ پلان پارٹی ءِ مردمے ،یا ترا وَ پلان پارٹی دوست نہ بیت ۔بلئے چش نہ اِنت مردم بائد گپ بجن اگاں گپ جنگ مہ بیت داںیکبرے پدا زوراکانی واہگ پیلو بیت ۔چنائی ءَ مئے ہاموشی ءَ مارا گیشتر تاوان بار کتگ اے برے بلئے بائد گپ کنگ بہ بیت ۔

من بی این پی ءِ مردم نیاں بلئے من چہ آئی کرد ءَ سرپد اَنت واجہ اختر کہ آ وہدے سر وزیر کنگ بوتگ اَنت داں آئی کتہ کاری مہلوک ءِ دیم ءَ زاہر اِنت دومی آئی وہد اوں سرجمی ءَ نیشتگ اَت بلئے حیئر گوستگیں وہدے گپ کنگ مہ بیت اے حبر واجہ اختر ءِ پارٹی ءَ جان محمد دشتی ڈولیں راجی سروکے ہوار اِنت۔

جان محمد دشتی ءِ گور ا ہچی حاجت نیست عمر ءِ پیراں سری آئیءَ سیاست ءِ حب ءَ نہ جتگ بلکیں آ ئی بزگیں راج ءِ بزگی چم ء وت دیستگ ءُُ آ زانت اگاں اے بری اگدگانی سرا بے چم ءُُ گوشے شت پہ بلوچاں ہچی نہ مانیت پمشکا آئی لانک بستگ ءُُ اے برے سیاست ءَ دور کتگ ۔

واجہ جان محمد دشتی ءِ کرد ءُُ کتہ کار آ تُری لبزانکی بہ بنت،راجی بہ بنت،مردم گری بہ بیت،یا وتی بیوریوکرسی ءِ وہدانی کار ءُُ کرد بہ بنت درست راج ءِ چماں پدر ءُُ زاہر اَنت اے نوں مئے نزوری بوت کنت کہ ما چہ واجہ ءِ کتہ کاریاں بے حال ءُُ پراموش بہ باں یاآئی ہما کہ کوش ءِ بدوا بوتگ اَنت چرآں بے حال بہ بنت اگاں اے برے پہ بلوچاں ،پہ بلوچستان ءَ چیزے کنگی اِنت داں واجہ جان محمد دشتی ءُُ بی این پی کہ آئیءِ کرد بلوچستان ءِ اے دگہ سیاسی پارٹیاں گہتر بوتگ ہمائی ووٹ بہ کناں ۔

من نزاناں کہ چنت مردم ءَ بی این پی ءِ منشور وانتگ ،من نزاناں کہ چنت مردماں واجہ جان محمد دشتی ءِ احوال گوش کرتگ اَنت اگاں وانتگ ءُُ دیستگ اَنت داں حئیر اگاں نہ داں گونڈی گری ءَ بس ہمے گشگ لوٹاں کہ اے پارٹی ءُُ جان محمد دشتی ءِ گشگ اِنت کہ’’ ما بلکیں وتی راج ءِ بزگیں مردمانی درائیں درداں ،درائیں حاجتاں ،درائیں لوٹاں پیلو کت مہ کن اَنت پرچکہ وہد کم انت ءُُ کار بے آسریں بلئے یک چیزے ءِ ما ہروہد کول ءُُ سوگند کناں کہ ما راج ءِ بہائی کنگ ءَ گون نباں ۔۔۔راج ءِ حقانی دستگیری ءَ گون نباں ۔۔۔۔راج ءِ اومیتاں اگاں سر بوت نہ باں داں راج ءِ اومیتانی پادمالی ءَ گون نباں ۔۔۔

اے مئے گوں راج ءَ کول اِنت ءُُ اگاں ما وتی اے کولانی پیلوئی ءَ بے سوب بوتاں داں راج ءِ چمپل ءُُ مئے دیم۔۔۔۔‘‘اے ڈولیں تچک ءُُ پہکیں پیشوانکے مدتے ءَ پد کہ بلوچ ءَ دست ءَ کپت کہ گوہر قیمتی یے اے دستگرگی اِنت اے چہ دست ءَ ببا دئیگی نہ اِنت۔اگاں انگت ءَ راج ءَ پہم ات نہ کت کہ آئی پیشوانکی ءِ میار کئی دستاں بہ بیت داں ۔۔۔۔۔

’’راجے کہ بہ بیت گنگ نہ مانیت نہ مانیت‘‘۔بلوچ راج ءِ مستریں نزوری ہمے بوتگ اَنت کہ یکے آئیءَ گچین کاریاں بہر نہ زرتگ اگاں زرتگ داں آیاں وتی دلی پیشونک دیم ءَ نیاورتگ اَنت کہ دروگ بندانی پندلاں کپتگ ءُُ دائم تاوان ءَ کپتگ اَنت بلئے اے بری انگت راج ءَ انچش کت داں راج ءِ جند نہ مانیت ءُُ بقول قاضی ئیگ ءَ بلئے اے جنک بلوچانی گڈسری جنگ اِنت۔ 

اگاں اے رند ءَ پدا حکومت واجہانی وتی تب ءُُ ہیل ءِ بئیت اِنت داں بلوچانی حق جنی ءُُ پدمنتگی داں ابد ہمے رنگ ءَ برجاہ بیت اگاں راج ءَ وتی ہما مردم کہ راجی درد اِش دل ءَ ماں واجہ جان محمد دشتی من نہ گشاں کہ پہکیں اشرفی اِنت ءُُ ایوک ءَ ہما راج ءِ رہشونی ءَ کت کنت بلئے واجہ جان محمد دشتی ءِ دیم ہما کہ اوشتاتگ اَنت آوانی کرد چاری بہ بیت داں گپے وت پدر بیت پدا انگت ءَ واجہ جان محمد دشتی ءِ دامن ءَ چشیں پولنگے پر نیست انت کہ راج ءِ دل چرائی ءَ بروت آں شری ءِ گنجیں زرے ماں آئی سینگ ءَ است انت اگاں کسے بزانت ءُُ ہمے زنگ ءِ پد ءَ واجہ ءَ وتی ووٹ ءَ بدات ءُُ سوبمند بہ کن اِت ۔