بلوچستان ءِ انوگیں گچین کاریاں واجہ جان محمد دشتی ضلع کیچ ءَ حلقہ NA271 ءَ قومی اسمبلی ءَ اوشتاتگ،اے گپ پرائی دژمن ءُُ دوزواہ ہردوکاں پہ نوکیں گپے۔چوکہ بلوچستان ءَ مدام چوش بیت ہما کہ حکومتی یاکہ ہما مزن اگدگیں مردم ریٹارمنٹ ءَ پد یا وَ تبلیغ ءَ روانت یاکہ دگہ کاروبارے کن اَنت۔

بلئے چش کم بیت کہ یک بیوروکریٹے ءُُ بلوچ دانشورے اے دود ءِ ہلاپ ءَ سیاست ءَ دور کنگ ءَ اِنت، بلوچستان ءِ مردماں پہ ووٹ ءُُ الیکشن سکیں وہدے پرچکہ آواناں بدیں مردماں چہ کم بدیں مردمے گچین کنگی اِنت۔

بلئے اے برے جان دشتی ءَ را درائیں وانندگ ءُُ ہما کہ چاگرد ءِ گہتریں مردم اَنت درست ووٹ دئیگ ءَ ساڑی اَنت،ناامیتی ءِ سیاہ تہاریں شپ ءَ رژنے ءِ درا اِنت۔اے دور ءَ لازم اِنت آئی بدوا آئی ہلاپ ءَ بہ کن اَنت۔

انچوکہ منڈیلا ءَ گشتگ کہ سیاست ءَ بازیں جیڑہ است اَنتءُُ لس مہلوک مدام نزانتگیں چیزاں زانگ نہ لوٹ ایت۔۔چیزے عسکریت پسند بنت دانکہ جیڑہاں گوں دوچاری مہ بیت،پرچکہ جیڑہانی گیشواری ءَ کس ءَ نامداری یے رست مہ کنت ۔۔‘‘ بلئے یک نوکیں چاگردے ءِ جوڑ کنگ ءَ دانکہ نگد ءُُ تنقید مہ بیت آ شر بوت نہ کنت۔ واجہ دشتی ءِ گچین کاریاں بہر زورگ ءَ بازیں مردمے گل اِنت۔

مدتے ءَ پد انچیں مردمے لس مہلوک ءِ دپ ءَ کپتگ پمشکا مردم وتی گوستگیں امیت واراں سرگوز واجہ دشتی ءَ ووٹ دئیگ ءَ ساڑی اَنت ۔ پہ بلوچ ءُُ بلوچ دپتر و لبزانک ءَ واجہ جان محمد ءِ قربانیاں کس انکاری نہ انت۔پمشکا اے رند ءَ جان محمد وڑیں مردمے ءَ سر گوز چشیں مردمے گچین کنگ مہ بیت دائم پہ بلوچاں حراب بوتگ ۔چیزے مردم واجہ ءِ ہلاپ کنگ ءَ انت آ بلکیں اے گپ ءَ نزانتکار اَنت کہ واجہ جان محمد دشتی ءَ ہما وہد اوں پہ بلوچ راج ءَ کار کتگ وہدے مزن اگدگانی سرا بوتگ ۔

یکے وَ آئی ءِ لس مہلوک ءَ کتہ کاری دومی آئی ءِ نبشتگیں کتاب وت آئیءِ کد ءُُ بالاد ءَ بس اَنت ۔بلوچی اکیڈمی ءَ تہ وہدے کہ واجہ ءِ دست ہوار بوتگ آئیءِ دیمروئی وت جہان ءِ دیم ءَ سہر اِنت۔آساپ روتاک ءِ بابت ءَ امریکہءَ بلوچ احوالکار ملک سراج اکبر ءَ گشتگ اَت کہ اے پہ بلوچ ندکاراں مزنیں پلیٹ فارمے ءُُ راستی ءَ اے روتاک ءِ مٹ انگت ءَ بلوچستان ءَ نہ گواہ ایت۔ واجہ جان محمد دشتی ءِ گوں مردمانی مدت ءُُ کمک ءَ جتائیں بستارے بوتگ ۔

نوں گچین کاریاں بہر زورگ پہ بلوچءُُ بلوچستان ءَ جوانیں مستاگے،ءُُ درائیں بلوچستان ءِ مرد م اے گچین کاری ءَ درائیں چہ مہکمیں امیت وار واجہ جان محمد دشتی ءَ نامینگ ءَ اَنت ۔ چشیں مردمے ءِ گچین کنگ ءَ بازیں جوازے است انت دیمروئی دوستیں ءُُ سیکولر پگر ءَ گوں ہچ وڑیں سیادی یے نیست اِنت ۔انچیں مردمے کہ ایوک ءَ وتی جند ءِ واہگ ءُُ واہشاں پہ زندگ نہ اِنت بلکیں پہ راج ءُُ قوم ءَ زندگ بوہگ بلوٹ ایت۔

واجہ جان محمد دشتی ءِ زند وت یک راستین ءُُ پہکیں بلوچے ءِ داستان اِنت انچیں بلوچے ءِ کہ وتی چاگرد ءِ راست ءُُ دروگ ،درد ءُُ اندوہاں چہ وت آشنا ءُُ سرپد انت ۔آوکیں گچین کاریاں واجہ جان محمد دشتی ءِ سوبمند ی ءَ چہ بلوچاں انچیں پیشونکی دست کپیت کہ آ بلوچ ءِ توار ءَ حاکمانی در ءَ جوانیں رنگے ءَ برت کنت۔

یک انچیں مردمے کہ بلوچ ءِ چاگردی،ربیدگی،ءُُ مالی جاوراں چہ سرپد انت ءُُ ایشانی گوما ہچ رنگیں سود بازی ءَ گون نہ بیت ءُُ کس ءَ را ایشانی پاد مالی ءَ نیلیت ۔پمشکا راج ءَ را گوں دست بندی اِنت کہ چشیں گوہر قیمتی دائم دست ءَ نیت اِنت پمشکاایشیءَ چہ دستاں روگ میل ات۔